လက်ထိပ်ကအရေပြားတွေ ဘာကြောင့်ကွာကွာနေရတာလဲ?

Category

ကျန်းမာရေး ဆိုင်ရာဗဟုသုတများ

လက်ထိပ်ဖျားတွေဟာ အရေပြား ကွာတတ်၊အက်တတ်ပြီး ဒီလို ကွာကွာနေတာဟာ စိတ်ညစ်စရာကောင်းလှပါတယ်။ လက်ဖဝါး၊ ခြေဖဝါးနဲ့ နှုတ်ခမ်းတွေဟာ အရေပြားအကွာများတတ်တဲ့ နေရာတွေပဲ ဖြစ်ပါတယ်။

အရေပြားလန်တာ၊ကွာတာဟာ မစိုးရိမ်ရတတ်ပေမယ့် တစ်ခါတစ်ရံ ရောဂါကြီးကြီးမားမား တစ်ခုခုနဲ့ ဆက်သွယ်နေတတ်တဲ့အတွက် ရောဂါအဖြေထုတ်နိုင်ဖို့ အရေးကြီးပါတယ်။

တစ်ခါတစ်ရံ အရေပြားကွာတာအပြင် အရေပြားမှာ အနီကွက်ထတာ၊ ယားယံတာ၊ ခြောက်သွေ့တာတွေနဲ့ တွဲပြီးဖြစ်လေ့ရှိပါတယ်။

လက်ဖျားက အရေပြားကွာရတဲ့ အကြောင်းအရင်းများ

လက်အရေပြားကွာတာဟာ ခန္ဓာကိုယ် ပြင်ပအကြောငး်အရာ တစ်ခုခုကြောင့် ဖြစ်နိုင်သလို ကိုယ်တွင်းရောဂါတစ်ခုခုကြောင့် ဖြစ်နိုင်ပါတယ်။

ြပင်ပအကြောင်းအရာများ

ပြင်ပအကြောင်းအရာဆိုရာမှာ ရာသီဥတု အပြောင်းအလဲကြောင့်လညး်ပါသလို ကလေးသူငယ်တွေမှာ လက်စုပ်တတ်တဲ့ အကျင့်တွေကြောင့်လည်း ပါပါတယ်။

၁။ မကြာခဏ လက်ဆေးတတ်ခြင်း

အသားခြောက်ခြင်းဟာ အရေပြား အက်ကွဲကာ ကွာစေတတ်ပါတယ်။ လက်ကို ဆပ်ပြာနဲ့ တစ်ချိန်လုံး ဆေးနေခြငး်က လက်ခြောက်သွေ့ခြင်းကို ဖြစ်စေနိုင်ပါတယ်။

ဒီလို လက်ခဏခဏဆေးခြင်းကို ရှောင်ကြဉ်ပြီး လိုအပ်ချိန်မှသာ ဆေးကြောသင့်ပါတယ်။ လက်ဆေးပြီးချိန်မှာလည်း အစိုဓာတ်ဖြည့် ခရင်မ် တစ်မျိုးမျိုးလိမ်းပေးသင့်ပြီး တစ်ရှုးစက္ကူ အကြမ်းတွေနဲ့ လက်သုတ်ခြင်းကို ရှောင်ကြဉ်သင့်ပါတယ်။

၂။ ရာသီဥတု

ခြောက်သွေ့တဲ့ ရာသီဥတုဟာ အသားအရေ ခြောက်ကပ်စေပြီး အရေပြားကွာစေနိုင်ပါတယ်။ ခြောက်သွေ့အေးမြတဲ့ ဆောင်းဥတုမှာ အဖြစ်များပြီး အေးခဲတဲ့အချိန် အပြင်သွားတဲ့အခါ လက်အိတ်မစွပ်တတ်သူတွေမှာ ဖြစ်လေ့ရှိပါတယ်။

