အစာအသောက်စားဖို့ အကောင်းဆုံးအချိန်များ

          ကျန်းမာရေးအတွက် ဘယ်အစားအစာတွေ စားသင့်တယ်ဆိုတာက အရေးကြီးမှန်း သိကြပေမယ့် ဘယ်အချိန် စားရမယ်ဆိုတာကလည်း အစာခြေစနစ် ကောင်းမွန်စေဖို့ များစွာ အထောက်အကူ ပြုပါတယ်။ အချိန်ဇယားနဲ့ စားတယ်ဆိုတာ အနည်းငယ် အစွန်းရောက်တယ် ထင်ရပေမယ့် တကယ်တော့ ကျန်းမာရေးအတွက် ကောင်းကျိုးတွေ အများကြီးပါပဲ။

          ထမင်းစားချိန်၊ သွားရေစာစားချိန်တွေကို သတ်သတ်မှတ်မှတ်ထားခြင်းဟာ အစာခြေစနစ်ကို ပိုမိုကောင်းမွန်စေသော်လည်း အစာမှန်မှန် မစားပါကမူ အစာအိမ်အတွက် ၀န်ပိစေတဲ့အတွက် အစာမကြေ ရင်ပြည့်ရင်ကယ်ဖြစ်ခြင်းတွေကို ဖြစ်စေနိုင်ပါတယ်။

          အဓိကသော့ချက်မှာ အစာကို 3-4 နာရီခြားတစ်ခါ စားပေးခြင်းဖြင့် အစာအိမ်အတွင်းရှိ အစာတွေကို သေချာစွာ ချေဖျက်ဖို့ အချိန်လုံလောက်စွာ ရနိုင်ပါတယ်။ နံနက်စာ၊ နေ့လည်စာ၊ ညစာနဲ့ သွားရေစာစားချိန်တွေကို တိတိကျကျ သတ်မှတ်ထားတဲ့အတွက် ခန္ဓာကိုယ်က အစာစားတော့မယ့်အချိန်ကို သေချာသိနေကာ အလွန်အကျွံ စားသုံးခြင်းကို ဟန့်တားနိုင်တဲ့အပြင် အစာခြေခြင်းဖြစ်စဉ်ကိုလည်း ပိုမိုကောင်းမွန်စေပါတယ်။

          အစာစားဖို့ အကောင်းဆုံးအချိန်တွေကတော့ -

>> နံနက်စာ

          တစ်နေကုန် စားသမျှ အစာတွေထဲမှာ အရေးကြီးဆုံးဖြစ်ပြီး အိပ်ရာနိုးပြီး တစ်နာရီအတွင်း စားသုံးသင့်ပါတယ်။ အကောင်းဆုံးကတော့ နံနက် 7 နာရီမှ 8 နာရီအတွင်းပဲ ဖြစ်ပါတယ်။

          6-8 နာရီခန့် အိပ်စက်ပြီးနောက် အစာအိမ်ထဲမှာ ဘာမျှမရှိတော့တဲ့အပြင် ခန္ဓာကိုယ်ဟာလည်း စွမ်းအင်အတွက် ကယ်လိုရီတွေ လိုအပ်နေပါတယ်။ ဂရုစိုက်ရမှာကတော့ ၎င်းကယ်လိုရီတွေထဲမှာ ပရိုတင်းဓာတ် မြင့်မားစွာ ပါ၀င်၍ သကြားနဲ့ ကစီဓာတ်ပါ၀င်မှုနှုန်း နည်းပါးဖို့ပဲ ဖြစ်ပါတယ်။ ပေါင်မုန့်အချို့ တစ်ခုစားခြင်းဟာ သွေးတွင်းသကြားဓာတ်ကို မြှင့်တင်ပေးနိုင်ပေမယ့်လည်း နေ့လယ်စာစားချိန်မတိုင်မီ ဗိုက်ဆာနိုင်ပါတယ်။ ဒါကြောင့် ကွေကာနဲ့ အသီးအနှံတစ်မျိုးမျိုးဖြစ်စေ၊ ကြက်ဥမွှေကြော်နဲ့ ဟင်းနုနွယ်ဖြစ်စေ၊ ပေါင်မုန့်မီးကင်၊ မြေပဲ၊ ထောပတ်ယိုသုတ်ဖြစ်စေတို့ကို ရွေးချယ်စားသောက်ခြင်းဖြင့် အစာခြေစနစ်အတွက် သင့်တော်တဲ့ အစပျိုးမှုတစ်ခုကို ပြုလုပ်သင့်ပါတယ်။