ကလေးများနှင့် သွားပိုးစားခြင်း

>>  သွားပိုးစားတယ်ဆိုတာ ဘာလဲ?
သွားပိုးစားတယ်ဆိုတာ သွားကြွေလွှာပျက်စီးသွားတာ ဒါမှမဟုတ် ဖျက်ဆီးခံလိုက်ရတာ ဖြစ်ပါတယ်။ သွားကြွေလွှာဆိုတာ သွားကို အပေါ်ကနေ ဖုံးအုပ်ထားတဲ့ အလွှာမာပါးပါးလေးပါ။ ဒီလိုသွားပိုးစားခြင်းက သွားပိုးပေါက်တွေကို ဖြစ်စေနိုင်ပါတယ်။

>>  ဘယ်အရာတွေက ကလေးတွေမှာ သွားပိုးစားခြင်းကို ဖြစ်စေသလဲ?
သွားပိုးစားတာဟာ ဘက်တီးရီးယားပိုးတွေနဲ့ အခြားသောအရာတွေကြောင့် ဖြစ်တတ်ပါတယ်။ ကာဗွန်ဟိုက်ဒရိတ်ပါတဲ့ အစာတွေ သွားမှာကျန်နေတဲ့အခါ သွားပိုးစားတတ်ပါတယ်။ နို့၊ ဆိုဒါ၊ သကြားလုံး၊ ကိတ်မုန့်၊ သစ်သီးဖျော်ရည်တွေ၊ ပေါင်မုန့် စတာတွေဟာ ကာဗွန်ဟိုက်ဒရိတ်ပါတဲ့ အစားအစာတွေပါပဲ။ ပါးစပ်ထဲမှာ ပုံမှန်ရှိတဲ့ ဘက်တီးရီးယားပိုးတွေက ဒီအစာတွေကို အက်စစ်ဖြစ်အောင် ပြောင်းလဲလိုက်ပါတယ်။ အဲ့အခါမှာ ပိုးမွှားရယ်၊ အစာရယ်၊ အက်စစ်ရယ်၊ တံတွေးရယ် ပေါင်းစပ်သွားပြီး အစာဖတ် ဖြစ်သွားပါတယ်။ အဲ့အစာဖတ်က သွားမှာ ကပ်နေတတ်ပါတယ်။ အချိန်တွေကြာလာတဲ့အခါ ပိုးမွှားတွေက ပြုလုပ်လိုက်တဲ့ အက်စစ်က သွားရဲ့ကြွေလွှာတွေကို တိုက်စားပြီး သွားပိုးပေါက်တွေ ဖြစ်စေပါတယ်။

>>  ဘယ်လိုကလေးမျိုးက သွားပိုးစားဖို့ အလားအလာရှိလဲ?
ကလေးတိုင်းရဲ့ပါးစပ်မှာ ဘက်တီးရီးယားပိုးမွှားတွေ ရှိပါတယ်။ အဲ့တော့ ကလေးတိုင်းမှာ သွားပိုးစားနိုင်ခြေ ရှိပါတယ်။ အောက်ပါအချက်တွေကတော့ ကလေးတစ်ယောက်ရဲ့ သွားပိုးစားနိုင်ခြေကို ပိုမိုမြင့်တက်စေပါတယ်။
●  သွားပိုးပေါက်ဖြစ်စေတဲ့ ဘက်တီးရီးယားပမာဏ မြင့်မားနေခြင်း
●  သကြားဓာတ်နှင့် ကစီဓာတ်များသော အစားများစားခြင်း
●  ဖလိုရိုက်နည်းသော ဒါမှမဟုတ် မပါဝင်သောရေကို အသုံးပြုရခြင်း
●  ပါးစပ်သန့်ရှင်းမှုနည်းပါးခြင်း
●  သာမန်ထက် တံတွေးထွက်တာ နည်းနေခြင်း တို့ကြောင့် သွားပိုးစားနိုင်ခြေ ပိုမိုများစေနိုင်ပါတယ်။