ခြေထောက်သွေးပြန်ကြောအားနည်းလို့ ခြေထောက်သွေးကြောထုံးတာဟာ အလှပျက်ရုံလောက်ပဲ ဆိုးကျိုးရှိတာလား

>>  ဘာနောက်ဆက်တွဲဆိုးကျိုးတွေ ဖြစ်နိုင်သလဲ?
ကုသမှုမခံယူခဲ့ရင် သွေးကြောထုံးရာကနေ အနာဖြစ်ခြင်း၊ သွေးထွက်ခြင်း စတာတွေ ဖြစ်လာနိုင်ပါတယ်။ သွေးကြောထုံးထဲကသွေးတွေက မစီးဆင်းဘဲအိုင်နေတာကြောင့် အချိန်ကြာလာတဲ့အခါ သွေးခဲဖြစ်လာနိုင်ပါတယ်။ သွေးခဲကြောင့် ခြေထောက်မှာရှိတဲ့  အပေါ်ယံသွေးပြန်ကြောတွေ ရောင်ရမ်းလာပြီး နာကျင်မှုကို ခံစားရမှာပါ။ ခြေထောက်သွေးကြောထုံးတဲ့သူတွေဟာ ခြေထောက် အပေါ်ယံသွေးပြန်ကြောမှာသာမက အတွင်းနက်နက် သွေးပြန်ကြောမှာလည်း သွေးခဲဖြစ်ပေါ်နိုင်ချေ ရှိပါတယ်။ အတွင်းနက်နက်သွေးပြန်ကြောမှာ သွေးခဲဖြစ်ပြီဆိုရင်တော့ သွေးခဲပြုတ်ထွက်ပြီး အဆုတ်သွေးကြောကို သွားပိတ်နိုင်တာကြောင့် အချိန်မရွေး အသက်အန္တရာယ် ရှိနိုင်ပါတယ်။

>>  ဘယ်အချိန်မှာ ဆရာဝန်နဲ့ ပြသင့်သလဲ?
ခြေထောက်သွေးကြောထုံးတာပဲရှိပြီး ကျန်တဲ့ဘာလက္ခဏာမှ မခံစားရဘူးဆိုရင်တောင် စမ်းသပ်စစ်ဆေးဖို့အတွက် ဆရာဝန်နဲ့ ပြသသင့်ပါတယ်။ အကယ်၍ သွေးကြောထုံးတာတစ်ခုတည်း မဟုတ်တော့ဘဲ သွေးထွက်ခြင်း၊ အပေါ်ယံအရေပြား အရောင်ပြောင်းလာခြင်း၊ အပေါ်ယံအရေပြား နီရဲပြီး ကိုင်ကြည့်တဲ့အခါ ပူနွေးနေခြင်း၊ အထိမခံနိုင်အောင် နာကျင်ခြင်း၊ ခြေထောက်ဖောရောင်လာခြင်းတွေ ရှိလာခဲ့ရင်တော့ ဆရာဝန်နဲ့ အမြန်ဆုံး တိုင်ပင်ဆွေးနွေးသင့်ပါတယ်။

Dr. Aye Hsu Mon (www.drmyanmar.com)