သံဓာတ်ချို့တဲ့ခြင်းကြောင့် သွေးအားနည်းနေပြီလို့ သေချာပေါက် ပြောနိုင်တဲ့ လက္ခဏာတွေ

          လစဉ်ဓမ္မတာလာတဲ့ အမျိုးသမီးတွေ အစာအာဟာရ ပြည့်ပြည့်ဝဝ မစားတဲ့ အမျိုးသား အမျိုးသမီးတွေ၊ လိပ်ခေါင်းသွေးကျတာမျိုး ကြုံနေရတဲ့ အမျိုးသားတွေ၊ ကိုယ်ဝန်ဆောင်နဲ့ နို့တိုက်မိခင်တွေမှာ သွေးအားနည်းနေပြီလို့ သေချာပေါက် ပြောနိုင်တဲ့ လက္ခဏာလေးတွေ ရှိပါတယ်။

●        အကြောင်းရင်းမရှိဘဲ နုံးချိနေခြင်း၊ အလကားနေရင်း နုံးနေချိနဲ့နေရင်တော့ သွေးအားမကောင်းတာ သေချာသလောက်ပါပဲ။

●        ရင်တလှပ်လှပ် တုန်မယ်။ မကြာခဏ ရင်ထဲမှာဟာပြီး ရင်တုန်နေတတ်ရင် သွေးအားနည်းနေလို့ပါပဲ။

●        လှုပ်ရှားမှုနည်းနည်းလေးနဲ့ မောနေတတ်မယ်။ သက်လုံမကောင်းတာအပြင် နောက်ကွယ်မှာ သွေးအားနည်းတာ ပါနေတတ်မလား စစ်ဆေးကြည့်သင့်ပါတယ်။

●        ခြေသည်း၊ လက်သည်းတွေ မတောက်ပတော့ဘူး။ ခြောက်သွေ့ ကြွပ်ဆတ်လာမယ်။

●        အသားအရေတွေ ဖျော့တော့နေမယ်၊ ပါးလေးတွေ သွေးရောင်အပြည့်နဲ့ ချစ်စရာကောင်းအောင် ရဲမနေတော့ဘူး။ အသားအရေတွေ မစိုပြေဘဲ မွဲခြောက်နေမယ်။

●        မကြာခဏ မူးတတ်မယ်။ စိတ်ဖိစီးမှုများတဲ့အခါ မူးဝေလာတတ်တာ၊ ပင်ပန်းတဲ့အခါ မူးသွားတာတွေထက် ဘာအကြောင်းမှမရှိဘဲ ခေါင်းထဲမှာ တရိပ်ရိပ် မူးနေတတ်ပါတယ်။

●        မကြာခဏ ညောင်းနေမယ်။ ညောင်းကိုက်တာက အအေးမိလို့လား လိုတာထက် ပင်ပန်းခံခဲ့မိလို့လား ဆိုတာတွေထက် ကာလရှည်ကြာ ကိုက်နေ၊ ညောင်းနေ ခြေတွေ လက်တွေ မသယ်ချင်၊ မလှုပ်ချင် ဖြစ်နေတတ်သူတွေအဖို့ သွေးအားနည်းနေတတ်သလား စဉ်းစားဖို့ပါ။

>>    သံဓာတ်ချို့တဲ့ သွေးအားနည်းရောဂါ ဖြစ်နိုင်သူတွေကတော့ ...

●        အစာအာဟာရ ပြည့်ပြည့်ဝဝ မစားသူတွေ

●        ဗီတာမင်စီဓာတ် ချို့တဲ့သူတွေ

●        သက်သတ်လွတ် စားသူတွေ

●        ပိန်ပါးသူတွေ

●        ရာသီသွေးဆင်းများသူ အမျိုးသမီးတွေ

●        ကလေးမွေးပြီးကာစ မိခင်တွေ

●        လိပ်ခေါင်းရောဂါ ခံစားနေရသူတွေ

●        အစာအိမ်ရောဂါ၊ အူရောဂါတစ်ခုခုကြောင့် ခွဲစိတ်ကုသမှု ခံယူထားသူတွေ ဖြစ်ပါတယ်။

          ဒီလိုလူတွေ သံဓာတ်ချို့တဲ့ သွေးအားနည်းရောဂါ ဖြစ်ပွားနိုင်တာကြောင့် ဖော်ပြပါ လက္ခဏာတွေပါ တစ်ပါတည်း ခံစားနေခဲ့ရမယ်ဆိုရင် သွေးအား စစ်ဆေးပြီး အာဟာရ ပြည့်ပြည့်ဝဝ စားသုံးပေးပြီး သွေးအား ဖြည့်စွက်စာ၊ သံဓာတ်အားဆေးတွေ မှီဝဲဖို့ လိုအပ်ပါကြောင်း အသိပေးလိုက်တယ်နော်။

ဂျီပီငှက် (ဆေး/မန်း) (www.drmyanmar.com)