သွေးတွင်းအချိုဓာတ်ကျတဲ့အခါ သွေးပေါင်တက်တတ်သလား

ဆီးချိုသွေးချိုအမျိုးအစား-၁ ရှိသူ လူ ၂၂ ယောက်ပါဝင်တဲ့ အသေးစားလေ့လာမှုတစ်ခုမှာ သွေးတွင်းအချိုဓာတ်ကျခြင်းက သွေးပေါင်တက်လာစေပြီး ကြာလာတဲ့အခါ သွေးတိုးရောဂါ ဖြစ်လာနိုင်ကြောင်းကို တွေ့ရှိရပါတယ်။

>>  သွေးတိုးခြင်းရဲ့လက္ခဏာတွေကတော့ -

သွေးအချိုဓာတ်ကျခြင်းကြောင့် သွေးခဏတဖြုတ်တိုးတဲ့အခါ နှလုံးခုန်မြန်တာကို တွေ့ရပါတယ်။ ဒါကလွဲလို့ သွေးတိုးနေကြောင်း တခြားအချက်ပေးလက္ခဏာရပ်တွေကို မတွေ့နိုင်ပါ။ သွေးတိုးနေကြောင်းသိနိုင်ဖို့ စစ်ဆေးကြည့်မှရပါတယ်။

>>  သွေးတွင်းအချိုဓာတ်ကျခြင်းကို ဘယ်လိုရှောင်ကြဉ်ကြမလဲ?

သွေးတွင်းအချိုဓာတ်ကျခြင်းကို ရှောင်ကြဉ်ဖို့ -
●  အစားအစာကို ပုံမှန်နဲ့ မျှမျှတတစားပေးဖို့ လိုအပ်ပါတယ်။
●  ကျန်းမာရေးနဲ့ညီညွတ်တဲ့ အဆာပြေများကို စားပေးပါ။
●  အိမ်မှာ ကိုယ်တိုင် ဆီးချိုသွေးချို ဘယ်လိုစစ်မလဲဆိုတာ ဆရာဝန်ဆီက သင်ပါ။
●  ကိုယ်စားတာကို ဒိုင်ယာရီ ရေးမှတ်ထားပါ။ ဒါမှ ဘာကြောင့် သွေးတွင်းအချိုဓာတ်ကျရတယ်ဆိုတာကို သိပြိး ကိုယ်စားတာကို ပြောင်းလဲနိုင်မှာဖြစ်ပါတယ်။

တစ်ခါတလေ ဒီလိုကာကွယ်နေလျက်နဲ့တောင် သွေးတွင်းအချိုဓာတ် ကျတတ်ပါသေးတယ်။ ဒါကြောင့် ဂလူကိုစ့် ဆေးပြားလေးတွေ၊ ဒါမှမဟုတ် ငှက်ပျောသီးတစ်ခြမ်း၊ စပျစ်သီးခြောက် လက်ဖက်ရည်ဇွန်း ၂ ဇွန်း စသဖြင့် သွေးတွင်းအချိုဓာတ် အမြန်တက်စေမယ့် ကစီဓာတ်တွေ ဆောင်ထားသင့်ပါတယ်။

၁၅-၁၅ နည်းလမ်းက သွေးတွင်းအချိုဓာတ်ကို ဖြည်းဖြည်းချင်း ပြန်တက်စေနိုင်တဲ့ နည်းလမ်းတစ်ခုပါပဲ။ အပေါ်ကပြောတဲ့ ကစီဓာတ်မျိုးကို ၁၅ ဂရမ်လောက် စားလိုက်ပြီး ၁၅ မိနစ်အကြာမှာ သွေးတွင်းအချိုဓာတ် ပြန်စစ်ဆေးကြည့်ပါ။ မတက်သေးဘူးဆိုရင် သွေးတွင်းအချိုဓာတ် တက်လာတဲ့အထိ ဒီအဆင့်တွေကို ထပ်လုပ်ကြည့်ပါ။ ဒါနဲ့မှ မတက်လာရင်တော့ အရေးပေါ်ဆရာဝန် ခေါ်သင့်ပါတယ်။

သွေးတွင်းအချိုဓာတ်မကျအောင်ထိန်းခြင်းဟာ သွေးတိုးရောဂါကို ကာကွယ်နိုင်တဲ့ နည်းလမ်းတစ်ချက်သာ ဖြစ်ပါသေးတယ်။ ဒါကြောင့် ဆီးချိုသွေးချိုနဲ့ သွေးပေါင်ကို ဘယ်လိုထိန်းချုပ်ရမလဲဆိုတာကို ဆရာဝန်နဲ့ သေချာတိုင်ပင်သင့်ပါတယ်နော်။

Dr. Mya Phoo Ngon (www.drmyanmar.com)