သွေးချိုစစ်တဲ့အခါ

>>  တောက်လျှောက်ဆီးချိုသွေးချိုစစ်ဆေးခြင်း
အင်ဆူလင် ကုသမှုခံယူထားသူတွေ၊ အထူးသဖြင့် ဆီးချိုသွေးချိုအမျိုးအစား-၁ သမားတွေမှာ တောက်လျှောက်ဆီးချိုစစ်ဆေးမှုလုပ်ဖို့ လိုတယ်။ အရေပြားထဲစက်ကလေး ထည့်ထားပြီး သွေးအချိုဓာတ်ကို မိနစ်ပိုင်း တစ်ကြိမ်စီ စစ်ဆေးပေးတဲ့ စက်ကလေးပေါ့။
တချို့စက်တွေက အမှတ်ပြဒိုင်ခွက်ကလေးမှာ အချိုဓာတ်ကို အမြဲပြနေတတ်ပြီး သွေးအချိုဓာတ်တတ်လာ၊ ကျလာရင် အချက်ပေးသံမြည်လာတယ်။ တချို့စက်တွေကျတော့ သွေးအချိုဓာတ်ကို ဒိုင်ခွက်ပေါ်မှာ မကြာမကြာ စစ်ဆေးပေးရလိမ့်မယ်။

>>  ရှိရမယ့် ဆီးချိုသွေးချိုအမှတ်ကို သိထားဖို့လိုတယ်။
ရှိရမယ့် ဆီးချိုသွေးချိုအမှတ်ဟာ -
●  ဆီးချိုသွေးချိုအမျိုးအစားနဲ့ အနုအရင့်
●  အသက်အရွယ်
●  ဆီးချိုသွေးချိုသက်တမ်း
●  ကိုယ်ဝန် ရှိ၊ မရှိ
●  ဆီးချိုသွေးချိုနောက်ဆက်တွဲတွေ ရှိ၊ မရှိ
●  တခြားရောဂါတွေ ရှိ၊ မရှိတွေပေါ် မူတည်နေပါတယ်။

>>  အမေရိကန်ဆီးချိုသွေးချိုအဖွဲ့အစည်းရဲ့ သတ်မှတ်ချက်အရ -
●  အစာမစားခင် ၈၀-၁၃၀ mg/dL (၄.၄-၇.၂ mmol/L)
●  အစာစားပြီး ၂ နာရီအကြာမှာ ၁၈၀ mg/dL (၁၀.၀ mmol/L) အောက် ရှိသင့်တယ်လို့ ဆိုတယ်။

>>  အဖြေတွေကို မှတ်သားခြင်း
သွေးအချိုဓာတ်ကို ဘယ်နှခေါက်လောက် စစ်ဆေးရမလဲဆိုတာကတော့ ဆရာဝန်နဲ့ တိုင်ပင်ကြည့်ပါ။
လက်နဲ့ ချရေးမှတ်မယ်ဆိုရင် ရက်၊ အချိန်၊ အဖြေ၊ ဆေး၊ ဆေးပမာဏ၊ အစားအသောက်နဲ့ လေ့ကျင့်ခန်းစတဲ့ သတင်းအချက်အလက်တွေကိုပါ ထည့်ရေးထားဖို့ လိုပါတယ်။ ဆရာဝန်နဲ့တွေ့တဲ့အချိန်မှာ ဒီအချက်အလက်တွေအားလုံး ယူလာဖို့လိုပါလိမ့်မယ်။ တကယ်လို့ ရှိရမယ့်ပမာဏအတွင်း မရှိဘူးဆိုရင် ဆရာဝန်နဲ့ တိုင်ပင်ဆွေးနွေးဖို့ လိုပါတယ်။

Dr. Mya Phoo Ngon (www.drmyanmar.com)