စိတ်ဖိစီးမှုကြောင့် ခေါင်းကိုက်နေသလား

>>    နေ့စဉ်စိတ်ဖိစီးမှုတွေအတွက် ဒီအချက်လေးတွေကိုလည်း ထည့်သွင်းစဉ်းစားပေးပါ။
●       ဘဝကို ရိုးရှင်းစွာဖြတ်သန်းပါ - နေ့တိုင်း အိမ်အလုပ်တွေ လုပ်စရာတွေ တစ်ပုံကြီးကို ညှစ်ထုတ်ပြီးတော့ လုပ်နေမယ့်အစား တချို့ဟာလေးတွေကို ထားခဲ့ပါ။ ဘာတွေကို အရင်လုပ်ဖို့လိုပြီး ဘာတွေထားထားလို့ရသေးလဲဆိုတာကို သေချာစဉ်းစားပြီးတော့လုပ်ပါ။
●       လေ့ကျင့်ခန်း ပုံမှန်လုပ်ပါ - လေ့ကျင့်ခန်းဆိုတာကတော့ ကာကွယ်တဲ့နည်းလမ်းဖြစ်သလို တစ်ခါတလေဆို ခေါင်းကိုက်တာကိုတောင်မှ ကုသနိုင်ပါတယ်။ လေ့ကျင့်ခန်း လုပ်နေတဲ့အချိန်မှာ နေ့စဉ်ခံစားနေရတဲ့ စိတ်ဖိစီးမှုတွေကနေပြီးတော့ ခဏတာ အနားရစေပါတယ်။ လေ့ကျင့်ခန်းမလုပ်ခင်မှာ သွေးပူလေ့ကျင့်ခန်းလေး လုပ်ဖို့တော့ သတိထားပါ။ ရုတ်တရက်ကြီး အပြင်းအထန် လုပ်လိုက်တာကလည်း ခေါင်းကိုက်စေပါတယ်။
●       ကျန်းမာရေးနဲ့ ညီအောင်စားပါ - သစ်သီး၊ ဟင်းသီးဟင်းရွက်နဲ့ ပေါင်မုန့်ညို၊ ဆန်လုံးညို စတာတွေ စားပေးပါ။
●       အိပ်ရေးဝဝအိပ်ပါ - စိတ်ဖိစီးမှုတွေကြောင့် အိပ်ရေးပျက်စေသလို အိပ်ရေးပျက်တဲ့အခါမှာလည်း စိတ်ဖိစီးမှုကို ပိုဆိုးစေပါတယ်။ အိပ်ရေးပျက်တဲ့အခါမှာ စိတ်ဖိစီးမှုကိုဖြစ်စေတဲ့ ဟော်မုန်းတွေကို ပိုထွက်စေပါတယ်။
●       ကိုယ်ခံစားနေရတာတွေ ရင်ဖွင့်တိုင်ပင်ပါ - ကိုယ်ခံစားနေရတာတွေ၊ အခက်အခဲတွေကို ယုံကြည်ရတဲ့မိတ်ဆွေ၊ သူငယ်ချင်း၊ မိသားစုဝင်တွေကိုဖွင့်ဟပြောဆိုတာကလည်း စိတ်သက်သာရာရစေပါတယ်။
●       အချိန်ကို အကျိုးရှိစွာ အသုံးချပါ - ကိုယ့်ရဲ့ နေစဉ်လုပ်ရမယ့်အလုပ်တွေကို သေချာချရေးထားပြီးတော့ လိုအပ်ရင် တခြားသူတွေကို တာဝန်ခွဲပေးပါ။ တစ်ချိန်တည်းမှာ အလုပ်တွေ အများကြီး စုပုံမလုပ်ဘဲ တစ်ချိန်ကို အလုပ်တစ်မျိုးပဲ လုပ်ပါ။
●       ကိုယ်ထိန်းချုပ်လို့မရတဲ့ အရာတွေကို စိတ်ပူမနေဘဲ လွှတ်ချလိုက်ပါ။ ကိုယ့်ရဲ့စိတ်နေစိတ်ထား ခံယူချက်ကို ညှိပါ။ ဒါတော့ မလုပ်နိုင်လောက်ဘူးလို့ပဲ တွေးပြီး စိတ်ပူနေရင် ဒါမျိုးမတွေးပါနဲ့။ ဒါက ခက်ရင်ခက်လိမ့်မယ် ငါ လုပ်နိုင်ပါတယ်ဆိုတဲ့ အကောင်းမြင်တဲ့ အတွေးလေးတွေးပါ။ ဒါက စိတ်ဖိစီးမှုတွေကို လျော့စေနိုင်ပါတယ်။
●       အနားယူပါ - အရမ်း အလုပ်တွေပိပြီး ပင်ပန်းနေတယ်ထင်ရင် စိတ်ကိုရှင်းသွားစေဖို့အတွက် ခဏအနားယူလိုက်ပါ။ အကြောလေး လျှော့လိုက်တာ၊ လမ်းလေး ထလျှောက်လိုက်တာမျိုးလေး လုပ်ပေးပါ။ ကိုယ့်ကိုယ်ကို စိတ်ငြိမ်ပြီး အေးချမ်းတဲ့နေရာလေးမှာ အားလပ်ရက် အပန်းဖြေရောက်နေတယ်လို့ သဘောထားလိုက်ပါ။
●       ရယ်မောပါ - ရယ်မောခြင်းက စိတ်ဖိစီးမှုကို လျော့ကျစေဖို့အတွက် ကောင်းတဲ့နည်းလမ်းတစ်ခုပါ။ ရယ်လိုက်တဲ့အခါမှာ endorphins လို့ခေါ်တဲ့ ပျော်ရွှင်မှုကို ခံစားရစေတဲ့ ဟော်မုန်းတွေကို ထွက်လာစေပါတယ်။ ဟာသစာအုပ်ဖတ်တာ၊ ဟာသကားကြည့်တာလေးတွေ လုပ်ကြည့်ပါ။
●       မကောင်းတဲ့အကျင့်တွေကို စွန့်လွှတ်လိုက်ပါ။ ဆေးလိပ်ဖြတ်ပါ။ ကော်ဖီ လျှော့ပါ။ အရက်သောက်တတ်ရင် အလွန်အကျွံ မသောက်ပါနဲ့။