ခါးနာခြင်း - ဘယ်အချိန်မှာ စိုးရိမ်သင့်သလဲ?
လူတိုင်းရဲ့ဘဝမှာ ခါးနာတယ်ဆိုတာကို ခံစားဖူးကြသူချည်းပါပဲ။ များသောအားဖြင့် ကိုယ်ခန္ဓာ အသုံးပြုမှု များသွားတဲ့အချိန်မျိုးမှာ ဖြစ်တတ်ပြီး အရမ်းကြီးစိုးရိမ်စရာမလိုတတ်ပါဘူး။ ဒါပေမဲ့ တချို့ခါးနာခြင်းတွေကတော့ သေချာစောင့်ကြည့်ဖို့ လိုအပ်ပါတယ်။
အထူးသဖြင့် ရေခဲကပ်၊ ဆေးလိမ်း၊ အနားယူ စတဲ့နည်းတွေနဲ့ ခါးနာတာ ၇၂ နာရီကျော်တဲ့အထိ မသက်သာခဲ့ရင် ခါးနာရတဲ့အကြောင်းရင်းကိုရှာဖို့ လိုအပ်ပါတယ်။
Jointace 1
တခြားစိုးရိမ်သင့်တဲ့ ခါးနာခြင်းလက္ခဏာတွေကတော့ -
>> စူးပြီးခါးနာခြင်း
ခါးနာတာဟာ လူငယ်တွေမှာ မကြာမကြာ ဖြစ်တတ်တယ်ဆိုပေမယ့် ရုတ်တရက်ကြီး စူးပြီးနာလာတာဆိုရင် သတိထားရပါမယ်။ ဒါဟာ ကြွက်သား ဒါမှမဟုတ် အရွတ်ပြဲတာကြောင့် ဖြစ်နိုင်ပါတယ်။ ဒါ့အပြင် ခါးနောက်မှာ ဒါမှမဟုတ် ခါးဘေးမှာရှိတဲ့ အတွင်းအင်္ဂါတစ်ခုခုဖြစ်တာကြောင့် နာတာလည်း ဖြစ်နိုင်ပါတယ်။
>> တခြားနေရာကိုပါ ပြန့်ပြီးနာခြင်း
ပုံမှန်ခါးနာတာဟာ ခါးတစ်နေရာထဲမှာပဲ စုပြီးနာနေတတ်တာ များပါတယ်။ ဒီလိုမဟုတ်ဘဲ ခါးဘေးနားတစ်ဝိုက်ကိုပါ ပြန့်ပြီးနာလာပြီဆိုရင် စိုးရိမ်ရပါတယ်။ အထူးသဖြင့် ခါးကနေ ခြေထောက်တစ်လျှောက်နဲ့ တင်ပါးအနောက်ပိုင်းတွေအထိပါ ပြန့်ပြီးနာလာပြီဆိုရင် အာရုံကြောညပ်တာ ဖြစ်နိုင်တာမို့ ချက်ချင်းကုသဖို့ လိုအပ်ပါတယ်။
>> ခြေထောက်အားနည်းလာခြင်း
ခါးနာပြီးနောက်မှာ ခြေထောက်တွေ ရုတ်တရက် အားနည်းလာတယ်ဆိုရင် စိုးရိမ်စရာပါ။ ခြေထောက်ကိုသွားတဲ့ အာရုံကြောမ ညပ်တာတို့၊ ခါးဆစ်ရိုးကျဉ်းတာတို့ ဖြစ်နိုင်ပါတယ်။ အထူးသဖြင့် ရုတ်တရက် ချက်ချင်းကြီး အားနည်းသွားတာမျိုးဆိုရင် အာရုံကြောပျက်စီးသွားတာ ဖြစ်နိုင်တာကြောင့် အကြီးမားဆုံးသော အချက်ပြလက္ခဏာဖြစ်ပြီး ဆရာဝန်နဲ့ချက်ချင်းပြဖို့ လိုအပ်ပါတယ်။
Jointace 2
>> ဆီးဝမ်းမထိန်းနိုင်ခြင်း
ဆီးဝမ်းမထိန်းနိုင်ရင်လည်း အာရုံကြော ဆိုးဆိုးရွားရွားပျက်စီးတာ ဒါမှမဟုတ် ပိုးဝင်တာဖြစ်နိုင်တာကြောင့် ဆရာဝန်နဲ့ ပြကြည့်ပါ။
>> နာတာရှည်ခါးနာခြင်းကြောင့် လုပ်ငန်းဆောင်တာများ ခက်ခဲခြင်း
အထူးသဖြင့် လူကြီးတွေမှာ နာတာရှည်ခါးနာနေတာကြောင့် နေ့စဉ် တစ်ကိုယ်ရည်တစ်ကာယအလုပ်တွေတောင် အခက်တွေ့နေရပြီဆိုရင် ရေရှည်ကုထုံးအစီအစဉ်တွေဆွဲဖို့ လိုလာပါပြီ။
>> ထုံကျဉ်ခြင်း၊ ပင်အပ်နဲ့ထိုးသလိုနာခြင်း
ပေါင်ခြံနဲ့ တင်ပါးတစ်ဝိုက်တွေမှာ ထုံကျဉ်တာ၊ ပင်အပ်နဲ့ထိုးသလို နာတာမျိုးဟာ အာရုံကြောပြဿနာ သို့မဟုတ် ခါးဆစ်ရိုးပြဿနာ ဖြစ်နိုင်ပါတယ်။ ခါးနာပြီး ဒီလက္ခဏာတွေဖြစ်နေပြီဆိုရင် ဆရာဝန်နဲ့ပြဖို့ လိုအပ်ပါတယ်။
Dr. Mya Phoo Ngon (www.drmyanmar.com)
Related News And Articles
တစ်ကိုယ်လုံး ညောင်းညာကိုက်ခဲနေမှ၊ ဘာမှမလုပ်နိုင်လောက်အောင် မောပန်းနွမ်းနယ်နေမှ အားအင်ကုန်ဆုံးတာ မဟုတ်ပါဘူး။ လုပ်လက်စအလုပ်မှာ အာရုံမစိုက်နိုင်တော့တာ၊ စိတ်မရှည်ဘဲ စိတ်ဆိုးစိတ်တိုလွယ်လာတာတွေကလည်း အားအင်ကုန်ခမ်းလာတဲ့ လက္ခဏာတွေပဲ ဖြစ်ပါတယ်။ ဒီလိုလက္ခဏာတွေကို လူတိုင်းနီးပါး ခံစားဖူးကြမှာပါ။ ဒီလက္ခဏာတွေ...