အသက်ကို ရန်ရှာနိုင်တဲ့ ကြက်ညှာချောင်းဆိုး

ကြက်ညှာချောင်းဆိုးနဲ့ ပတ်သက်ပြီးတော့ သိကို သိထားသင့်တဲ့အချက်တွေကို လေ့လာကြည့်ကြရအောင်။

1.  ကြက်ညှာချောင်းဆိုးဆိုတာ အရမ်းကို ကူးစက်လွယ်တဲ့ရောဂါတွေထဲက တစ်ခုအပါအဝင်ပါ။
ရောဂါပျိုးချိန်ဖြစ်တဲ့ ၅-၂၁ ရက်ပြီးရင် ဒါက အရမ်းကို ကူးစက်လွယ်တဲ့ရောဂါဖြစ်ပြီးတော့ လေကတစ်ဆင့် ကူးစက်ပါတယ်။ ရောဂါရှိတဲ့သူတစ်ယောက် နှာချေ၊ ချောင်းဆိုးလိုက်တဲ့အခါ လေထဲမှာ ပိုးတွေပျံ့နှံ့သွားပြီးတော့ ဒါကို တခြားသူတစ်ယောက်က ရှူမိရင် ကူးစက်သွားနိုင်ပါတယ်။ ချောင်းစဆိုးတဲ့အချိန်ကနေပြီးတော့ နောက်ထပ် ၃ ပတ်လောက်ကြာတဲ့အထိ တခြားသူတွေကို ရောဂါကူးနိုင်ပါတယ်။
ရောဂါကို စောစောသိရင် ပိုးသတ်ဆေးတွေနဲ့ ကုသလို့ရပြီးတော့ အိမ်သားတွေကိုလည်း ကာကွယ်တဲ့အနေနဲ့ ပိုးသတ်ဆေး ကြိုတိုက်ထားလို့ရပါတယ်။ နောက်ကျမှ သိရင်တော့ ချောင်းဆိုးတာကို ဆေးနဲ့ထိန်းဖို့ ခက်သွားပါပြီ။

2.  ကြက်ညှာချောင်းဆိုးက အသက်အန္တရာယ်ပေးနိုင်ပါတယ်။
ကြက်ညှာချောင်းဆိုးဖြစ်တဲ့ ကလေးတွေမှာ တက်တာ၊ အသက်ရှူရပ်သွား၊ အဆုတ်ရောင်ပြီးတော့ သေစေနိုင်သလို ဦးနှောက်ကိုလည်း ထိခိုက်စေနိုင်ပါတယ်။

3.  ကြက်ညှာချောင်းဆိုးကြောင့် ဆိုးတဲ့ချောင်းက ထိန်းချုပ်ရခက်ပြီးတော့ အရမ်းလည်း ပြင်းထန်ပါတယ်။
ကြက်ညှာချောင်းဆိုးကြောင့် ချောင်းဆိုးတဲ့အခါမှာ တစ်ခါဆိုးရင် ၁၅ စက္ကန့်ကနေပြီးတော့ တစ်မိနစ်လောက်အထိ ကြာပါတယ်။ ချောင်းဆိုးနေတုန်းမှာဆိုရင် ကလေးက အသက်ရှူရခက်၊ မျက်နှာတွေ၊ ကိုယ်လုံးတွေ နီရဲလာပြီးတော့ လေအလုံအလောက် မရတော့ဘဲနဲ့ ပြာလာကာ အသက်ရှူတောင် ရပ်သွားနိုင်ပါတယ်။
ရောဂါကတော့ စစချင်းမှာ အအေးမိသလိုပဲ ငွေ့ငွေ့လေး ဖျားမယ်၊ ချောင်းဆိုးမယ်၊ နောက်တစ်ပတ်လောက် ဆိုရင်တော့ ချောင်းအရမ်းဆိုးပြီးတော့ အန်မယ်၊ ပြာလာမယ်၊ နံရိုးတွေတောင် ကျိုးနိုင်တယ်၊ သွေးကြောတွေလည်း ပေါက်ကွဲ ထွက်နိုင်ပါတယ်။