တစ်နှစ်အောက် ကလေးငယ်တွေ အစာ ကောင်းကောင်းမစား၊ နို့ ကောင်းကောင်းမစို့ရင် ဘာတွေဖြစ်နိုင်မလဲ

    အသက် တစ်နှစ်အောက်ကလေးတွေမှာ နို့ ကောင်းကောင်းမစို့ဘူး၊ ခြောက်လအထက်မှာဆိုရင် ဖြည့်စွက်စာကိုလည်း ကောင်းကောင်းမစားဘူးဆိုရင် ကလေးရဲ့ကြီးထွားဖွံ့ဖြိုးမှုကို ထိခိုက်စေမှာ ဖြစ်ပါတယ်။
    ဘာလို့ နို့ကောင်းကောင်းမစို့ရလဲဆိုရင် အကြောင်းအမျိုးမျိုးကြောင့် ဖြစ်နိုင်ပါတယ်။ ဒါက အစာချေးများတာနဲ့ မတူပါဘူး။ ဘာကိုမှကို ကောင်းကောင်းမစားတာပါ။ အကြောင်းအရင်းက ဘာပဲဖြစ်ဖြစ် ကောင်းကောင်းမစားဘူး၊ နို့ကောင်းကောင်း မစို့ဘူးဆိုရင် အာဟာရချို့တဲ့မှာက အစိုးရိမ်ရဆုံးပါ။ ကမ္ဘာ့ကျန်းမာရေးအဖွဲ့က ကလေးသေဆုံးရခြင်းရဲ့ 45% လောက်က အာဟာရချို့တဲ့လို့ဖြစ်ရတယ်လို့ ခန့်မှန်းထားပါတယ်။
    ကလေးငယ်စဉ်မှာကတည်းက အာဟာရမချို့တဲ့ဖို့၊ လိုအပ်တဲ့အာဟာရဓာတ်တွေ လုံလောက်စွာ ရရှိနေဖို့က အရမ်းအရေးကြီးပါတယ်။ ဒါတွေ ချို့တဲ့ရင် ကလေးဘဝတစ်လျှောက်လုံးမှာ ကိုယ်ပိုင်းဆိုင်ရာ၊ စိတ်ပိုင်းဆိုင်ရာဖွံ့ဖြိုးမှုတွေကို ထိခိုက်ပါမယ်။

>>    ကလေးတွေ ဘာလို့ အစာ ကောင်းကောင်းမစား၊ နို့ ကောင်းကောင်းမစို့သလဲ
    အဖြစ်များဆုံး အကြောင်းအရင်းတွေထဲက တစ်ခုကတော့ လမစေ့ဘဲမွေးလို့ပါ။ လမစေ့ဘဲ မွေးလာတဲ့ကလေးတွေက နို့စို့ဖို့၊ နို့ကိုမျိုချဖို့ မတတ်သေးလို့ နို့ ကောင်းကောင်းမစို့နိုင်ပါဘူး။ ကလေးကြီးလာတာနဲ့ နို့စို့တာ ပိုများလာပါလိမ့်မယ်။ ဒီတော့ ကိုယ့်ရဲ့ကလေးက လမစေ့ဘဲမွေးထားပြီးတော့ ဆေးရုံကနေ ဆင်းလာတဲ့အချိန်အထိ ကလေးနို့စို့တာနဲ့ ပတ်သက်ပြီးတော့ ပြဿနာတွေရှိနေသေးတယ်ဆိုရင် ကလေးဆရာဝန်ကို သေချာမေးဖို့ လိုပါတယ်။
    မွေးရာပါရောဂါတွေဖြစ်တဲ့ ရေယုန်၊ အသားဝါ၊ ဗိုင်းရပ်စ်ပိုးကြောင့် အူရောင်ခြင်းတွေကြောင့်လည်း နို့စို့နည်းနိုင်ပါတယ်။ ဒါတွေကို ကုလိုက်ရင် နို့ကောင်းကောင်း ပြန်စို့ပါလိမ့်မယ်။

