မပေါ့ဆသင့်သော ကျောက်ကပ်ပိုးဝင်ခြင်း

ကျွန်မတို့ရဲ့ ကျောက်ကပ်တွေဟာ သွေးမှာရှိတဲ့ အညစ်အကြေးတွေကို ဖယ်ထုတ်ပြီး ဆီးအဖြစ် စွန့်ထုတ်ပေးပါတယ်။ ကျောက်ကပ်တစ်လုံးဟာ သင့်လက်သီးဆုပ်အရွယ်ရှိပြီး ပဲစေ့ပုံသဏ္ဌာန် ရှိပါတယ်။ နံရိုးအောက်ဘက်နေရာ ကျောရိုးမ တစ်ဖက်တစ်ချက်စီတွင် နေရာယူထားကြပါတယ်။
ကျောက်ကပ်ပိုးဝင်ခြင်းဆိုတာ ကျောက်ကပ်တွင်းသို့ ဗိုင်းရပ်စ် သို့မဟုတ် ဘတ်တီးရီးယားပိုး ဝင်ရောက်ခြင်းကို ဆိုလိုခြင်းဖြစ်ပြီး ကျောက်ကပ်တစ်ဖက်တည်း သို့မဟုတ် နှစ်ဖက်လုံးတွင် ဖြစ်ပေါ်နိုင်ပါတယ်။

>>  ရောဂါလက္ခဏာများ
●  ဖျားခြင်း
●  ကျောနဲ့ ခါးဘေးတစ်ဖက်တစ်ချက်တွင် နာကျင်ခြင်း
●  ချမ်းတုန်ခြင်း
●  ပျို့အန်ခြင်း
●  ဆီးပူ၊ ဆီးကျဉ်ခြင်း
●  ဆီးတွင် အနည်ပါခြင်း၊ ဆီးအနံ့နံခြင်း
●  ဆီးတွင် သွေးနဲ့ပြည်ပါခြင်း

>>  ဖြစ်စေသောအကြောင်းရင်း
E coli ဆိုသော ဘတ်တီးရီးယားကြောင့် အဖြစ်များပြီး ဆီးလမ်းကြောင်းပိုးဝင်ခြင်း ဖြစ်ပေါ်တတ်သူတွေမှာလည်း ကျောက်ကပ်ပိုးဝင်ခြင်း ဖြစ်ပေါ်ဖို့ အလားအလာများပါတယ်။

>>  ဘယ်လိုကာကွယ်မလဲ?
●  ရေများများသောက်ပါ။
●  လိင်ဆက်ဆံပြီးချိန်တိုင်း ဆီးသွားပါ။
●  ဆီးသွားချင်ရင် မအောင့်ထားပါနဲ့။
●  မိန်းမကိုယ်တစ်ဝိုက်ကို သန့်ရှင်းရာတွင် အနံ့မွှေးသောပစ္စည်းများ အသုံးမပြုပါနဲ့။
●  အမျိုးသမီးများ မိန်းမကိုယ်ကို သန့်ရှင်းတဲ့အခါ အရှေ့ကနေ အနောက်သို့ သုတ်ပါ။

>>  ဘယ်လိုလူတွေမှာ အဖြစ်များလဲ?
●  ကိုယ်ဝန်သည်များ
●  ဆီးချိုရောဂါသည်များ
●  ဆီးပိုးဝင်တတ်သူများ
●  ကျောက်ကပ်ကျောက်တည်သူများ
●  ဆီးကျိတ်ရောင်သူများ
●  ကိုယ်ခံအားနည်းသူများ

>>  ကုသနည်း
ဆရာဝန် ညွှန်ကြားချက်အတိုင်း ပိုးသတ်ဆေးသောက်ခြင်း၊ ဆေးထိုးခြင်းတို့ ပြုလုပ်ရမှာဖြစ်ပြီး ပြင်းထန်ပါက ဆေးရုံတက်ပြီး ကုသမှုခံယူသင့်ပါတယ်။

လေပြေနုသွေး (ဆေး-၂) (www.drmyanmar.com)