ကိုယ်၀န်ဆောင်ချိန်မှာ ခင်ပွန်းတွေနားလည်လက်ခံပေးရမယ့် အကြောင်းအရာများ

            ဇနီးသည်ကိုဗိုက်ကြီးနေတာပဲလေဆိုပြီး အိမ်မှာမထားခဲ့ပါနဲ့။ ခေါ်လို့်ရမယ့်နေရာအကုန်ခေါ်သွားပါ။ ဖေးဖေးမမဆက်ဆံပါ။ ရံဖန်ရံခါ သူမကိုယ်စား ဟင်းချက်ပေးပါ။ အလေးအပင်မမဖို့ ခဏခဏသတိပေးပါ။လင်မယားအတူနေလို့်ရပါတယ်…သူမက အတူနေဖို့လက်မခံရင်တောင် ထွေးထွေးပွေ့ပွေ့တယုတယလေးဖက်ပေးပါ။ စိတ်မာပါတယ်။ သိပ်ကြမ်းခံပါတယ်ဆိုတဲ့မိန်းမတွေတောင် ကိုယ်ဝန်သည်ဘဝမှာ ယုံကြည်မှုပျောက်ဆုံးပြီး အယုအယခံချင်လာကြပါတယ်။

            ကိုယ့်မိန်းမကို မကြာခဏဒိတ်လုပ်ပါ။ အအေးဆိုင်ကောင်းကောင်းမှာ ထိုင်တာမျိုး…မြစ်ဆိပ်မှာလေညှင်းခံတာမျိုး ညစာကို ရိုမက်တစ်ဟော်တယ်လေးတစ်ခုမှာဆုံပြီး စားတာမျိူး လုပ်ပေးရင် ကိုယ်ဝန်ဆောင်လေးအနေနဲ့ သိပ်ဝမ်းသာနေမှာပါ။

            ဗိုက်ဖုံးလှလှလေးဝတ်ထားတဲ့ကိုယ်ဝန်ဆောင်လေးနဲ့တွဲပြီး အလှဓာတ်ပုံလေးတွေ ခေတ်မှီမှီရိုက်လိုက်ပါဦး။ ဖုန်းလေးနဲ့ဖြစ်ဖြစ် ဝတ်ကောင်းစားလှဝတ်ပြီး နှစ်ယောက်သား အမှတ်တရဓာတ်ပုံရိုက်ပါ။ ပုံထုတ်ပြီး ဘောင်လှလှလေးတပ် ဧည့်ခန်းမှာထောင်ထားပါ။ Social Media မှာ သူငယ်ချင်းတွေနဲ့ မျှဝေလိုက်ပါ။ အများကြီးအမှတ်တရဖြစ်တာပေါ့။

            တကယ်တော့ အပေါ်မှာပြောထားသမျှဟာ ဆင်းရဲချမ်းသာမရွေးလုပ်နိုင်ကြတဲ့ အသေးအဖွဲလေးတွေပါ။ ငါကတော့အလုပ်လုပ်နေရလို့၊ ငွေရှာနေရလို့ မေမေလောင်းလျာလေးတွေကို ဂရုမစိုက်နိုင်တာဆိုတာမျိုးတော့ မဖြစ်သင့်ပါဘူး။ အလုပ်ဆိုတာ သေသည်ထိလုပ်ရမှာပါ။ ကိုယ်ဝန်ဆောင်ဘဝဟာ တကယ်တော့ ထင်မထားလောက်အောင် သိပ်ခက်ခဲပါတယ်။ အကြင်နာအယုယလေးတွေပေးနိုင်သလောက် အချိန်ပေးပြီးလုပ်ပေးရင် မိခင်လောင်းရဲ့ကျန်းမာရေးသိပ်ကောင်းလာတတ်ပါတယ်။ ရွှင်လန်းပြီး ကျေနပ်နှစ်သိမ့်တဲ့ စိတ်က ရုပ်ကိုပြုပြင်သွားတာဖြစ်ပါတယ်။

            ဒါ့ကြောင့် ခင်ပွန်းယောကျာ်းတွေအနေနဲ့. နားလည်ရခက်လေခြင်းလို့ အပြစ်တင်ခေါင်းကုတ်စိတ်ပျက်နေမယ့်အစား ဟော်မုန်းသဘောတရားနဲ့ ခန္ဓာကိုယ်အပြောင်းအလဲအရ ကိုယ်ဝန်ဆောင်စဉ်ဖြစ်တာတာလေးတွေကို ဂရုစိုက်နားလည်ပေးပြီး မိခင်လောင်းလေးတွေကို စောင့်ရှောက်ကြင်နာပေးကြပါစို့။

ဂျီပီငှက် ( ဆေး/ မန််း) (www.drmyanmar.com)