၃။ နေလောင်ခြင်း

နေပူခံခြင်းဖြင့် UV rays လို့ခေါ်တဲ့ ခရမ်းလွန်ရောင်ခြည်တွေကြောင့် အရေပြားကို ထိခိုက်စေနိုင််ပါတယ်။ အရေပြားမကွာခင်မှာ နီရဲပြီး နာလာတတ်ပါတယ်။

ဒီလို နေလောင်နေသူဟာ နေရိပ်ထဲမှာသာ နေသင့်ပြးီ လျားစောင်းလက်ပတ်လိုမျိုး အစိုဓာတ်ထိန်းပေးတဲ့ လိုးရှင်းတစ်မျိုးမျိုးကို လိမ်းပေးသင့်ပါတယ်။

၄။ လက်စုပ်တတ်ခြင်း

ကလေးတွေဟာ လက်စုပ်တတ်တဲ့ အကျင့်ရှိတတ်တာကြောင့် ကြာလာတဲ့အခါ လက်ထိပ်တွေ နာလာပြီး အရေခွံတွေ ကွာလာတတ်ပါတယ်။ ကလေးအများစုမှာ ကြီးလာတာနဲ့အမျှ ဒီအကျင့်ဆိုးဟာ ပျောက်သွားတတ်တယ်ဆိုပေမယ့် လူကြီးများက သေချာ စောင်ကြည့် အားပေးပေးဖို့ လိုအပ်ပါတယ်။

ကလေးတွေမှာ လက်စုပ်တတ်သလိုပဲ လူကြီးအချို့ဟာလည်း စိတ်လှုပ်ရှားလာတဲ့ အချိန်မျိုးမှာ လက်ထိပ်ကိုက်တတ်တဲ့ အကျင့်မျိုးရှိတတ်ပြီး ဒါဟာ လက်ထိပ်ကွာတတ်တဲ့ အကြောငး်ရင်း ဖြစ်နိုင်ပါတယ်။

၅။ ဓာတုဗေဒပစ္စည်းများ

ဆပ်ပြာတွေ၊ ပန်းကန်ဆေးရည်တွေနဲ့ ဆပ်ပြာမှုန့်တွေမှာ အရေပြားကို ခြောက်သွေ့စေနိုင်တဲ့ ဓာတုပစ္စည်းတွေ ပါတတ်ကြပါတယ်။

ဒါကြောင့် အမြဲတစေ ဒီလိုဆပ်ပြာတွေကို ကိုင်တွယ်နေရသူတွေမှာ လက်အိတ်နဲ့ ကိုင်တွယ်တာမျိုး လက်ကိုသေချာဆေးပြီး အစိုဓာတ်ထိန်းလိုးရှင်း ပုံမှန်လိမ်းပေးတာမျိုး လုပ်သင့်ပါတယ်။

ကိုယ်တွင်းရောဂါများ

ရောဂါတစ်ခုခုကြောင့်လည်း လက်ထိပ်တွေကွာနိုင် အက်နိုင်ပါတယ်။

၆။ နှင်းခူ

လက်မှာဖြစ်တဲ့ နှင်းခူဟာ အဖြစ်များပြီး မျိုးရိုးဗီဇအရသော်လည်းကောင်း၊ မတည့်တဲ့ပစ္စည်းတစ်ခုခုကို ကိုင်တွယ်ထိတွေ့မိလို့သော်လည်းကောင်း ဖြစ်လေ့ရှိပါတယ်။

၇။ လက်အရေပြားလန်ခြင်း

လက်အရေပြားလန်ခြင်းဟာ နွေရာသီမှာ အဖြစ်များပြီး လူငယ်တွေမှာ အတွေ့များတဲ့ ရောဂါတစ်မျိုးပဲ ဖြစ်ပါတယ်။

လက်ထိပ်ကလေးတွေမှာ လေအရေကြည်ဖုလေးတွေ ထလာပြီးပေါက်ထွက်သွားတတ်ပါတယ်။ ဒီလို ပေါက်ထွက်သွားတဲ့ နေရာမှာ နီရဲ ခြောက်သွေ့လာပြီး အက်လာတတ်ပါတယ်။ ယာယံခြင်းတော့ မရှိတတ်ပါဘူး။

