မိခင်နို့နဲ့ ဓာတ်မတည့်သော မွေးကင်းစကလေးများ

(Unicode)

    ကလေးတစ်ယောက်မှာ အမေ့နို့နဲ့ ဓာတ်မတည့်ဘူးဆိုတာ အလွန်ရှားပါတယ်။ ဒါပေမဲ့ တစ်ခါတစ်ရံမှာ အမေ့နို့ကို မခံနိုင်တာ၊ ဓာတ်မတည့်တာမျိုးတွေ ဖြစ်ပေါ်လာတတ်ပါတယ်။ အများစုမှာတော့ အမေစားသောက်ပုံကို ပြင်လိုက်တဲ့ာခါ ပြန်ကောင်းသွားတတ်ကြပါတယ်။ ဒါပေမဲ့ တစ်ခါတစ်ရံ ရှားရှားပါးပါး အမေ့နို့ကို ကောင်းကောင်းမချေဖျက်နိုင်တဲ့ ရောဂါရှိနေတတ်ကြပါတယ်။

>>    အမေ့နို့နဲ့ ဓာတ်မတည့်ပစ္စည်းများ
    ကလေးဟာ အမေစားတဲ့ အစားအသောက်တွေကြောင့် အမေ့နို့ကို ဓာတ်မတည့် ဖြစ်တတ်ပါတယ်။ အများဆုံးဖြစ်လေ့ရှိတာကတော့ နို့နဲ့နို့ထွက်ပစ္စည်းများပဲ ဖြစ်ပါတယ်။ ကလေး ၂% မှ ၃% ခန့်ဟာ နို့မှာပါတဲ့ casein ပရိုတင်းကို ဓာတ်မတည့်ဖြစ်တတ်ပြီး လေပွခြင်း၊ ဗိုက်နာခြင်း၊ ပါးစပ်နဲ့ စအိုတစ်ဝိုက်မှာ အနီကွက်ထခြင်း၊ ဝမ်းလျှောခြင်းနဲ့ ဂျီကျနေခြင်းများ ဖြစ်လေ့ရှိပါတယ်။ ကလေးနဲ့ ဓာတ်မတည့်တတ်တဲ့ အခြားအစားအစာများကတော့ မြေပဲနဲ့ ပဲနို့တို့ပဲ ဖြစ်ပါတယ်။

>>    ဓာတ်မတည့်ခြင်းအတွက်
    အကောင်းဆုံးသော ဖြေရှင်းနည်းကတော့ ဖြစ်လေ့ရှိတဲ့ အစားအစာတွေကို ရှောင်ကြဉ်ခြင်းပဲ ဖြစ်ပါတယ်။ နို့ထွက်ပစ္စည်းတွေကြောင့် ဖြစ်တတ်တဲ့ ဓာတ်မတည့်မှုတွေမှာ နို့၊ ချိစ်၊ ဒိန်ချဉ်၊ ရေခဲမုန့်၊ ထောပတ်နဲ့ အခြားနို့ထွက်ပစ္စည်းတွေကို ရှောင်ကြဉ်ရပါမယ်။ ဒီလိုရှောင်ကြဉ်ပြီးနောက် ၂ ပတ်မှ ၄ ပတ်အကြာမှာ ကလေးရဲ့ရောဂါလက္ခဏာတွေ သက်သာလာပါတယ်။ မလွဲသာတဲ့အဖြစ်ကလွဲလို့ အမေ့နို့ကို လုံးဝမဖြတ်သင့်ပါဘူး။ ကလေးရဲ့ ပထမအသက် ၆ လအတွင်းမှာ ကြီးထွားမှုကို အထောက်အပံ့ပြုတဲ့ အာဟာဓာတ်တွေ အကုန်လုံးဟာ အမေ့နို့ထဲမှာ ပြည့်ဝစွာပါဝင်ပါတယ်။ ကလေးအသက် ၆ လကျော်ရင်တော့ ဓာတ်မတည့်တာ နည်းသွားတဲ့အတွက် အမေဟာ နို့နဲ့နို့ထွက်ပစ္စည်းတွေကို ပြန်စားနိုင်ပါပြီ။

>>    Lactose ဓာတ်ကို မတည့်ခြင်း
    မွေးကင်းစတွေမှာ တွေ့ကြုံတတ်တဲ့ ဓာတ်မတည့်မှုတစ်မျိုးကတော့ နို့ထဲမှာပါတဲ့ အချိုဓာတ် Lactose ပဲဖြစ်ပါတယ်။ Lactose အချိုဓာတ်ဟာ အမေ့အစားအစာတွေကတစ်ဆင့် အမေ့နို့ထဲ ပါလာတာဖြစ်ပါတယ်။ ကလေးကိုယ်ထဲမှာ lactose ကို ချေဖျက်ဖို့ လိုအပ်တဲ့ဓာတ် ပြည့်ဝလုံလောက်စွာ မပါဝင်တဲ့အတွက် ဖြစ်လေ့ရှိပါတယ်။ ယာယီဖြစ်စဉ်မျှသာဖြစ်တဲ့အတွက် အမေ့နို့ ဆက်တိုက်နိုင်ပြီး အမေကိုယ်တိုင်လည်း နို့နဲ့ နို့ထွက်ပစ္စည်းများကို ဆက်လက်စားသုံးနိုင်ပါတယ်။ တစ်ခါတစ်ရံ ရှားရှားပါးပါး မျိုးရိုးလိုက်ရောဂါရှိသူကလေးတွေမှာ lactose အစာချေအင်ဇိုင်းဓာတ်ကိုပါ အမေ့နို့နဲ့ ရောတိုက်ရတတ်ပါတယ်။

>>    Galactose ဓာတ်မတည့်ခြင်း
    အမေ့နို့ အချိုဓာတ်ဖြစ်တဲ့ Galactose ကို ဓာတ်မတည့်ခြင်း ဖြစ်ပါတယ်။ ကလေးရဲ့အသည်းက ဒီ Galactose အချိုဓာတ်ကို မဖြိုခွဲနိုင်တဲ့အတွက် ဖြစ်လေ့ရှိပါတယ်။ ပျို့အန်တာ၊ ဝမ်းသွားတာ၊ ကြီးထွားမှုနှုန်း နည်းတာနဲ့ မွေးပြီးရက် အနည်းငယ်အတွင်း အသားဝါပြီး လာလေ့ရှိပါတယ်။ ဒီလိုကလေးတွေမှာ ရိုးရိုးနို့ တိုက်လို့မရတတ်ပါဘူး။ Galactose မပါဝင်တဲ့ အထူးနို့တစ်မျိုးကိုသာ တိုက်ရပါမယ်။

Dr. Mya Phoo Ngon (www.drmyanmar.com)