ရာသီတုပ်ကွေးအတွက် အကောင်းဆုံးကာကွယ်နည်း

>>  ဘယ်လောက်အထိ ကာကွယ်မှုပေးနိုင်သလဲ?
ယေဘုယျအားဖြင့်တော့ အသက် ၆၅ နှစ်အောက်တွေမှာ ပိုပြီး ထိရောက်မှုရှိတာကို တွေ့ရပါတယ်။ အသက် ၁၈-၆၄ နှစ်ဆိုရင် ၅၀% ကနေ ၆၀% အထိ ကာကွယ်မှုပေးနိုင်ပါတယ်။ ၆၅ နှစ်အထက် အသက်ကြီးသူတွေနဲ့ ရောဂါအခံရှိသူတွေမှာတော့ ကာကွယ်ဆေးထိရောက်မှုဟာ နည်းကောင်းနည်းနိုင်ပါတယ်။

>>  ကာကွယ်ဆေးထိုးခြင်းဖြင့် တုပ်ကွေးကူးစက်ခံရနိုင်လား?
မခံရပါဘူး။ ဒါပေမဲ့ ကာကွယ်ဆေးထိုးပြီးရင်တော့ တုပ်ကွေးလိုမျိုးလက္ခဏာတွေ ပြတတ်ပါတယ်။ ဒီလို ဘာကြောင့်ဖြစ်ရတာလဲဆိုတော့ -
●  ကာကွယ်ဆေးရဲ့ ဘေးထွက်ဆိုးကျိုးကြောင့် ကိုယ်လက်ကိုက်ခဲခြင်းနဲ့ ဖျားခြင်း စတာတွေဖြစ်တတ်ပါတယ်။
●  ကာကွယ်ဆေးအာနိသင်ပြဖို့ဆိုရင် နှစ်ပတ်စောင့်ရပါတယ်။ ဒီနှစ်ပတ်အတွင်းမှာ ရောဂါပိုးကူးစက်ခံရရင် တုပ်ကွေးလက္ခဏာတွေ ခံစားရပါတယ်။
●  ထိုးထားတဲ့ကာကွယ်ဆေးနဲ့ ဗီဇပြောင်းဗိုင်းရပ်စ် ကိုက်ညီမှုမရှိရင်လည်း ကူးစက်မှုကို မကာကွယ်နိုင်လို့ တုပ်ကွေးလက္ခဏာတွေ ခံစားရပါတယ်။
●  အအေးမိရင်လည်း တုပ်ကွေးလိုမျိုးလက္ခဏာတွေ ပြတတ်ပါတယ်။

>>  ကာကွယ်ဆေးမထိုးဘဲ တခြားဘယ်လိုနည်းလမ်းတွေနဲ့ ကာကွယ်နိုင်သလဲ?
တုပ်ကွေးဖြစ်ဖြစ်၊ အအေးမိတာဖြစ်ဖြစ် အကုန်လုံးဟာ ကိုဗစ်-19 လိုပဲ အသက်ရှူလမ်းကြောင်းဆိုင်ရာ ရောဂါဖြစ်တာကြောင့် ကာကွယ်ဖို့နည်းလမ်းတွေဟာလည်း အတူတူပါပဲ။
●  ဆပ်ပြာနဲ့ရေ အသုံးပြုပြီး စက္ကန့် ၂၀ ကြာအောင် လက်ဆေးပါ။ ဆပ်ပြာနဲ့ရေ အလွယ်တကူ မရနိုင်ရင် အယ်လ်ကိုဟောပါဝင်တဲ့ လက်သန့်ဆေးရည်ကို အသုံးပြုပါ။
●  မသန့်ရှင်းတဲ့လက်နဲ့ မျက်လုံး၊ နှာခေါင်းနဲ့ ပါးစပ်တို့ကို မကိုင်ပါနဲ့။
●  မိမိနေထိုင်တဲ့နေရာမှာ တုပ်ကွေး အဖြစ်များနေရင် လူစုလူဝေးကို ရှောင်ပါ။
●  နေမကောင်းသူတွေနဲ့ အနီးကပ်ထိတွေ့ဆက်ဆံတာကို ရှောင်ပါ။
●  ချောင်းဆိုး၊ နှာချေရင် ပါးစပ်နဲ့နှာခေါင်းကို လုံအောင်ပိတ်ပါ။
●  ကောင်တာ၊ မီးခလုတ်၊ တံခါးလက်ကိုင်လိုမျိုး အကိုင်အတွယ်များတဲ့နေရာတွေကို ပုံမှန်သန့်ရှင်းရေးလုပ်ပါ။ ပိုးသတ်ပါ။
●  ကိုယ်ခံအားကောင်းအောင် လေ့ကျင့်ခန်း ပုံမှန်လုပ်ပါ။ အိပ်ရေးဝဝအိပ်ပါ။ အရည်များများသောက်ပါ။ ကျန်းမာရေးနဲ့အညီ စားသောက်ပါ။
တကယ်လို့ တုပ်ကွေးကြောင့်ဖြစ်စေ၊ အအေးမိလို့ဖြစ်စေ နှာစေးဖျားနာလာပြီ ဆိုရင်တော့ အမြန်ဆုံးသက်သာအောင် အအေးမိ ဖျားနာပျောက်ဆေးတွေ ချက်ချင်း သောက်သုံးပေးလို့ ရပါတယ်။

Dr. Aye Hsu Mon (www.drmyanmar.com)