၈။ ကြွပ်ပွေး

ကြွပ်ပွေးဆိုတာဟာ အရေပြားမှာ နီရဲပြီးရောင်နေတဲ့ အကွက်တွေပေါ်လာတာပဲ ဖြစ်ပါတယ်။ တံတောင်ဆစ်၊ ဒူးဆစ်၊ ဦးရေပြားနဲ့ ခန္ဓာကိုယ်အောက်ပိုင်းတွေမှာ အဖြစ်များပြီး အခြားနေရာတစ်ကိုယ်လုံးမှာလည်း ဖြစ်လေ့ရှိပါတယ်။

၉။ အရေပြားဓာတ်မတည့်ခြင်း

ကိုယ်နဲ့ ဓာတ်မတည့်တဲ့ အရာတစ်ခုခုကို ကိုင်မိထိမိတဲ့အခါ ဖြစ်တတ်ပါတယ်။ ဥပမာ နစ်ကယ်လ်ဓာတ်နဲ့ မတည့်သူတစ်ဦးက နစ်ကယ်လ်ကို ထိမိတိုင်းမှာ အရေပြားတွေ အက်ကွဲပြီး ကွာကျတတ်ပါတယ်။

ဒါ့အပြင် အဆိပ်ရှိ နွယ်ပင်၊ အုတ်ပင်တွေနဲ့ ထိတွေ့မိရင်လည်း ဖြစ်တတ်ပါသေးတယ်။

၁၀။ ကာဝါစကီလို့ခေါ်တဲ့ သွေးကြောရောဂါ

ဒီရောဂါဟာ ရှားပါးပြီး အသက်၅နှစ်အောက် ကလေးတွေမှာ အဖြစ်များပါတယ်။ ၅ရက်ထက်ကြာအောင် အဖျားကြီးခြင်းဟာ အဓိကကျတဲ့ ရောဂါလက္ခဏာတစ်ခုပဲ ဖြစ်ပါတယ်။ လက်ထိပ်တွေ အရေပြားကွာပြီးလည်း လာတတ်ပါသေးတယ်။

ဆရာဝန်ကို ဘယ်အချိန်မှာ ပြသင့်သလဲ?

လက်ထိပ်အရေပြားကွာခြင်းဟာ စိုးရိမ်စရာမရှိတတ်ပါဘူး။ အိမ်မှာပဲ အလွယ်တကူ အစိုထိန်းအဆီတစ်မျိုးမျိုးလိမ်းပေးနိုင်ပြီး မတည့်တဲ့အရာတွေကို ရှောင်ကျဉ်သင့်ပါတယ်။ ဒါပေမယ့် တစ်ချို့မှာ ရောဂါတစ်စုံတစ်ရာရှိနေတတ်တ့ဲအတွက် ဆရာဝန်နဲ့ တွေ့ဆုံဆေးကုသမှု ခံယူသင့်ပါတယ်။

အောက်ပါလက္ခဏာတွေတွေ့နေရပါက ဆရာဝန်နဲ့ ပြသသင့်ပါတယ်။

ပိုးဝင်တဲ့လက္ခဏာများ ရှိနေခြင်း
အရေပြားကွာနေတာ ၂ပတ်ထက် ကျော်နေခြင်း
အိမ်မှာ ကုသနေရင်း မသက်သာခြင်း
ကြာလာတာနဲ့အမျှ ပိုဆိုးလာခြင်း

တစ်ချို့လူတွေမှာ ဓာတ်မတည့်တာမျိုးရှိနေလျက်နဲ့ မသိတာမျိုးဖြစ်တတ်ပါတယ်။ ဆရာဝန်ထံ ပြသပြီး အရေပြားကို စစ်ဆေးစမ်းသပ်ကြည့်မှသာ တွေ့နိုင်ပါတယ်။

www.drmyanmar.com

BMI တွက်ရန်

ကိုယ်၀န်ပတ်တွက်ရန်

ဆရာဝန်ကြီးများ၏ဆောင်းပါးများ