အာရှတစ်ဝှမ်းကို ခြိမ်းခြောက်နေသော တရုတ်နိုင်ငံမှ ပြင်းထန်အဆုတ်ရောင်ရောဂါ

    အမျိုးအမည်မသိရသေးသော ဗိုင်းရပ်စ်ပိုးကြောင့် နာမကျန်းဖြစ်သူ ၄၄ ဦးထိရှိကြောင်း တရုတ်အစိုးရက ထုတ်ပြန်ကြေညာပြီးနောက်ပိုင်း အာရှနိုင်ငံအချို့တွင် ကြိုတင်ကာကွယ်မှုများ အရေးပေါ် လုပ်ဆောင်လာကြပါတယ်။
    ယခုဖြစ်ပွားလျက်ရှိသော ဗိုင်းရပ်စ်ပိုးဝင်ခြင်းဟာ လွန်ခဲ့တဲ့ ၁၇ နှစ်ကဖြစ်ပွားခဲ့ပြီး လူပေါင်းများစွာ အသက်ဆုံးရှုံးစေခဲ့သော SARS virus နဲ့ ဆက်စပ်မှုရှိနေကြောင်းလည်း သံသယဖြစ်ဖွယ်ရာ ရှိနေပါတယ်။
    တရုတ်အစိုးရရဲ့ ဇန်နဝါရီ ၃ ရက်နေ့တွင် ကြေညာချက်အရ အဆိုပါ ဗိုင်းရပ်စ်ပိုးကြောင့် အသက်ရှူလမ်းကြောင်းပိုးဝင်သောလက္ခဏာ၊ ဖျားခြင်းနဲ့အတူ အသက်ရှူရခက်ခဲသောလက္ခဏာများ ခံစားနေရပြီး စိုးရိမ်ရသော အတွင်းလူနာ ၁၁ ဦးထိ ရှိတယ်လို့ သိရပါတယ်။
    တရုတ်နိုင်ငံ အာဏာပိုင်တွေအနေနဲ့ ဖြစ်ပွားရသော ဗိုင်းရပ်စ်ပိုးကို အမျိုးအမည် ခွဲခြားလျက်ရှိပြီး Influenza virus၊ Avian virus ၊ Adeno virus နဲ့ အခြားသော အဆုတ်ပိုးဝင်ခြင်း ဖြစ်ပေါ်စေတဲ့ ဗိုင်းရပ်စ်တွေ မဟုတ်ကြောင်း တွေ့ရှိရသော်လည်း SARS ရောဂါကိုဖြစ်စေတဲ့ Corona virus ဟုတ်မဟုတ်ကိုတော့ ဖော်ပြခြင်းမရှိသေးပါဘူး။

>>    ရောဂါလက္ခဏာများအနေနဲ့ -
●    ဖျားခြင်း
●    ခေါင်းကိုက်ခြင်း
●    အသက်ရှူမဝခြင်း
●    အသက်ရှူမြန်ခြင်း
●    ချောင်းခြောက်ဆိုးခြင်း
●    ချမ်းတုန်ခြင်း
●    အသက်ရှူစဉ်နဲ့ ချောင်းဆိုးစဉ် ရင်ဘတ်အောင့်ခြင်း
●    နုံးခြင်း
●    အစာစားချင်စိတ်မရှိခြင်း
●    မအီမသာဖြစ်ခြင်းတို့ကို တွေ့ကြုံရပါတယ်။

>>    ကာကွယ်ဖို့နည်းလမ်းတွေအနေနဲ့ -
●    လတ်ဆတ်သော ဟင်းသီးဟင်းရွက်နဲ့ သစ်သီးများကို နေ့စဉ်စားပါ။
●    လှုပ်ရှားတက်ကြွစွာနေပါ။
●    အိပ်ရေးဝပါစေ။
●    နှစ်စဉ် တုပ်ကွေးရာသီရောက်တိုင်း ကာကွယ်ဆေးထိုးပါ။
●    အပြင်က ပြန်လာပြီးတိုင်း လက်ကို ဆပ်ပြာနဲ့ ဆေးကြောပါ။
●    ချောင်းဆိုး၊ နှာစေးဖြစ်နေသူများနဲ့ ဝေးဝေးနေပါ။
●    လက်မဆေးရသေးဘဲ နှာခေါင်း၊ မျက်စိ၊ နားရွက်၊ ပါးစပ်များကို ကိုင်တွယ်ခြင်းရှောင်ပါ။
    ပြင်းထန်အဆုတ်ရောင်ရောဂါဟာ အလွန်ကူးစက်လွယ်သောရောဂါတစ်မျိုး ဖြစ်ပေမယ့် အထက်ပါအချက်များအတိုင်း တစ်ကိုယ်ရည် သန့်ရှင်းစွာ နေထိုင်ပြီး ကိုယ်ခံအားကောင်းမွန်အောင် နေထိုင်စားသောက်ခြင်းဖြင့် ကာကွယ်နိုင်ပါတယ်။

လေပြေနုသွေး (ဆေး-၂) (www.drmyanmar.com)