လိပ်ခေါင်းရောဂါဆိုတာ ရှက်စရာမဟုတ်ပါ

လိပ်ခေါင်းရောဂါရှိရင် ဘယ်လိုကုသမှု ခံယူသင့်သလဲ?
နာကျင်ခြင်း၊ ယားယံခြင်း၊ ရောင်ရမ်းခြင်း စတဲ့ ရောဂါလက္ခဏာကို သက်သာစေဖို့အတွက် ဆရာဝန်နဲ့ တိုင်ပင်ပြီး အကိုက်အခဲပျောက်ဆေး သောက်ပါ။ Diosmin နဲ့ Hesperidin ပါဝင်တဲ့ ဆေးဝါးတွေ (ဥပမာ - Daflon) က လိပ်ခေါင်းရောဂါရဲ့ လက္ခဏာတွေကို သက်သာစေပါတယ်။ Hydrocortisone ပါဝင်တဲ့ အနာသက်သာစေတဲ့ လိမ်းဆေးတွေလည်း လိမ်းလို့ရပါတယ်။ ရေနွေးနွေးထဲမှာ ထိုင်ပေးတာ၊ ရေခဲကပ်တာကလည်း လိပ်ခေါင်းကြောင့်ဖြစ်တဲ့ ဝေဒနာတွေကို လျော့ပါးသက်သာစေပါတယ်။

လိပ်ခေါင်းကို ဖယ်ရှားဖို့ဆိုရင်တော့ နည်းလမ်းနှစ်မျိုးရှိပါတယ်။ ပထမနည်းလမ်းကတော့ ခွဲစိတ်စရာမလိုတဲ့နည်းပါ။ သားရေကွင်းပစ်ခြင်းလို့ အလွယ်ခေါ်တဲ့ Rubber band ligation နည်းလမ်းပါ။ လိပ်ခေါင်းရဲ့အခြေမှာ ဒီကုသမှုအတွက် အထူးထုတ်လုပ်ထားတဲ့ သားရေကွင်းတစ်မျိုးကို ထားလိုက်ပြီး သွေးအထောက်အပံ့မရအောင် ဖြတ်ပစ်လိုက်တဲ့ နည်းလမ်းပါ။ သွေးမရတော့လို့ လိပ်ခေါင်းက ရှုံ့ပြီး ကြွေကျသွားပါလိမ့်မယ်။

အလားတူနည်းလမ်းနောက်တစ်ခုကတော့ Sclerotherapy လို့ခေါ်ပါတယ်။ ဒါကတော့ သားရေကွင်းအစား ဓာတုပစ္စည်းတစ်မျိုးကိုသုံးပြီး သွေးအထောက်အပံ့ကို ဖြတ်ပစ်တာပါ။ ဒုတိယနည်းလမ်းကတော့ Haemorrhoidectomy လို့ခေါ်တဲ့ လိပ်ခေါင်းကို လုံးဝဖြတ်ထုတ်လိုက်တဲ့ နည်းလမ်းဖြစ်ပါတယ်။

တကယ်တော့ လိပ်ခေါင်းရောဂါဆိုတာ မိမိတစ်ဦးတစ်ယောက်တည်းမှာမှ ဖြစ်တတ်တာမဟုတ်ဘဲ  အသက်အရွယ်မရွေး၊ ကျား၊ မ မရွေးဖြစ်နိုင်တဲ့ ရောဂါတစ်မျိုးပါ။ ဒါကို လိပ်ခေါင်းရှိတာ ရှက်လို့ဆိုပြီး  ဆေးမြီးတိုတွေနဲ့ ကြိတ်မှိတ်ကုနေမယ်ဆိုရင် နောက်ဆက်တွဲဆိုးကျိုးတွေ ဖြစ်လာနိုင်တာကြောင့် ကျွမ်းကျင်သူနဲ့ ပြသပြီး စောစီးစွာ ကုသမှု ခံယူသင့်ပါတယ်။

Dr. Aye Hsu Mon (www.drmyanmar.com)