သာမန်အအေးမိဖျားနာတာထက်ပိုဆိုးသော လက္ခဏာ (၁၁)ချက်

• အစာအိမ်ပြသနာတွေကိုပါ ခံစားရတယ်။

ပျို့ခြင်း၊ အန်ခြင်းနဲ့ ဝမ်းလျှောခြင်းတွေက ပုံမှန်အားဖြင့်တော့ အအေးမိတာနဲ့တွဲဖြစ်လေ့မရှိတဲ့အတွက် ဒီလက္ခဏာတွေခံစားရခြင်းက တုပ်ကွေးကဲ့သို့သော အအေးမိတာထက်ပိုဆိုးတဲ့အခြေအနေတစ်ခုခုကြောင့်ဖြစ်နိုင်ပါတယ်။ ဒီလက္ခဏာတွေကို ဆက်တိုက်ခံစားနေရပါက ရေဓာတ်ခမ်းခြောက်စေနိုင်တဲ့အတွက် ဆေးကုသမှုခံယူဖို့အရေးကြီးပါတယ်။

• ပြင်းထန်စွာခေါင်းကိုက်ခြင်း

ပြင်းထန်စွာခေါငး်ကိုက်တာကို ဆရာဝန်တွေကစိုးရိမ်ကြပါတယ်။ အထူးသဖြင့် ခေါင်းကိုက်တာနဲ့အတူ ကိုယ်ပူခြင်းနဲ့ လည်ပင်းတောင့်တင်းခြင်းတွေတွဲဖြစ်ပါက ဦးနှောက်အမြှေးပါးရောင်ရမ်းခြင်းရဲ့လက္ခဏာဖြစ်နိုင်ပါတယ်။ ဒါ့အပြင် ခေါငိးကိုတစ်ခုခုဖိထားသလိုကိုက်တာ၊ မျက်လုံးနဲနှာခေါင်းတစ်ဝိုက်မှာပိုကိုက်ခြင်းတွေက ဦးခေါင်းခွံထဲကအခေါင်းတစ်ခုထဲကို ရောဂါပိုးဝင်ရောက်တဲ့လက္ခဏာဖြစ်နိုင်ပါတယ်။ ဒီရောဂါမှာဆိုရင် ခေါင်းရှေ့ကိုငုံ့လိုက်ရင် ခေါင်းကိုက်တာပိုဆိုးနိုင်ပါတယ်။

• ရင်ပတ်အောင့်ခြင်း (သို့) အသက်ရှူရခက်ခဲခြင်း

ချောင်းဆိုးခြင်းက အအေးမိခြင်းမှာဖြစ်လေ့ဖြစ်ထရှိတဲ့လက္ခဏာဖြစ်ပေမယ့်လည်း ဒါက အသက်ရှူမြန်ခြင်း၊ အသက်ရှူလျှင် တရွှီရွှီမြည်ခြင်း၊ ရင်ဘတ်အောင့်ခြင်းစတာတွေဖြစ်စေတဲ့အထိတော့ မပြင်းထန်သင့်ပါဘူး။ အသက်ရှူပြသနာတွေက လေပြွန်ရောင်ခြင်း (သို့) အဆုတ်ရောင်ခြင်းရဲ့လက္ခဏာတွေဖြစ်ပြီး ရင်ဘတ်အောင့်ခြင်းနဲ့အသက်ရှူမြန်ခြင်းတွေက အဆုတ်ထဲမှာ သွေးခဲပိတ်တဲ့လက္ခဏာတွေဖြစ်နို်ငတဲ့အတွက် ဒါတွေကိုလုံးဝလျစ်လျှူမရှုသင့်ပါဘူး။

