လေပြွန်ရောင်ခြင်း

(Unicode)

    လေပြွန်ရောင်တာကတော့ အဆုတ်ကို ဗိုင်းရပ်စ်ပိုးဝင်လို့ဖြစ်တာဖြစ်ပြီးတော့ အသက် 2 နှစ်အောက် ကလေးငယ်လေးတွေမှာ အဖြစ်များတဲ့ ရောဂါတစ်မျိုးပါပဲ။ ရောဂါပိုးဝင်တဲ့အခါမှာ လေပြွန်တစ်လျှောက် ရောင်ရမ်းပြီးတော့ အချွဲတွေလည်းစုလာကာ အသက်ရှူရခက်လာစေပါတယ်။
    လေပြွန်ရောင်ပြီဆိုရင်တော့ ကလေးကို အနားပေးပြီးတော့ နို့ကို တစ်ခါတိုက်ရင်နည်းနည်းနဲ့ ခဏခဏတိုက်ပေးဖို့ လိုပါတယ်။ ဒါမှ ကလေးက အစာစားနေတုန်းမှာ ပင်ပန်းတာတွေမဖြစ်သလို ရေဓာတ် ခမ်းခြောက်တာလည်း မဖြစ်မှာပါ။
    လေပြွန်ရောင်တာက ကူးစက်တတ်လို့ ကိုယ့်ကလေးမှာဖြစ်နေရင် တခြားသူတွေနဲ့ ရက်အနည်းငယ်လောက် ထိတွေ့မှုမရှိအောင် ရှောင်ရှားဖို့လိုပါတယ်။

>>    လေပြွန်ရောင်တဲ့ရောဂါလက္ခဏာတွေ
    အအေးမိတာကနေစပြီးတော့ ချောင်းနည်းနည်းဆိုးပြီး နှာရည်ယို၊ နှာပိတ်ပါမယ်။ ဒီလိုဖြစ်ပြီး ၁ ရက်၊ ၂ ရက်လောက်ကြာရင် ချောင်းဆိုးတာက ပိုဆိုးလာပြီးတော့ အသက်ရှူရာမှာ ခက်ခဲလာပါမယ်။ လက္ခဏာတွေကတော့ -
●    အသက်ရှူမြန်ခြင်း
●    အသက်ရှူတဲ့အခါမှာ အသံတွေမြည်ခြင်း (တရွှီရွှီမြည်ခြင်း)
●    အသက်ကိုခက်ခက်ခဲခဲရှူရခြင်း - ကလေးအသက်ရှူတဲ့အခါမှာ ရင်ဘတ်အောက်ပိုင်း ချိုင့်ဝင်သွားတာ၊ လည်ပင်းအောက်က အရေပြားတွေ ချိုင့်ဝင်သွားတာ (သို့) နှာခေါင်းပေါက်က ပွစိပွစိဖြစ်နေတာတွေကို တွေ့ရပါမယ်။ ကလေးငယ်ငယ်လေးတွေဆိုရင်တော့ အသက်ရှူတဲ့အခါမှာ ခေါင်းကို လှုပ်လှုပ်ပြီး ရှူတာကို တွေ့ရပါမယ်။
●    ဂဏှာမငြိမ်ဖြစ်ခြင်း၊ ကိုယ်ပူခြင်း
●    အစာစား၊ ရေသောက်ရ ခက်ခဲခြင်း
    ရောဂါလက္ခဏာတွေက ၂ ရက်၊ ၃ ရက်မြောက်လောက်မှာ ပိုဆိုးပြီးတော့ ၁၀ ရက်လောက်အထိ နေမကောင်းဖြစ်တတ်ပါတယ်။ ချောင်းကတော့ ၄ ပတ်လောက်အထိ ဆက်ဆိုးနေနိုင်ပါတယ်။

