မီးတွင်းကာလ ခေါင်းကိုက်ခြင်းများ

>>  ဘာကြောင့်ခေါင်းကိုက်ရသလဲ?
လေ့လာမှုတစ်ခုမှာ မီးတွင်းကာလ ခေါင်းကိုက်သူအမျိုးသမီး ၉၅ ဦးကို လေ့လာခဲ့ပါတယ်။ ဒီအမျိုးသမီးတွေဟာ အရင်က လေဖြတ်တာ၊ တက်တာ ဘာညာမရှိဖူးခဲ့သူတွေပါ။ မီးတွင်းကာလဆိုတဲ့ အပိုင်းအခြားကတော့ ကလေးမွေးပြီး ၂၄ နာရီကနေ ၄၂ ရက်အတွင်းကို ယူဆပါတယ်။

လေ့လာမှုအရ ၅၀% သော ခေါင်းကိုက်ခြင်းတွေဟာ ခေါင်းတစ်ခြမ်းကိုက်တာသော်လည်းကောင်း၊ ဖိစီးမှုကြောင့် ခေါင်းကိုက်တာသော်လည်းကောင်း ဖြစ်တတ်ပါတယ်။ ၂၄% ကတော့ ကိုယ်ဝန်ဆိပ်တက်ခြင်းကြောင့် ကိုက်တာဖြစ်ပြီး ၁၆% ကတော့ ခါးဆစ်ရိုးထုံဆေးကြောင့်ကိုက်တာ ဖြစ်ပါတယ်။ နောက်ထပ် ၁၀% မှာဆိုရင် ဦးနှောက်ထဲ သွေးယိုတာနဲ့ လေဖြတ်တာ စသဖြင့် ဆိုးဆိုးရွားရွား ဦးနှောက်ထိခိုက်သူတွေ ရှိတတ်ပါတယ်။

ခေါင်းတစ်ခြမ်းကိုက်ခြင်းဟာ ခေါင်းတစ်ဘက်ခြမ်းမှာပဲ တစ်ဆစ်ဆစ်ထိုးကိုက်ပြီး ပျို့တာ၊ အန်တာ၊  အလင်းတွေ အသံတွေကို မခံနိုင်တာတွေ ရှိတတ်ပါတယ်။ ဖိစီးမှုကြောင့် ခေါင်းကိုက်တာကျတော့ ခေါင်းနှစ်ခြမ်းလုံးမှာ ဖိညပ်ပြီးတော့ တင်းတင်းကြီး ကိုက်နေတာမျိုး ဖြစ်ပါတယ်။

ခေါင်းတစ်ခြမ်းကိုက်ခြင်းဟာ ဖိစီးမှုကြောင့် ခေါင်းကိုက်ခြင်းထက် ပိုပြီးတော့ ခံရတတ်ပါတယ်။ မီးတွင်းကာလ ခေါင်းတစ်ခြမ်းကိုက်သူ အမျိုးသမီးတွေဟာ အရင်ကလည်း ကိုက်ဖူးသူဖြစ်နိုင်သလို ဟော်မုန်းအပြောင်းအလဲကြောင့် အခုမှစဖြစ်တာမျိုးလည်း ဖြစ်နိုင်ပါတယ်။