ကျောက်ကပ်ကျောက်တည်ခြင်းကို ဘယ်လိုကာကွယ်မလဲ

ကျောက်ကပ်ကျောက်တည်ခြင်းဟာ အဖြစ်များသော ကျန်းမာရေးပြဿနာတစ်ခုဖြစ်ပြီး စောစီးစွာ မကုသဘူးဆိုပါက နောက်ဆက်တွဲဆိုးကျိုးများစွာနှင့် ရင်ဆိုင်ရဖွယ်ရှိပါတယ်။
ဆီးထဲတွင်ရှိသော သတ္တုဓာတ်အနည်များနှင့် ဆားဓာတ်များ စုစည်းပေါင်းစပ်ရာကနေ ကျောက်တည်ခြင်း ဖြစ်ပေါ်လာရတာပဲ ဖြစ်ပါတယ်။ ကျောက်ကပ်ကျောက်တည်ခြင်းကို ဖြစ်စေသော အကြောင်းရင်းများစွာ ရှိပါတယ်။ သင့်အနေနှင့် ဆီးထဲတွင် ကျောက်ကျလာချိန်မှ ဆရာဝန်နှင့် ပြသတိုင်ပင်မိပြီး ကျောက်တည်ကြောင်း သိရှိနေတတ်ပါတယ်။

>>  ဖြစ်စေသောအကြောင်းရင်းများ
(၁)  ဆီးထဲတွင် ကယ်လ်စီယမ်၊ အောက်ဇလိတ်၊ ယူရစ်အက်ဆစ်များ စုပုံနေခြင်း
(၂)  ဆီးထဲရှိ pH ပမာဏကျနေခြင်း
(၃)  ဆီးကျောက်များမဖြစ်အောင် တားဆီးပေးမယ့်ဓာတ်များ နည်းနေခြင်း
(၄)  ဆီးတွင်အက်ဆစ်များနေခြင်း သို့မဟုတ် နာတာရှည်ဆီးလမ်းကြောင်းပိုးဝင်ခြင်း
(၅)  ရေဓာတ်အလွန်နည်းပါးခြင်း

>>  ဆီးကျောက်အမျိုးအစားများကတော့ -
(၁)  ကယ်လ်စီယမ်ကျောက်
(၂)  ယူရစ်အက်ဆစ်ကျောက်
(၃)  ဆီးပိုးဝင်ခြင်းကြောင့်ဖြစ်သော ကယ်လ်စီယမ်အမိုနီယမ်ကျောက်
(၄)  Cystine ကျောက်

>>  ကျောက်ကပ်ကျောက်တည်ခြင်းမဖြစ်အောင် ဒါတွေ ရှောင်ပါ
●  ရေများများသောက်ပါ။ ရေဓာတ်ပြည့်ဝခြင်းဖြင့် ဆီးများများသွားစေပြီး ကျောက်တည်ခြင်းကို ကာကွယ်ပေးနိုင်ပါတယ်။
●  အသား၊ ကာဗိုဟိုက်ဒရိတ်နှင့် ဆားပါဝင်မှုနည်းသော စားသောက်မှုပုံစံကို ကျင့်သုံးပါ။ နွားနို့ အလွန်အကျွံသောက်ခြင်းကို ရှောင်ပါ။
●  ကိုယ်အလေးချိန် ထိန်းသိမ်းပါ။ အဝလွန်သူနေပါက ကိုယ်အလေးချိန် လျှော့ချပါ။
●  ဆိုးဆေးနှင့် ကြာရှည်ခံစေသော ဓာတုပစ္စည်းများပါသော အစားအသောက်များကို ရှောင်ကြဉ်ပါ။

လေပြေနုသွေး (ဆေး-၂) (www.drmyanmar.com)