မေမေနဲ့ ဘေဘီလေးတို့ သံယောဇဉ်ကြိုး ချည်နှောင်ခြင်း

၉ လတိတိ စောင့်စားမျှော်လင့်ခဲ့ရပြီးနောက်မှာ ကလေးလေး တကယ်မွေးဖွားမြင်လာပြီ ဆိုပါတော့။ မိဘတွေအနေနဲ့ အသစ်စက်စက် ဖွားမြင်လာတဲ့ကလေးလေးကို အကြောင်းသေချာသိဖို့ အချိန်ယူရသလို ကလေးလေးအနေနဲ့လည်း ပတ်ဝန်းကျင် လူ့လောကအသစ်မှာ အကျွမ်းဝင်နိုင်ဖို့ အချိန်ယူရပါတယ်။
ကလေးလေးကို တကယ်သိအောင် ကြိုးစားရတဲ့အချိန်ဟာ စိတ်ဝင်စားဖို့ကောင်းသလို ရိုးရှင်းတဲ့အချိန်ကလေးလည်း ဖြစ်ပါတယ်။ Bonding လို့ခေါ်တဲ့ တစ်သက်တာသံယောဇဉ်ကြိုးကို ချည်နှောင်တဲ့အချိန်ဆိုလည်း မမှားပါဘူး။ ဒီလိုသံယောဇဉ်ကြိုး ချည်နှောင်တာဟာ သဘာဝဖြစ်စဉ်တစ်ရပ်ဖြစ်ပေမယ့် တစ်ခါတလေ အားစိုက်ထုတ်ဖို့ လိုတတ်ပါတယ်။ ဒီဖြစ်စဉ်ကို ပိုမိုမြန်ဆန်စေဖို့ ကလေးမွေးပြီးချိန်မှာ ကလေးနဲ့ တစ်ခန်းထဲအတူနေတာ၊ ကလေးကို နှိပ်နယ်ပေးတာ စတဲ့ နည်းလမ်းတွေကို သုံးပေးနိုင်ပါတယ်။

>>  သံယောဇဉ်ကြိုး ချည်နှောင်ခြင်း
သန္ဓေသားကလေး တည်နေပြီဆိုတာနဲ့ တချို့မိဘတွေမှာ ဒီစိတ်ကလေး ဖြစ်တည်လာပါပြီ။ ကလေးနဲ့ နီးနီးကပ်ကပ်နေထိုင်ခြင်း၊ နားလည်ခြင်း၊ ကလေးကို ပြုစုစောင့်ရှောက်ခြင်းစသဖြင့် လုပ်ရင်းကိုင်ရင်း ကလေးနဲ့ ရင်းနှီးချစ်ခင်ခြင်းတွေဟာ တဖြည်းဖြည်း တိုးတိုးလာပါတယ်။
အရင်တုန်းကတော့ ကလေးမွေးပြီးနောက် ကလေးကို မိခင်လက်ထဲထည့်၊ ကလေးနဲ့အမေနဲ့ မျက်လုံးချင်း ဆုံလိုက်တာနဲ့တင် ဒီလိုသံယောဇဉ်ကြိုးက ချည်နှောင်လာတယ်လို့ ထင်ကြပါတယ်။ ဒါပေမဲ့ တကယ်တမ်းတော့ သံယောဇဉ်ကြိုးချည်နှောင်တာဟာ ဖြစ်ရပ်တစ်ခုတည်းမဟုတ်ဘဲ ဖြစ်စဉ်အစဉ်လိုက် တည်ရှိနေတဲ့ အရာတစ်ခုပါပဲ။ အာထရာစောင်းကို ပိုမိုအသုံးပြုလာကြတာနဲ့အမျှ မိဘတွေဟာ ဗိုက်ထဲက ကလေးလေးကို စောစောစီးစီး မြင်နိုင်နေပါပြီ။ ဒါဟာ ကိုယ်ဝန်ဆောင်စဉ် အချိန်ကတည်းကပင် ကလေးနဲ့ သံယောဇဉ်နှောင်ဖွဲ့စေပါတယ်။ ဗိုက်ထဲက ကလေးလေး ကန်တာ၊ လှုပ်တာတွေကလည်း မေမေ ဖေဖေတို့ကို မမြင်ရသေးခင်ကတည်းက ချစ်ခင်စေတဲ့ အချက်လေးတွေပါပဲ။ ဒီလိုနှောင်ကြိုးဟာ ကလေးလေး မွေးလာပြီးနောက် ကလေးလေးနဲ့ အချိန်တွေ ကုန်ဆုံးလာတာနဲ့အမျှ တိုးပွားလာပါတယ်။ အကယ်၍ ကလေးက အထူးဂရုစိုက်ဖို့လိုလို့ မိခင်နဲ့ ခွဲနေရတယ်ဆိုရင်တောင် နှောင်ကြိုးက လွတ်မသွားပါဘူး။