ရာသီသွေးက ပြောပြနေတဲ့ ကျန်းမာရေးအခြေအနေ

အမျိုးသမီးတို့အတွက် ရာသီလာစဉ် တွေ့မြင်ရသောသွေးဟာ လက်ကိုဓားရှရာကနေ ထွက်လာသောသွေးနှင့် မတူညီပဲကွဲပြားပါတယ်။
ရာသီသွေးမှာ သွေးအပြင် သားအိမ်နံရံရှိ အသားစလေးတွေပါ ရောစပ်ပါဝင်နေပြီး ရာသီသွေးအရောင်ဟာ အကြောင်းအမျိုးမျိုးကြောင့် တစ်လနှင့်တစ်လ တူညီခြင်းမရှိသလို ရာသီစက်ဝန်းတစ်ခုတည်းမှာတောင်မှာ တစ်ရက်နှင့်တစ်ရက် အရောင်မတူညီနိုင်ပါဘူး။ ဒီဆောင်းပါးလေးမှာတော့ ရာသီသွေးအရောင်အမျိုးမျိုးနှင့်တကွ နောက်ခံအကြောင်းရင်းတွေကိုပါ စုစည်းတင်ပြပေးလိုက်ပါတယ်နော်။

●  အနီရဲရဲ
ဒီသွေးအရောင်ဟာ သားအိမ်ဝကနေ မိန်းမကိုယ်ဆီသို့ နောက်ဆုံးစွန့်ထုတ်လိုက်တဲ့ လတ်ဆတ်သောသွေးတွေ ဖြစ်ပါတယ်။ ဒီလိုအနီတောက်တောက်သွေးတွေကို ရာသီစက်ဝန်းအစမှာ တွေ့ရတတ်ပါတယ်။ ရာသီကြောင့် နာကျင်ကိုက်ခဲမှုတွေ ဖြစ်ပေါ်တဲ့အခါမှာလည်း အနီရောင်တောက်တောက်သွေးတွေ အများကြီး စီးဆင်းတတ်ပါတယ်။

●  နီညိုရောင်
နီညိုနှင့်အညိုရင့်ရောင်သွေးတွေဟာ အတန်ငယ် ဟောင်းနွမ်းနေသောသွေးများဖြစ်ပြီး ရာသီစက်ဝန်း အဆုံးလောက်မှာ တွေ့ရတတ်ပါတယ်။ ဒါဟာ ဘာကြောင့်လဲဆိုရင် သားအိမ်ရဲ့အတွင်းဘက်နေရာတွေကနေ ပိုမိုသက်တမ်းရင့်သော သွေးတွေထွက်လာရခြင်းကြောင့် ဖြစ်ပါတယ်။