စိတ်ဖိစီးမှုကြောင့် ခေါင်းကိုက်တဲ့အခါ ကော်ဖီသောက်ရင် ပိုဆိုးသလား

(Unicode)

    ခေါင်းကိုက်လာပြီဆိုရင် ကိုယ်ခံစားနေရတဲ့ဝေဒနာကိုပဲ အဓိကစဉ်းစားမိကြပါတယ်။ အကြောင်းအမျိုးမျိုးကြောင့် ခေါင်းကိုက်တဲ့ဝေဒနာအမျိုးမျိုးရှိပြီးတော့ လက္ခဏာတွေလည်း မတူကြဘူးဆိုတာကို သိပ်ပြီးမတွေးမိကြပါဘူး။ ခေါင်းကိုက်ဝေဒနာက အမျိုးမျိုး ရှိပါတယ်။ ဒီထဲမှာမှ Tension Headache လို့ခေါ်တဲ့ ခေါင်းကြီး တင်းပြီးကိုက်တာလည်း တစ်ခုအပါအဝင်ပါပဲ။ ဒါက ခေါင်းကိုက်တာတွေထဲမှာ အဖြစ်များဆုံး အမျိုးအစားလို့လည်း ပြောလို့ရပါတယ်။

>>    Tension Headache ဆိုတာ ဘာလဲ?
    ပခုံးတွေ၊ လည်ပင်း၊ ဉီးရေပြားနဲ့ မေးရိုးတွေက ကြွက်သားတွေ အရမ်းတင်းလာတာကြောင့် Tension Headache ရနိုင်ပါတယ်။ ဒါ့အပြင် စိတ်ဖိစီးမှု၊ စိတ်ကျခြင်းနဲ့ စိုးရိမ်ပူပန်မှုတွေ ကြောင့်လည်း တစ်စိတ်တစ်ပိုင်း ပါဝင်ပါတယ်။ အထူးသဖြင့်တော့ အိပ်ရေးမဝတဲ့အခါတွေ၊ အစားအသောက်နပ်မမှန်တဲ့အခါ၊ အရက် အမြဲသောက်တဲ့အခါတွေမှာ ဖြစ်တာများပါတယ်။ အိပ်ရင် သွားကြိတ်၊ အံကြိတ်မိတာနဲ့ ခေါင်းကိုပုံစံတစ်မျိုးတည်းနဲ့ အကြာကြီး နေမိတာတွေကလည်း Tension Headache ရစေတဲ့အချက်တွေပါပဲ။ ကွန်ပျူတာတွေ၊ မိုက်ခရိုစကုတ်တွေနဲ့ အလုပ်လုပ်ရတဲ့သူတွေ၊ အိပ်တဲ့အခါမှာ ပုံစံမမှန်တဲ့သူတွေမှာ ခေါင်းကိုက်တတ်ပါတယ်။ Tension Headache က ခေါင်းနှစ်ဖက်လုံးမှာ ကိုက်တာဖြစ်ပြီးတော့ ခေါင်းနောက်ကနေစပြီးတော့ အရှေ့ကို ပြန့်သွားတတ်ပါတယ်။ လည်ပင်း၊ ပခုံးနဲ့ မေးရိုးကြွက်သားတွေ နာနေတာကိုလည်း ခံစားရတတ်ပါတယ်။

>>    ကဖင်းဓာတ်နဲ့ ခေါင်းကိုက်တာ ဘယ်လိုဆက်စပ်နေလဲ?
    ကဖင်းဓာတ်ကြောင့် ခေါင်းကိုက်အမျိုးအစားအားလုံးရဲ့ အကြိမ်ရေကို တက်စေတာကို တွေ့ရှိရပါတယ်။
    ပြောရမယ်ဆိုရင် ခေါင်းကိုက်ရင် ကော်ဖီလေးသောက်လိုက်မှ သက်သာသွားတာမျိုးလည်းရှိတော့ ကဖင်းဓာတ်က ခေါင်းကိုက်တာအတွက် ကောင်းတာလား? မကောင်းဘူးလားလို့ မေးစရာရှိပါတယ်။ အဖြေကတော့ ကဖင်းဓာတ်ရဲ့ အလုပ်လုပ်ပုံနဲ့ စွဲစေတဲ့ဂုဏ်သတ္တိရှိတာဆိုတဲ့ ၂ ချက်ပေါ်မှာ အခြေခံပါတယ်။
    ကဖင်းကို တချို့အကိုက်အခဲပျောက်ဆေးတွေမှာ ပိုထိရောက်မှုရှိစေဖို့ ထည့်သုံးပါတယ်။ ကဖင်းက ဆေးတွေရဲ့စုပ်ယူမှုကို အားကောင်းစေပြီးတော့ မြန်မြန်ဆေးအာနိသင်ပြစေတယ်လို့လည်း ဆိုပါတယ်။ ဒါပေမဲ့ ကဖင်းက စွဲလမ်းစေတဲ့အတွက် ကော်ဖီ၊ လက်ဖက်ရည်၊ ဆိုဒါ၊ ချောကလက်၊ ကဖင်းပါတဲ့ဆေးတွေကို ပုံမှန်အမြဲသောက်တဲ့သူတွေမှာ ဒါတွေ ဖြတ်လိုက်တဲ့အခါမှာ ဖြတ်လိုက်တဲ့အတွက် ခေါင်းကိုက်တာ အပါအဝင် တခြားလက္ခဏာတွေကို ဖြစ်လာစေပါတယ်။

>>    ဘာတွေကို ထည့်စဉ်းစားသင့်လဲ?
    Tension Headache ခံစားနေရရင် ဆေးသောက်တာအပြင် ကိုယ့်ရဲ့အလုပ်အခြေအနေ၊ ညအိပ်ရင်သုံးတဲ့ ခေါင်းအုံးနဲ့ စိတ်ဖိစီးမှုတွေ ဘယ်လောက်ခံစားနေရလဲဆိုတဲ့ အချက်တွေကို ထည့်သွင်းစဉ်းစားဖို့ လိုပါတယ်။ ပြီးတော့ ကော်ဖီ၊ လက်ဖက်ရည်အပါအဝင် ကဖင်းပါတဲ့အရာတွေကို ဖြတ်ချင်တယ်ဆိုရင် ချက်ချင်း တန်းရပ်ပစ်လိုက်တာမျိုးမလုပ်ဘဲနဲ့ ဖြည်းဖြည်းချင်းဖြတ်ပါ။ ခေါင်းကိုက်တာက ခဏခဏ ဖြစ်လာပြီးတော့ ပိုဆိုးလာတယ်ဆိုရင်တော့ ဆရာဝန်ပြပြီး ကုသဖို့လိုပါတယ်။

Dr. Mya Myo Myo Swe (www.drmyanmar.com)