ခန္ဓာကိုယ်ရဲ့ အစာခြေစနစ် ကောင်းမွန်စေဖို့အတွက် လိုက်နာသင့်တဲ့အချက်များ

အစာအိမ် အူလမ်းကြောင်း ကျန်းမာရေးဟာ မိမိနေထိုင်တဲ့ လူနေမှုပုံစံနဲ့ စားသုံးတဲ့ အစားအသောက်တွေပေါ်မှာ များစွာတည်မှီနေပါတယ်။ အစာခြေစနစ်ရဲ့ လုပ်ငန်းဆောင်တာတွေ ကောင်းမွန်စေရန်နဲ့ ကျန်းမာပျော်ရွှင်တဲ့ဘ၀ကို ပိုင်ဆိုင်နိုင်ဖို့ အောက်ပါအချက်တွေကို လိုက်နာကျင့်သုံးဖို့ လိုအပ်ပါတယ်။

1.      အမျှင်ဓာတ်များတဲ့ အစားအစာတွေကို စားသုံးပေးပါ။ အမျှင်ဓာတ် ပါ၀င်မှု မြင့်မားတဲ့ အစားအစာတွေဖြစ်တဲ့ ကောက်ပဲသီးနှံ၊ ဟင်းသီးဟင်းရွက်၊ ပဲအမျိုးမျိုးနဲ့ သစ်သီးတွေကို စားသုံးခြင်းဖြင့် အစာခြေစနစ်ကို ပိုမိုကောင်းမွန်စေပါတယ်။ အမျှင်ဓာတ်များတဲ့ အစားအစာတွေဟာ အစာအိမ်အူလမ်းကြောင်းကနေ အစာတွေ ရွေ့လျားစေဖို့ အကူအညီပေးနိုင်တာကြောင့် ၀မ်းချုပ်ခြင်းကိုလည်း သက်သာစေပါတယ်။ ထို့ပြင် အူအတက်ငယ်လေးများထွက်ခြင်း၊ လိပ်ခေါင်းရောဂါဖြစ်ခြင်း၊ အူလမ်းကြောင်းရောဂါဖြစ်ခြင်းတို့ကို ကာကွယ်ကုသပေးနိုင်၍ ကိုယ်အလေးချိန်ကို ထိန်းသိမ်းရာတွင်လည်း အကူအညီပေးပါတယ်။

2.      ပျော်၀င်နိုင်သော အမျှင်ဓာတ်နဲ့ မပျော်၀င်နိုင်တဲ့ အမျှင်ဓာတ် နှစ်မျိုးလုံးကို စားသုံးရန် လိုအပ်ပါတယ်။ မပျော်၀င်နိုင်တဲ့ အမျှင်ဓာတ်တွေဟာ ခန္ဓာကိုယ်မှ မချေဖျက်နိုင်တာကြောင့် ၀မ်းမှန်စေရန် ကူညီပေးနိုင်ပါတယ်။ ရေမှာပျော်၀င်တဲ့ အမျှင်ဓာတ်တွေကတော့ ရေကို ဆွဲထားတာကြောင့် ၀မ်းသွားတဲ့အခါ ရေတွေအများကြီး မဆုံးရှုံးအောင် လုပ်ဆောင်ပေးပါတယ်။ မပျော်၀င်နိုင်တဲ့ အမျှင်တွေပါ၀င်တဲ့ အစားအစာတွေကတော့ ဂျုံ၊ ဟင်းသီးဟင်းရွက်နဲ့ ကောက်ပဲသီးနှံတွေဖြစ်ပြီး ပျော်၀င်နိုင်တဲ့အမျှင်တွေကိုတော့ ကွေကာအုပ်၊ မြေပဲ။ အစေ့အမျိုးမျိုးနဲ့ ပဲတွေကနေ ရရှိနိုင်ပါတယ်။

3.      အဆီပါ၀င်မှု မြင့်မားတဲ့ အစားအစာတွေ စားသုံးခြင်းကို လျှော့ချပါ။ ယေဘုယျအားဖြင့် အဆီပါ၀င်တဲ့ အစားအစာတွေဟာ အစာခြေစနစ်ကို နှေးကွေးစေနိုင်တာကြောင့် ၀မ်းချုပ်စေနိုင်ပါတယ်။ ဒါပေမဲ့ အစားအသောက်ထဲမှာ အဆီအနည်းငယ် ပါ၀င်ဖို့လည်း လိုအပ်သေးတာကြောင့် အဆီပါ၀င်တဲ့ အစားအစာတွေကို အမျှင်ဓာတ်မြင့်မားတဲ့ အစာတွေနဲ့ တွဲဖက်စားသုံးပေးသင့်ပါတယ်။

4.      အဆီနည်းတဲ့ အသားများကို ရွေးချယ်စားသောက်ပါ။ ကျန်းမာရေးနဲ့ ညီညွတ်တဲ့ စားသောက်မှုပုံစံထဲမှာ ပရိုတင်းဓာတ်ဟာ အဓိကကျတာမှန်ပေမယ့် အသားမှာ တွယ်ကပ်နေတဲ့ အဆီတွေကြောင့် အစာမကြေခြင်းကို ဖြစ်စေနိုင်ပါတယ်။ ဒါကြောင့် အသားစားတော့မယ်ဆိုရင် အဆီနည်းတဲ့ ၀က်ပေါင်သားနဲ့ အရေခွံမပါတဲ့ ကြက်၊ ငှက်သားတွေကို ရွေးချယ်သင့်ပါတယ်။