ရင်သွေးလေးတွေ ချောင်းဆိုးတဲ့အခါ မေမေတို့ ဘယ်လိုပြုစုကြမလဲ

>>  ချောင်းဆိုးစဉ် အသံတရွီရွီထွက်ခြင်း
●  ကလေးချောင်းဆိုးပြီးတိုင်းမှာ လေချွန်သံကဲ့သို့ တရွီရွီအသံများ ထွက်ပေါ်ခြင်းဟာ အဆုတ်တွင်းရှိ လေပြွန်ငယ်လေးများ ရောင်ရမ်းခြင်းကြောင့် ဖြစ်ပေါ်တတ်ပါတယ်။
●  RSV ဗိုင်းရပ်စ်လို့ခေါ်တဲ့ အသက်ရှူလမ်းကြောင်းထိခိုက်စေသော ဗိုင်းရပ်စ်တစ်မျိုးကြောင့် ဖြစ်တတ်ပြီး ချောင်းဆိုးခြင်းနှင့်အတူ၊ ဖျားခြင်း၊ အန်ခြင်း၊ အသက်ရှူမြန်ခြင်း၊ အသက်ရှူတိုင်း တရွီရွီအသံများထွက်ခြင်းတို့ ဖြစ်ပေါ်နိုင်ပါတယ်။
●  ကလေးကို ရေနှင့်အရည်ဓာတ်များများတိုက်ခြင်း၊ ကြက်စွပ်ပြုတ်ပူပူလေးတိုက်ခြင်းတို့ ပြုလုပ်သင့်ပါတယ်။
●  နှာပိတ်ခြင်းအတွက် ဆားရည်ကို ပြွန်လေးနှင့် နှာခေါင်းအတွင်း ညှစ်ထည့်ပေးနိုင်ပါတယ်။
●  ကလေးဟာ အဖျားကြီးခြင်း၊ အသက်ရှူကြပ်ခြင်း၊ နှုတ်ခမ်းများပြာခြင်း၊ ရေဓာတ်ခန်းခြောက်သော လက္ခဏာများဖြစ်တဲ့ မျက်လုံးများချိုင့်ဝင်ခြင်း၊ ဆီးနည်းခြင်း၊ မျက်ရည်မထွက်ခြင်း၊ နှုတ်ခမ်းများကွဲခြင်း စတာတွေ ဖြစ်ပေါ်ပါက ဆရာဝန်နှင့် အမြန်ဆုံးပြသရပါမယ်။

>>  အဆက်မပြတ် ချောင်းဆိုးခြင်း
●  နေ့ညမပြတ် ချောင်းဆိုးခြင်း၊ အသံတရွီရွီဖြစ်ပေါ်ခြင်းတွေ ရှိသော်လည်း ဖျားခြင်း၊ နှာစေးခြင်းမရှိပါက ပန်းနာရင်ကြပ်ရောဂါကြောင့် ဖြစ်လေ့ရှိပါတယ်။
●  ပန်းနာရင်ကြပ်ရောဂါဟာ နာတာရှည်အဆုတ်ရောဂါတစ်ခုဖြစ်ပြီး အဆုတ်တွင်းလေအိတ်များတွင် အချွဲများပိတ်နေသော အခြေအနေတစ်ခု ဖြစ်ပါတယ်။
●  ရင်သွေးလေးတွေမှာ ပန်းနာရင်ကြပ်ရှိနေပြီဆိုရင် ဆရာဝန်နှင့် စနစ်တကျ ကုသမှုခံယူဖို့ လိုပါတယ်။
●  ရေဓာတ်ပြည့်ဝအောင်တိုက်ကျွေးခြင်း၊ နွေးထွေးစွာထားခြင်း၊ အနံ့ပြင်းသောအရာများ မီးခိုးငွေ့များနှင့် ဝေးဝေးထားခြင်း၊ အချိုနှင့် ရေခဲပါသော အစားအသောက်များကို တတ်နိုင်သမျှ မကျွေးခြင်း၊ အိမ်မွေးတိရစ္ဆာန်များနှင့် ဝေးဝေးထားခြင်းတို့ကို ပြုလုပ်သင့်ပါတယ်။