ကိုယ်ဝန်ဆောင်တဲ့ အသက်အရွယ်

Category

ကိုယ်၀န်ဆောင်နှင့်ကျန်းမာရေး

အမျိုးသမီးအများစုက အသက်၃၀အရွယ်မှာ ပညာတွေစုံ၊ အလုပ်အကိုင်အသင့်အတင့် အောင်မြင်ပြီး စိတတည်ငြိမ်ရင့်ကျက်တဲ့အရွယ်ဖြစ်တဲ့အတွက် မိသားစုတစ်ခုကို ထူထောင်ဖို့ အကောင်းဆုံးသော အချိန်ဖြစ်တယ်လို့ ယူဆကြပါတယ်။ မကောင်းတာကတော့ အသက်၃၀နောက်ပိုင်းရောက်လာလေလေ ကလေးရဖို့ အခွင့်အလမ်းနည်းလာလေလေပဲဖြစ်ပါတယ်။ ဒါကြောင့် အမျိုးသမီးတွေမှာ အသက်၃၀ကျော်လာပြီး ကလေးယူဖို့ အစီအစဉ်ရှိရင် အချိန်မဆွဲပဲ အမြန်ယူကြဖို့ မျိုးဆက်ပွားကျန်းမာရေး ပညာရှင်များက တိုက်တွန်းကြပါတယ်။

ကောင်းကျိုးများ

ကံကောင်းထောက်မစွာပဲ အသက်၃၀ကျော်အရွယ်မှာ အမျိုးသမီးတွေဟာ ကလေးကို ပြုစုပျိုးထောင်ဖို့ လူခွန်အား၊ စိတ်ဓာတ်ခွန်အားတွေ ပြည့်ဝနေကြပါသေးတယ်။ ဒါကြောင့် အသက်၂၀အရွယ်ထက် ကိုယ့်ကိုယ်ကို ယုံကြည်စိတ်ချမှု ပိုသလို အသက်၄၀အရွယ်လောက်လည်း တစ်လမ်းသွား မဖြစ်တတ်ပါဘူး။ အသက်၃၀ ဝန်းကျင်မှာ စိတ်ဓာတ်အရရော စီးပွားရေးအရပါ အဆင်သင့် ဖြစ်နေတဲ့အရွယ်လို့ ဆိုနိုင်ပါတယ်။

ဆိုးကျိုးများ

လေ့လာမှုတွေနဲ့ ကျွမ်းကျင်ပညာရှင်ေတွ အာလုံးက အသက်၃၅အရွယ်ဟာ အမျိုးသမီးတွေအတွက် နောက်ဆုံးကလေးယူသင့်တဲ့အရွယ်လို့ တစ်ပြေးတည်း ဆိုကြပါတယ်။ အသက်၃၀အစပိုင်းမှာ ကလေးရနိုင်ခြေဟာ အသက်၂၀ကျော်အရွယ်နဲ့ သိပ်မကွာသေးပါဘူး။ ကိုယ်ဝန်ပျက်နိုင်ခြေနဲ့ ဒေါင်းရောဂါကလေးငယ်မွေးနိုင်ခြေဟာလည်း အသက်၂၀ကျော်သူတွေထက် အနည်းငယ်သာ များပါတယ်။ ဒါပေမယ့် အသက်၃၅ရောက်လာတဲ့ အခါမှာတော့ ကလေးရနိုင်ခြေ တစ်စထက်တစ်စ လျော့နည်းလာပါတယ်။

ဒီအသက်အရွယ်ဟာ မျိုးရိုးဗီဇရောဂါတွေဖြစ်နိုင်ခြေ အများဆုံးအချိန်လည်းပဲ ဖြစ်နေပါတယ်။ ဒါကြောင့် ကျွမ်းကျင်သူတွေ အသက်၃၅ဝန်းကျင်မိခင်လောင်းတွေကို DNA စစ်ဆေးမှုတွေ၊ ရေမြွှာရေစစ်ဆေးမှုတွေ၊ အချင်းလွှာ စစ်ဆေးမှုစတာတွေလုပ်ကြည့်ဖို့ တိုက်တွန်းလေ့ရှိပါတယ်။

