ခြေသည်း လက်သည်း မှိုစွဲတဲ့အခါ

ခြေသည်းမှိုစွဲတာဟာ ခြေသည်းထိပ်မှာ အဝါရောင်/အဖြူရောင် အစက်လေး စပေါ်လာရာကနေ စပါတယ်။ မှိုက တဖြည်းဖြည်း ဆိုးလာလေ ခြေသည်းတစ်ခုလုံး အရောင်ပြောင်းသွားပြီး ထိပ်တွေမှာ ထူပြီး တွန့်လာပါတယ်။ နည်းနည်းလေးပဲဖြစ်ပြီး ဘာလက္ခဏာမှမပြရင် ကုသဖို့ မလိုပေမယ့် နာတယ်၊ ခြေသည်းတွေ ထူလာတယ်ဆိုရင်တော့ ကုသဖို့လိုပါတယ်။ တစ်ခါဖြစ်ပြီးရင်လည်း ခဏခဏ ဖြစ်တတ်ပါတယ်။

>>  လက္ခဏာတွေကတော့ -
●  ခြေသည်း/ လက်သည်းတွေ ထူလာမယ်
●  အဖြူရောင် / ဝါကျင့်ကျင့်အရောင် ပြောင်းလာမယ်
●  ပုံပျက်လာမယ်
●  မည်းမည်းကြီး ဖြစ်လာမယ် (ခြေသည်းအောက်မှာ စုပုံနေတဲ့ အညစ်အကြေးတွေကြောင့်)
●  အနံဆိုးမယ် စသည်တို့ ဖြစ်ပါတယ်။

>>  ဘယ်အချိန်မှာ ဆရာဝန်ပြရမလဲ?
ခြေသည်း အရောင်ပြောင်းလာမယ်၊ ထူလာမယ်၊ ပုံပျက်လာမယ်၊ ပြီးတော့ သင့်မှာ ဆီးချိုရောဂါရှိတယ်ဆိုရင် စဖြစ်ပြီလို့ ထင်တာနဲ့ ဆရာဝန်နဲ့ ပြသရပါမယ်။

>>  ဘာကြောင့် ဖြစ်ရတာလဲ?
မှိုဖြစ်စေတဲ့အကောင်ကြောင့် ကူးစက်တာကြောင့် ဖြစ်ပါတယ်။
ခြေသည်း / လက်သည်း မှိုစွဲတာက အရွယ်မျိုးစုံမှာ ဖြစ်တတ်ပါတယ်။ အသက်ကြီးတဲ့လူတွေမှာ ပိုဖြစ်တတ်ပါတယ်။ အသက်ကြီးလေ ခြေသည်းတွေက ကျွပ်ဆတ်ပြီး ခြောက်သွေ့လာပါတယ်။ အက်ရာလေးတွေ ဖြစ်လာတဲ့အခါ မှိုပိုးတွေက အဲဒီ့ကြားထဲကို ဝင်ရောက်လာပါတယ်။ ခြေထောက်ကို သွေးစီးဆင်းမှု လျော့နည်းတာ၊ ကိုယ်ခံအားမကောင်းတာတွေကြောင့်လည်း ဖြစ်နိင်ပါတယ်။
တခြားလူကနေတော့ မကူးစက်နိုင်ပါဘူး။ ဒါပေမဲ့ ခြေသည်းတစ်ချောင်းကနေ နောက်တစ်ချောင်းကိုတော့ ကူးစက်နိုင်ပါတယ်။

>>  ပိုဖြစ်စေတဲ့ အကြောင်းအရင်းတွေ
●  အသက်ကြီးတဲ့လူတွေ
●  ချွေးထွက်များတဲ့လူတွေ
●  ခြေထောက်အရေပြား မှိုစွဲတဲ့ရောဂါ ရှိတဲ့လူတွေ
●  စိုစွတ်တဲ့နေရာတွေ၊ ရေကူးကန်၊ gyms စတဲ့ နေရာတွေမှာ ခြေဗလာနဲ့ သွားလေ့ရှိသူတွေ
●  ခြေသည်း၊ အရေပြားမှာ ထိခိုက်ရှနာ ရှိတဲ့လူတွေ
●  ဆီးချိုရှိသူတွေ၊ သွေးလည်ပတ်မှုဆိုင်ရာ ရောဂါရှိသူတွေ၊ ခုခံအားကျဆင်းနေတဲ့သူတွေ စသူတို့မှာ အဖြစ်များပါတယ်။

>>  နောက်ဆက်တွဲ ပြဿနာတွေကတော့ -
●  နာကျင်တာ
●  ခြေသည်း တစ်သက်လုံး ပျက်စီးသွားစေတာ
●  နဂို ကိုယ်ခံအားနည်းရင် ခြေထောက်ကနေ တခြားနေရာတွေကိုပါ ပျံနှံ့သွားစေတာ စသည်တို့ ဖြစ်ပါတယ်။

>>  ဘယ်လိုကာကွယ်ကြမလဲ?
●  လက်နဲ့ ခြေထောက်ကို မှန်မှန်ဆေးပါ။ ဆေးပြီးရင် ခြေသည်းတွေ အစိုဓာတ်ရအောင် တစ်ခုခု လိမ်းပါ။
●  ခြေသည်းညှပ် သုံးပြီးတိုင်း ပိုးသတ်ပါ။
●  ခြေစွပ်ကို ပုံမှန်လဲပါ။ ချွေးစုပ်တဲ့ ခြေအိတ်ဝတ်ပါ။
●  ဖိနပ်ကို လေဝင်လေထွက်ကောင်းတဲ့ပစ္စည်းနဲ့ လုပ်ထားတာမျိုးကို ရွေးချယ်ပါ။
●  ဖိနပ်အဟောင်းတွေကို လွှတ်ပစ်ပါ။
●  ရေကူးကန်လိုနေရာမျိုးတွေမှာ ဖိနပ်စီးပါ။
●  ဆိုင်မှာ လက်သည်း၊ ခြေသည်းလုပ်ရင် ပစ္စည်းတွေကို သေချာပိုးသတ်တဲ့ဆိုင်မျိုးကို ရွေးချယ်ပါ။
●  ခြေသည်းဆိုးတာတွေ၊ အတုတပ်တာတွေ ရှောင်ပါ။

Dr. Htar (www.drmyanmar.com)