ဆယ်ကျော်သက်အရွယ် သားငယ်၊ သမီးငယ် ခေါင်းကိုက်နေသလား ဒါတွေ သိထားဖို့ လိုပါတယ်

(Unicode)

    ဆယ်ကျော်သက်အရွယ်တွေမှာ ခံစားရတတ်တဲ့ ခေါင်းကိုက်ဝေဒနာ ခေါင်းကိုက်တယ်ဆိုတာ အရမ်းကို ခံရခက်တဲ့ဝေဒနာပါ။ တစ်ခါတလေမှာဆိုရင် ခေါင်းတစ်ခုလုံးနေရာအနှံ့ ကိုက်နေတဲ့အပြင် မျက်နှာတစ်ပြင်လုံးနဲ့ လည်ပင်းတွေမှာပါ ပျံ့နှံ့နေပါသေးတယ်။ အရွယ်ရောက်ပြီးတဲ့သူတွေမှာ စိတ်ဖိစီးမှုတွေရှိလာရင် ခေါင်းကိုက်တယ်လို့ ဆိုသလိုပဲ ကလေးတွေနဲ့ ဆယ်ကျော်သက်အရွယ်တွေမှာလည်း ခေါင်းကိုက်တယ်လို့ ဆိုပါတယ်။ အသက် ၁၅ အရွယ်ကလေးငယ်တွေရဲ့ 75% လောက်က ခေါင်းကိုက်တယ်ဆိုပြီးတော့ မှတ်တမ်းတင်ထားတာ တွေ့ရပါတယ်။ ကလေးတွေ ခေါင်းကိုက်တယ်လို့ပြောရင် မိဘတွေအနေနဲ့ ပေါ့ပေါ့ဆဆ မနေသင့်ပါဘူး။ တချို့ခေါင်းကိုက်တာတွေက သာမန်ပဲဆိုပေမယ့်လည်း တချို့ကျတော့ ခေါင်းကိုက်တာက အရမ်းဆိုးရွားပြီးတော့ ပိုဆိုးတဲ့အခြေအနေတစ်ခုခုကြောင့် ဖြစ်နေနိုင်ပါတယ်။
    ခေါင်းကိုက်တယ်လို့ပြောရင် ခေါင်းကိုက်တာအမျိုးမျိုး ရှိပါတယ်။ ဒီထဲမှာမှ ဆယ်ကျော်သက်အရွယ် တွေမှာအဖြစ်အများဆုံးသော အမျိုးအစားကတော့ Tension-type headaches လို့ခေါ်တဲ့ ဖိအားတစ်ခုခုကြောင့် ခေါင်းကိုက်ခြင်းပါ။ အများအားဖြင့်တော့ စိတ်ဖိစီးမှုတွေ၊ တင်းအားတွေ၊ စိတ်ကျဆင်းမှုတွေကြောင့် ဖြစ်လေ့ရှိသလို မျက်လုံးအားစိုက်ရတာတွေ၊ အနေအထားမမှန်လို့ လည်ပင်းနဲ့ ကျောရိုး ဒဏ်ဖြစ်တာတွေကြောင့်လည်း ခေါင်းကိုက်တတ်ပါတယ်။ ဆယ်ကျော်သက်အရွယ်တွေမှာ ဒီလိုခေါင်းကိုက်တာမျိုးက ခဏတာကြုံရနိုင်သလို နာတာရှည် (တစ်လကို ၁၅ ကြိမ်ထက် ပိုပြီးခေါင်းကိုက်) တာမျိုးလည်း ဖြစ်သွားနိုင်ပါတယ်။
    တခြားအမျိုးအစားခေါင်းကိုက်တာတွေကိုလည်း ခံစားရနိုင်ပါတယ်။
●    ရုတ်တရက် ခဏခေါင်းကိုက်ခြင်း - နေမကောင်းလို့၊ ရောဂါပိုးဝင်လို့၊ အအေးမိလို့၊ ဖျားလို့ စတာ တွေကြောင့် ခေါင်းကိုက်တတ်ပါတယ်။ ဖိအားများလို့လည်း ဖြစ်နိုင်ပါသေးတယ်။ ဒါကတော့ နေမကောင်းတာ ပျောက်သွားရင် (သို့) ဖိအားမရှိတော့ဘူးဆိုရင် ခေါင်းကိုက်တာလည်း ပျောက်သွားပါလိမ့်မယ်။
●    ခေါင်း အရမ်းထိုးကိုက်ခြင်း - ရုတ်တရက် ခေါင်း အရမ်းထိုးကိုက်တာ အများအားဖြင့် မျက်လုံးတစ်ဖက် ပတ်လည်မှာ ကိုက်လေ့ရှိပေမယ့်လည်း မျက်နှာတစ်လျှောက်၊ ခေါင်း၊ လည်ပင်းနဲ့ ပခုံးတွေကိုလည်း ပျံ့သွားနိုင်ပါတယ်။ ရက်သတ္တပတ် (သို့) လအထိ ကြာအောင်ကိုက်နိုင်ပါတယ်။ ဒါက ဖြစ်ခဲပြီးတော့ ဆေးသောက်ပြီး ကုလို့ရပါတယ်။
●    ခေါင်းတစ်ခြမ်းကိုက်ခြင်း - ခေါင်းအရှေ့ခြမ်း (သို့) နှစ်ဖက်စလုံးမှာ အတော်အသင့် (သို့) ပြင်းထန်စွာ ကိုက်နိုင်ပါတယ်။ မူးဝေတာ၊ မျက်လုံးတွေ ဝါးတာ၊ ကိုယ်ပူ၊ အစာအိမ်မကောင်း၊ ပျို့အန်တာတွေလည်း ဖြစ်နိုင်ပါတယ်။ ပြီးတော့ အလင်း၊ အနံ့နဲ့အသံတွေကို မခံနိုင်ဖြစ်ပြီးတော့ ခေါင်းကိုက်လာပြီဆိုတာနဲ့ အိပ်ပဲ အိပ်ချင်နေတတ်ပါတယ်။
    ဒီလိုခံစားနေရပြီဆိုရင် ဆရာဝန်နဲ့ပြသပြီး ကုသမှုခံယူဖို့ လိုသလို အိပ်ရေးပျက်ခြင်း၊ အချို့သော အစားအစာတွေ၊ ပတ်ဝန်းကျင်အပြောင်းအလဲ၊ စိတ်ဖိစီးမှု စတဲ့ ခေါင်းကိုက်တာကို ပိုဆိုးစေမယ့် အချက်တွေကိုလည်း သေချာစောင့်ကြည့်ဖို့ လိုပါတယ်။ ဘာကြောင့် ပိုခေါင်းကိုက်စေလဲဆိုတာကို သိထားရင် ဒါတွေကို ရှောင်လို့ရပါတယ်။

