အစာအိမ်နဲ့အူလမ်းကြောင်းမှာ အနာဖြစ်တာကို ကာကွယ်ဖို့

၃။  စိတ်ဖိစီးမှုကို လျှော့ချပါ။
စိတ်ဖိစီးမှုဟာ အစာအိမ်နဲ့အူလမ်းကြောင်းမှာ အနာဖြစ်တာရဲ့ ရောဂါလက္ခဏာတွေကို ပိုဆိုးစေပါတယ်။ မိမိကို စိတ်ဖိစီးမှုဖြစ်စေတဲ့ အကြောင်းရင်းကို သေချာဆန်းစစ်ပြီး စိတ်ဖိစီးမှုကို တိုက်ထုတ်ဖို့ ကြိုးစားပါ။ အိပ်ရေးဝဝအိပ်ခြင်းဟာလည်း စိတ်ဖိစီးမှုကို တိုက်ထုတ်ပေးနိုင်တဲ့ နည်းလမ်းကောင်းတစ်ခုပါ။ ဒါ့အပြင် ကိုယ်ခံအားကိုလည်း မြင့်တက်စေပါတယ်။

၄။  အကျိုးပြုဘက်တီးရီးယားအာဟာရ စားသုံးပါ။
အစာအိမ်နဲ့ အူလမ်းကြောင်းမှာ ဘက်တီးရီးယားတွေ သန်းနဲ့ချီပြီး ရှိပါတယ်။ H.pylori လိုမျိုး တချို့ဘက်တီးရီးယားတွေက ရောဂါဖြစ်စေပေမယ့် တချို့ဘက်တီးရီးယားတွေကတော့ ရောဂါဖြစ်စေတဲ့ ဘက်တီးရီးယားတွေကို တိုက်ထုတ်ပေးလို့ ကျန်းမာရေးကိုအကျိုးပြုတဲ့ ဘက်တီးရီးယားကောင်းတွေပါ။ ဒီဘက်တီးယားပါဝင်တဲ့ အစားအသောက်တွေကို Probiotics လို့ ခေါ်ပါတယ်။ Probiotics ဟာ အစာအိမ်နဲ့အူလမ်းကြောင်းအနာကို ကာကွယ်ကုသမှုမှာ အထောက်အကူပေးနိုင်ပါတယ်။ Probiotics ပါဝင်တဲ့ အစားအသောက်တွေကတော့ ဒိန်ချဉ်လိုမျိုး နို့ထွက်အစားအသောက်များ၊ ကင်မ်ချီ ၊ မီဆိုအနှစ်၊ ဂေါ်ဖီချဉ် စတာတွေပဲ ဖြစ်ပါတယ်။

၅။  H.pylori ဘတ်တီးရီးယား ကူးစက်မခံရအောင် ကာကွယ်ပါ။
ကမ္ဘာ့လူဦးရေရဲ့ သုံးပုံနှစ်ပုံလောက်ဟာ H.pylori ဘက်တီးရီးယား ကူးစက်ခံနေရပါတယ်။ ဒါပေမဲ့ အများစုက အစာအိမ်နဲ့အူလမ်းကြောင်း အနာမဖြစ်ဘဲ ပျောက်ကင်းသွားပါတယ်။ အနည်းစုမှာသာ အနာဖြစ်တဲ့အထိ ဆိုးတာပါ။ H.pylori ဘယ်လိုကူးလဲဆိုတာ သေချာမသိပေမယ့် အစာနဲ့ရေကတစ်ဆင့် ကူးစက်နိုင်တယ်လို့ ဆရာဝန်တွေက ယူဆထားကြပါတယ်။
ဒါကြောင့် H.pylori ဘက်တီးရီးယားကို ကာကွယ်ဖို့ဆိုရင် -
●  အစာမစားခင်နဲ့ အိမ်သာတက်ပြီးတိုင်းမှာ လက်ကို ဆပ်ပြာနဲ့ရေနဲ့ ဆေးကြောပါ။ ဆပ်ပြာနဲ့ရေ အလွယ်တကူ မရနိုင်ဘူးဆိုရင် အရက်ပြန်ပါဝင်တဲ့ လက်သန့်ဆေးရည်ကို အသုံးပြုပါ။
●  အသားနဲ့ အစားအစာတွေကို ကျက်အောင်ချက်ပြုတ်ပြီးမှ စားပါ။
●  ရေကို ကျိုချက်သောက်ပါ။

Dr. Aye Hsu Mon (www.drmyanmar.com)