• ခန္ဓာကိုယ်တစ်နေရာထဲမှာ ရောဂါလက္ခဏာတွေစုပုံပြီးခံစားနေရတယ်။

အအေးမိတာထက်ပိုတယ်ဆိုတာကိုပြတဲ့ တခြားသတိထားရမယ့်လက္ခဏာတစ်ခုကတော့ တစ်နေရာတည်းမှာ ရောဂါလက္ခဏာတွေကိုခံစားနေရခြင်းဖြစ်ပါတယ်။ အအေးမိတာက အသက်ရှူလမ်းကြောင်းအပေါ်ပိုင်းတစ်ခုလုံးကိုထိစေပြီး တခြားရောဂါတွေကတော့ တစ်နေရာတည်းမှာ ပိုပြင်းထန်တဲ့လက္ခဏာတွေဖြစ်စေနိုင်ပါတယ်။ ဥပမာ- Strep ဆိုတဲ့ဘက်တီးရီးယားပိုးဝင်ခြင်းကြောင့် အစာရေမျိုချဖို့ခက်ခဲတဲ့အထိ လည်ချောင်းနာစေပြီး တစ်ကိုယ်လုံးနာကျင်မှုမဖြစ်စေပါဘူး။ ဦးခေါင်းခွံရဲ့အပေါက်လေးတွေကိုရောဂါပိုးဝင်ခြင်းကြောင့် ခေါငး်ကိုက်ခြင်း၊ သွားကိုက်ခြင်းကိုဖြစ်စေသလို၊ နားထဲကိုပိုးဝင်ရင်လည်း နားတစ်ဖက်တည်းကိုက်ပြီး အာသီးတစ်ဖက်တည်းကိုပဲရောင်စေပါတယ်။

• ခန္ဓာကိုယ်နာကျင်ကိုက်ခဲခြင်း

ပုံမှန်အအေးမိခြင်းက တစ်ကိုယ်လုံးနာကျင်ကိုက်ခဲခြင်းမဖြစ်စေပေမယ့်လည်း တုပ်ကွေါ်ကတော့ ကြွက်သားတွေနဲ့ ခန္ဓာကိုယ်တစ်ခုလုံးနာကျင်ကိုက်ခဲခြင်းနဲ့အတူ ပင်ပန်းနွမ်းနယ်ခြင်းတွေကိုပါဖြစ်စေပါတယ်။ တုပ်ကွေးက ထရပ်ကားတစ်စီးနဲ့ ဝင်တိုက်ခံရသလိုခံစားရစေနိုင်ပါတယ်။ အိပ်ရာကနေထလိုက်တာလေးကတောင်မှ အားမရှိဖြစ်စေပြီး ကြွက်သားတွေနာကျင်ကိုက်ခဲစေပါတယ်။

• ရောဂါလက္ခဏာတွေက ပုံစံတစ်ခုရှိနေတယ်။

ဓာတ်မတည့်တာနဲ့ အအေးမိတာက ရောဂါလက္ခာတွေဆင်တူတဲ့အတွက် ဒီနှစ်ခုကိုခွဲခြားရခက်ပါတယ်။ ဒါပေမယ့် ဓာတ်မတည့်ခြင်းက ပုံစံတစ်ခုရှိပါတယ်။ အပြင်ထွက်ပြီးရင် (သို့) အိမ်မွေးတိရိစၧာန်တစ်ကောင်ကောင်ကိုကိုင်တွယ်ပြီးရင် ရောဂါလက္ခဏာပိုဆိုးလာတယ် (သို့) ရာသီဥတုအပေါ်မူတည်ပြီး ရောဂါလက္ခဏာတွေပေါ်လိုက်ပျောက်လိုက်ဖြစ်တယ်ဆိုရင် ဒါက ဓာတ်မတည့်တာပါပဲ။ ဒီတော့ အကြောင်းအရင်းအတိအကျကိုသေချာသိနိုင်ဖို့အတွက်ဆိုရင် ကိုယ့်ရဲ့ရောဂါလက္ခဏာရာဇဝင်ကိုသေချာစောင့်ကြည့်ပြီး တစ်ခုခုကိုဓာတ်မတည့်တာ (သို့) ရာသီဥတုနဲ့ဓာတ်မတည့်တာတွေလားဆိုတာကို သေချာမှတ်ထားပါ။

Dr. Mya Myo Myo Swe (www.drmyanmar.com)