စိတ်ပင်ပန်း လူပင်ပန်းဖြစ်ကြတဲ့ သွေးဆုံးချိန်အတွက် သိထားသင့်တဲ့ အကြောင်းအရာများ

သွေးဆုံးချိန်မှာ ဟော်မုန်းအပြောင်းအလဲများနဲ့ အခြားသော အပြောင်းအလဲများကြောင့် အမျိုးသမီးအများစု စိတ်ပင်ပန်း လူပင်ပန်း ဖြစ်ကြပါတယ်။ ဒါကြောင့် သွေးဆုံးချိန်ကို ပုံမှန်အတိုင်း ဖြတ်သန်းနိုင်ဖို့အတွက် သိထားသင့်တဲ့ အကြောင်းအရာလေးတွေကို မျှဝေပေးလိုက်ပါတယ်။

>> သွေးဆုံးပြီးချိန်မှာ လိုအပ်သောအာဟာရများ
အသက်အရွယ် ပြောင်းလဲတာနဲ့ အာဟာရလိုအပ်ချက်များလည်း ပြောင်းလဲလာပါတယ်။ အသက်အရွယ်ကြီးလာချိန်မှာ အရင်ကလို အစာများများ မစားနိုင်တာကြောင့် စားလိုက်တဲ့ အစားအစာတိုင်းမှာ အာဟာရပြည့်ဝနေစေဖို့ အရေးကြီးပါတယ်။ အထူးသဖြင့် သွေးဆုံးပြီးချိန်မှာ အီစရိုဂျင်ဟော်မုန်း လျော့နည်းလာတာကြောင့် ကယ်လ်စီယမ် စုပ်ယူမှုလည်း အားနည်းလာပါတယ်။ ကယ်လ်စီယမ်စုပ်ယူမှု အားနည်းလာတာနဲ့ အရိုးပွရောဂါဖြစ်နိုင်ခြေလည်း မြင့်တက်လာပါတယ်။ ဒါကြောင့် သွေးဆုံးပြီးတဲ့ အမျိုးသမီးတွေအနေနဲ့ တစ်နေ့ကို ကယ်လ်စီယမ်ပမာဏ 1200 mg မှီဝဲပေးသင့်တယ်လို့ အမေရိကန် အရိုးခွဲစိတ်ဆရာဝန်များက အကြံပြုထားပါတယ်။
ဒါ့အပြင် ဗီတာမင် D ဓာတ်ကလည်း ကယ်လ်စီယမ် စုပ်ယူမှုမှာလည်း အရေးပါတာကြောင့် ဗီတာမင် D ကြွယ်ဝတဲ့ နို့နှင့်နို့ထွက်ပစ္စည်းများ၊ တူနာငါး စတာတွေကိုလည်း မှီဝဲသင့်ပါတယ်။ ထို့ပြင် ဗီတာမင် A နဲ့ C ကြွယ်ဝတဲ့ ဟင်းသီးဟင်းရွက်များ၊ ဂျုံနဲ့ ပြုလုပ်ထားတဲ့ အစားအစာများကို ရွေးချယ်စားသုံးသင့်ပါတယ်။
အဆီများသော အစားအစာ၊ အပူအစပ်လွန်ကဲတဲ့ အစားအစာ၊ ဟင်းခတ်အမွှေးအကြိုင်လွန်ကဲတဲ့ အစားအစာ၊ ဝက်ပေါင်ခြောက်ကဲ့သို့သော ဆားပါဝင်မှုများတဲ့ အစားအစာများ၊ ကဖင်းနဲ့ အရက် စတာတွေကို ရှောင်ရှားပြီး ကျန်းမာရေးနဲ့ ညီညွတ်စွာ စားသောက်သင့်ပါတယ်။