>>    ဆယ်ကျော်သက်အရွယ်ကလေးတွေမှာ ပြင်းထန်တဲ့ရောဂါ တစ်ခုခုကြောင့်များ ခေါင်းကိုက်တာလား ဆိုတာကို ဘယ်လိုသိနိုင်မလဲ?
    ရုတ်တရက် ခန္ဓာကိုယ်ဟန်ချက်ကို မထိန်းနိုင်တော့တာမျိုး၊ ထုံကျဉ်တာ၊ လေဖြတ်တာ၊ စကားပြောဖို့ ခက်ခဲတာ၊ တက်တာစတဲ့ ပြင်းထန်တဲ့လက္ခဏာတွေ ဖြစ်လာပြီဆိုရင်တော့ ဆေးရုံ၊ ဆေးခန်းကို ချက်ချင်းပို့ပါ။  
    ဆယ်ကျော်သက်အရွယ်ကနေပြီးတော့ အသက်ကြီးလာလေလေ ခေါင်းကိုက်တာတွေက သက်သာလာနိုင်ချေ များလေပါပဲ။ ဒါပေမဲ့လည်း သက်သာမသွားဘဲနဲ့ ခဏခဏ ခေါင်းကိုက်နေရင် (သို့) ပိုဆိုးလာရင်၊ ဆေးတွေသောက်လို့လည်း မသက်သာဘူးဆိုရင်တော့ ဆရာဝန် သွားပြသင့်ပါတယ်။
    ဆရာဝန်က မေးမြန်းစစ်ဆေးပြီးတော့ လိုအပ်ရင် CT, MRI တွေ ရိုက်ခိုင်းပါလိမ့်မယ်။
    ဖြစ်ခဲပေမယ့်လည်း တစ်ခါတလေမှာ နာတာရှည် ခေါင်းကိုက်နေတာတွေက ပြင်းထန်တဲ့ရောဂါ တစ်ခုခုကြောင့် ဖြစ်နိုင်ပါတယ်။ ဒါတွေကတော့ -
●    ဦးနှောက်ရောဂါပိုးဝင်ခြင်း
●    ဦးနှောက်အမြှေးပါးရောင်ခြင်း
●    ဦးခေါင်းထဲမှာ ရေဝင်နေခြင်း
●    သွေးခဲခြင်း
●    ဦးနှောက်ကင်ဆာ (သို့) ဦးနှောက်ထဲမှာ ပြည်တည်နေခြင်း
●    ဦးခေါင်းဒဏ်ရာရခြင်းတို့ ဖြစ်ပါတယ်။

    ဒီမှာ ထည့်သွင်းစဉ်းစားရမယ့်အချက်တွေလည်း ရှိပါတယ်။
    ခေါင်းကိုက်တာ အထူးသဖြင့်တော့ ခေါင်းတစ်ခြမ်းကိုက်တဲ့ဝေဒနာက မျိုးရိုးလိုက်တတ်ပါတယ်။ ဒီတော့ မိဘနှစ်ပါးထဲက တစ်ယောက်ယောက်မှာ ခေါင်းကိုက်ရောဂါရှိရင် ကလေးမှာလည်း ခေါင်းကိုက်နိုင်ပါတယ်။ ဒါကြောင့် ဆရာဝန် သွားပြတဲ့အခါမှာ မိသားစုထဲမှာ ခေါင်းကိုက် ဝေဒနာခံစားရဖူးတာရှိရင် (သို့) အာရုံကြောရောဂါ တစ်ခုခုရှိရင် ပြောပြပေးဖို့ လိုပါတယ်။

Dr. Mya Myo Myo Swe (www.drmyanmar.com)