>>    ဆရာဝန် ဘယ်အချိန်ပြမလဲ?
    ကလေးမှာ လေပြွန်ရောင်နေတယ်လို့ထင်ရင် ဆရာဝန် ပြသင့်ပါတယ်။ လေပြွန်ရောင်တာကို ရင်ဘတ်ဓာတ်မှန်ရိုက်ခြင်း၊ နှာခေါင်းက ချွဲယူပြီးစစ်ဆေးခြင်းနဲ့ သွေးစစ်ဆေးခြင်းတွေကနေပြီးတော့ သိနိုင်ပါတယ်။
    ကလေးက အသက်ရှူရ ခက်တာတွေ၊ နို့စို့ရ ခက်တာတွေရှိလာရင်တော့ ဆေးရုံတင်ဖို့ လိုပါတယ်။ ဆေးရုံမှာမှ ကလေးကို စောင့်ကြည့်ပြီးတော့ အောက်ဆီဂျင်ပေးတာ၊ လိုအပ်တဲ့အရည်တွေကို အကြောထဲကသွင်းတာ၊ နှာခေါင်းပိုက်က သွင်းတာတွေ လုပ်ပေးပါလိမ့်မယ်။
    လေပြွန်ရောင်တာက ဗိုင်းရပ်စ်ပိုးကြောင့်ဖြစ်တာဆိုတော့ ပိုးသတ်ဆေးတော့ မပေးပါဘူး။ steroids, adrenaline နဲ့ ပန်းနာရင်ကြပ်ဆေးတွေကလည်း အထောက်အကူမဖြစ်ပါဘူး။
    တချို့ကလေးတွေက လေပြွန်ရောင်ပြီဆိုရင် မြန်မြန်ကြီး ရောဂါအခြေအနေ ဆိုးနိုင်ချေပိုများပါတယ်။ ဒီလိုအခြေအနေတွေရှိတဲ့ကလေးတွေမှာ လေပြွန်ရောင်တဲ့လက္ခဏာတွေ တွေ့ရင်တော့ အရေးပေါ်ဆေးကုသမှုခံယူဖို့ လိုပါတယ်။
●    လမစေ့ဘဲ မွေးတဲ့ကလေးတွေ
●    ၁၀ ပတ်အောက် ငယ်တဲ့ကလေးငယ်လေးတွေ
●    နာတာရှည်အဆုတ်ရောဂါ၊ မွေးရာပါနှလုံးရောဂါ၊ နာတာရှည်အာရုံကြောရောဂါ (သို့) ခုခံအားနည်းတဲ့ကလေးတွေ

>>    အိမ်မှာရော ဘယ်လိုပြုစုစောင့်ရှောက်ကြမလဲ?
    ကလေးအများစုကတော့ ဆရာဝန်ပြပြီးသွားရင် အိမ်မှာပဲ ဂရုစိုက်ဖို့လိုပါတယ်။
●    ဆရာဝန်ညွှန်ကြားတဲ့အတိုင်း ဆေးမှန်မှန်တိုက်ပါ။
●    ကလေးကို များများအနားယူခိုင်းပါ။
●    ကလေးကို နို့ ခဏခဏတိုက်ပေးပါ။
●    နှာခေါင်းထဲကို saline အစက်ချပေးတာ၊ spray ဖြန်းပေးတာတွေက အထဲက အချွဲတွေကို ရှင်းလင်းစေပြီးတော့ ကလေးကို ပိုပြီးသက်သောင့်သက်သာ ဖြစ်စေပါတယ်။
●    အိမ်ထဲမှာ (သို့) ကလေးရဲ့ပတ်ဝန်းကျင်မှာ ဘယ်သူ့ကိုမှ ဆေးလိပ်မသောက်ပါစေနဲ့။

>>    ကလေးမှာ ဒီလက္ခဏာတွေပြရင် ဆရာဝန်ပြန်ပြဖို့လိုပါတယ်။
●    ချောင်းဆိုးတာ ပိုဆိုးလာခြင်း
●    ကလေးက ပုံမှန်နို့စို့နေကျပမာဏထက် တစ်ဝက်လောက်သာစို့ခြင်း (သို့) လုံးဝမစို့ခြင်း
●    ကလေးက အရမ်းနုံးပြီးတော့ ခါတိုင်းထက်ပိုမှိန်းခြင်း
●    ဘာကြောင့်ပဲဖြစ်ဖြစ်စိတ်ပူရင် ဆရာဝန်ပြန်ပြပါ။

>>    ကလေးမှာ ဒီလက္ခဏာတွေ တွေ့ရင်တော့ နီးစပ်ရာဆေးရုံ၊ ဆေးခန်းကို အမြန်ဆုံးသာပြေးပါ။
●    အသက်ရှူရခက်ခဲခြင်း၊ ကလေးနားနေချိန်မှာတောင်မှ အသက်ရှူပုံမမှန်ခြင်း၊ အသက်ရှူမြန်ခြင်း
●    ချောင်းဆိုးပြီးတော့ ပုံမှန်အတိုင်း မစားနိုင်ခြင်း
●    ချောင်းဆိုးတဲ့အခါမှာ မျက်နှာအသားရောင် ပြောင်းသွားခြင်း
●    အသားတွေ ဖြူဖျော့ပြီးတော့ ချွေးတွေထွက်နေခြင်း
    ကလေးက အသက်ကို အရမ်း ခက်ခက်ခဲခဲရှူနေရပြီးတော့ နှုတ်ခမ်းတွေလည်း ပြာလာရင်တော့ လူနာတင်ယာဉ် အမြန်ဆုံးသာခေါ်ပြီး ဆေးရုံသွားပါ။

Dr. Mya Myo Myo Swe (www.drmyanmar.com)