>>    ပြင်းထန်သောအခြေအနေများ
●    Beckwith-Wiedemann Syndrome ဆိုတဲ့ ကြီးထွားဖွံဖြိုးမှုလွန်ကဲတဲ့ ရောဂါလက္ခဏာစုကြောင့်လည်း နို့စို့နည်းနိုင်ပါတယ်။ ဒီရောဂါက ကမ္ဘာပေါ်မှာ မွေးကင်းစကလေး 13700 မှာ တစ်ယောက်ဖြစ်တယ်လို့ ခန့်မှန်းထားပါတယ်။ တခြားပြင်းထန်တဲ့ အခြေအနေတွေကတော့ -
●    မွေးရာပါ သိုင်းရွိုက်ဟော်မုန်းနည်းခြင်း - သိုင်းရွိုက်ဂလင်း ပုံမှန်မဖွံ့ဖြိုးတာ၊ အလုပ်ကောင်းကောင်း မလုပ်နိုင်တာတွေကြောင့်ပါ။
●    Hypoplastic left heart - နှလုံးရဲ့ဘယ်ဘက်ခြမ်းက ပုံမှန်မဖွံ့ဖြိုးလို့ သွေးတွေကို ခန္ဓာကိုယ်ထဲကို ကောင်းကောင်း ညှစ်မထုတ်နိုင်တဲ့ ရှားပါးရောဂါတစ်မျိုးပါ။
●    Infant botulism - မွေးကင်းစကလေးငယ်က Clostridium botulinum ဆိုတဲ့ ဘက်တီးရီးယားပိုးကို မျိုချမိလို့ ခန္ဓ္ဓာကိုယ်ထဲမှာ အန္တရာယ်ရှိတဲ့ အဆိပ်တွေကို ထုတ်ပြီးတော့ အသက်ရှူတာ၊ နို့စို့တာတွေကို ထိခိုက်စေတဲ့အခြေအနေတစ်မျိုးပါ။
●    Down syndrome

>>    သိပ်မပြင်းထန်သော အကြောင်းအရင်းများ
    ယာယီ နေမကောင်းတာတွေကြောင့်လည်း ကလေးက နို့စို့ရင် နာလို့၊ မသက်မသာဖြစ်လို့ နို့စို့နည်းသွားတာမျိုးလည်း ဖြစ်တတ်ပါတယ်။ ဒီတော့ နို့စို့တာကို နှောင့်ယှက်နိုင်တဲ့အခြေအနေတွေကတော့ -
●    ဝမ်းပျက်ဝမ်းလျှောဖြစ်ခြင်း
●    နားထဲကို ရောဂါပိုးဝင်ခြင်း
●    အအေးမိ၊ ချောင်းဆိုးခြင်း
●    သွားစပေါက်ခြင်း
    ကလေးနဲ့ ပတ်သက်ပြီးတော့ သံသယဖြစ်စရာရှိတယ်၊ စိုးရိမ်တယ်ဆိုရင်တော့ ကလေးဆရာဝန်နဲ့ သွားပြတာ မမှားပါဘူး။

>>    အရေးပေါ်အခြေအနေများ
    ကလေး အစာစားနည်းတာ၊ နို့စို့နည်းတာက အောက်ပါအခြေအနေတွေနဲ့ တွဲဖြစ်တယ်ဆိုရင် အရေးပေါ်ကုသမှုခံယူဖို့ အရေးကြီးပါတယ်။
●    ၄ နာရီကျော်လောက် နို့မစို့ခြင်း၊ အစာမစားခြင်း
●    အပူချိန် 100°F အထက်တက်ခြင်း
●    အစာစားပြီး၊ နို့စို့ပြီးရင် အန်ခြင်း
●    အန်တဲ့ထဲမှာ သွေးပါခြင်း
●    ချောင်း အမြဲဆိုးနေခြင်း၊ ချောင်းဆိုးတာ ပိုဆိုးလာခြင်း
●    အမြဲငိုနေခြင်း
●    ဝမ်းထဲတွင် သွေးပါခြင်း
●    အသက်ရှူရင် အသံမြည်ခြင်း
●    ကလေးကို ထိတွေ့ရင်တုန့်ပြန်မှုမရှိခြင်း