ချွဲသလိပ်တွေထွက်ပြီး ချောင်းတွေဆိုးနေပါသလား

(Unicode)

    အအေးမိ၊ လည်ချောင်းနာပြီးတဲ့နောက်မှာ ချွဲသလိပ်တွေထွက်ပြီးတော့ ချောင်းဆိုးနိုင်ပါတယ်။ ဒီချောင်းက မနက်ပိုင်းတွေမှာ ပိုဆိုးတတ်ပါတယ်။ အအေးမိ၊ ချောင်းဆိုးတာတွေက အများအားဖြင့် ဗိုင်းရပ်စ်ပိုးကြောင့် အဖြစ်များပါတယ်။
    ချွဲသလိပ်တွေထွက် ချောင်းဆိုးတာက တစ်ခါတလေကျတော့လည်း အအေးမိလို့မဟုတ်ဘဲနဲ့ ပန်းနာရင်ကြပ်၊ နှလုံးမကောင်းခြင်း၊ နာတာရှည် လေပြွန်ရောင်ခြင်းတွေကြောင့်လည်း ဖြစ်နိုင်ပါတယ်။ ချောင်းဆိုးတာ တာရှည်ကြာလေလေ နောက်ကွယ်မှာ ပိုပြီးပြင်းထန်တဲ့အကြောင်းရှိလို့ ဖြစ်နိုင်လေလေပါပဲ။ ဆေးလိပ်ငွေ့အမြဲရှူနေရတဲ့ ကလေးတွေ၊ ကိုယ်ခံအားနည်းတဲ့သူတွေမှာ ပိုပြီးတော့ ပြင်းထန်တဲ့ နောက်ဆက်တွဲပြဿနာတွေ ဖြစ်နိုင်ချေပိုများပါတယ်။

>>    အောက်ပါအချက်တွေ ကြုံတွေ့ရရင်တော့ ဆေးခန်းသွားပြပါ။
●    အသက် ၂ နှစ်အောက်ကလေးမှာ ချောင်းဆိုးချွဲပါခြင်း
●    ချောင်းဆိုးသွေးပါခြင်း
●    အရောင်ပါတဲ့ချွဲသလိပ်များ ထွက်ခြင်း အထူးသဖြင့် ပန်းရောင်အမြှုပ်တွေ (သို့) အစိမ်းပုတ်ရောင်
●    ကိုယ်ပူကြီးလျှင်
●    ချောင်းခြောက်ဆိုးနေရာကနေပြီးတော့ ချွဲသလိပ်တွေ ထွက်ချောင်းဆိုးရင်
●    ရင်ဘတ်အောင့်ခြင်း၊ အသက်ရှူရင် အသံမြည်ခြင်း၊ အသက်ရှူရခက်ခဲခြင်း၊ ကိုယ်ပူခြင်း၊ ကိုယ်အလေးချိန်ကျခြင်း၊ ခေါင်းအမြဲကိုက်နေခြင်း၊ နာကိုက်ခြင်း စတဲ့လက္ခဏာတွေ ခံစားရရင်
●    ပြင်းထန်တဲ့ တုပ်ကွေးလက္ခဏာတွေကို ရုတ်တရက် ခံစားရရင် (ကြွက်သားများ နာကျင်ကိုက်ခဲခြင်း၊ ပင်ပန်းနွမ်းနယ်ခြင်း၊ ခေါင်းကိုက်ခြင်း၊ ကိုယ်ပူခြင်း)
●    ချောင်းဆိုးချွဲပါတာက ၅ ရက်ထက် ပိုကြာလာရင် (သို့) ပိုဆိုးလာရင်
●    ဆေးတွေကို ဓာတ်မတည့်တာတွေရှိရင်

>>    အိမ်တွင်းကုထုံးများ
●    နွေးနွေးထွေးထွေးနေပါ၊ အနားယူပါ၊ ရေများများ သောက်ပါ။
●    ကလေးကြီးတွေမှာဆိုရင် ဆားရေနွေးနဲ့ တစ်မိနစ်ခန့်ကြာအောင် ပလုတ်ကျင်းပေးပါ။ တစ်နေ့ကို ၃ ကြိမ် ပလုတ်ကျင်းပါ။ လက္ခဏာတွေကို သက်သာစေနိုင်ပါတယ်။
●    ရေနွေးနွေးလေးနဲ့ ရေချိုးပေးရင်ရတဲ့ ရေနွေးငွေ့တွေက ချွဲတွေ ပျော်လာစေပြီးတော့ ချွဲတွေကို ပိုပြီးလွယ်လွယ်ထွက်လာစေပါတယ်။
●    နှာချေ ချောင်းဆိုးတဲ့အခါတွေမှာ ပါးစပ်ကို ဖုံးအုပ်ခိုင်းထားပါ။ ပြီးတော့ လက်ကို သေချာဆေးပေးပါ။

Dr. Mya Myo Myo Swe (www.drmyanmar.com)