ကိုယ်ဝန်ပျက်ကျနိုင်ခြေနဲ့ အခြားကိုယ်ဝန်ပြဿနာ တွေဟာ အသက်အရွယ်ကြီးလာတာနဲ့အမျှ ပိုပိုတက်လာတတ်ပါတယ်။ ၃၅ နှစ် အမျိုးသမီးတစ်ယောက်မှာ နေရာမှားသနေ္ဓတည်ဖို့ အခွင့်အလမ်း ပိုများပါတယ်။

အသက်၂၀ ကျော်အရွယ်မှာ ဗိုက်ခွဲမွေးရဖို့ အခွင့်အလမ်းမှာ ၃၀%လောက်သာရှိပေမယ့် အသက် ၃၅ ကျော်လာတဲ့အခါ ကလေးရေမွန်းခြင်း၊ ဗိုက်နာချိန်ကြာမြင့်နေခြင်းစတာတွေကြောင့် ဗိုက်ခွဲမွေးရဖို့ အခွင့်အလမ်း လည်း ၄၃%လောက်ထိ ပိုများလာနိုင်ပါတယ်။

ကလေးရနိုင်ခြေ

အသက်၂၉နှစ်မှ၃၅နှစ်အတွင်း ကလေးရနိုင်ခြေကျသွားတယ်ဆိုပေမယ့် ဒီအသက်အရွယ် အမျိုးသမီးအများစုမှာ ကလေးရနိုင်ခြေ ရှိပါသေးတယ်။ ဒါပေမယ့် ၃၈နှစ်၊ ၃၉နှစ်အရွယ်မှာတော့ တော်တော်အခွင့်အလမ်းနည်းနေပြီလို့ ဆိုနိုင်ပါပြီ။

အသက်၃၀ကျော်မှာ သားဥတစ်ခါကြွေတိုင်း ကလေးရနိုင်ခြေ၁၅%ရှိပါတယ်။ တစ်နှစ်အတွင်းမှာ ဆိုရင်တော့ ၇၅%ရှိပါတယ်။ ဒါပေမယ့် အသက်ကြီးလာတာနဲ့အမျှ ကျလာတဲ့အတွက် ၃၀နှောင်းပိုင်းမှာတော့ ၆၅%ခန့်အထိ ကျဆင်းသွားပါတယ်။

ထို့အတူ ကိုယ်ဝန်ပျက်ကျနိုင်စွမ်းဟာလည်း အသက်၃၀ကျော်လာတဲ့အခါ တစ်ဖြည်းဖြည်းနဲ့ တက်တက်လာပါတယ်။ အသက်၃၅နှစ်မှာ ၁၈%သာရှိပေမယ့် အသက်၄၀နားကပ်လာတဲ့အခါ ၃၄%ဖြစ်လာပါတယ်။

အသက်၃၅ကနေ၃၉အရွယ်မှာ ဘာမျိုးဆက်ပွားအထောက်အကူမှမယူပဲ အမြွှာမွေးနိုင်ခြေ ပိုမိုများပြားလာပါတယ်။

ဒါကြောင့် အသက်ကြီးလာတဲ့အမျိုးသမီးတွေမှာ ကလေးရဖို့ အခွင့်အလမ်းပိုများပြီး ရလာတဲ့အခါမှာလည်း အမြွှာမွေးဖို့အခွင့်အလမ်း ပိုများပါတယ်။

Dr. Emerald (www.drmyanmar.com)

BMI တွက်ရန်

ကိုယ်၀န်ပတ်တွက်ရန်

ဆရာဝန်ကြီးများ၏ဆောင်းပါးများ