အသက် ၂ - ၃ နှစ်အရွယ် ကလေးတွေအတွက် အစားအသောက်ကျွေးနည်း လမ်းညွှန်မှု

>>  ကလေးတွေ အစာသီးတာကို ကာကွယ်ဖို့အတွက် ဘယ်လိုကျွေးကြမလဲ?
●  တစ်လုပ်စားတဲ့ပမာဏကို နည်းနည်းချင်းပဲကျွေးပါ။
●  ဝါးရခက်တဲ့ မျိုချရခက်တဲ့ အခွံမာသီး၊ မုန်လာဥနီအစိမ်း၊ စပျစ်သီး စတာတွေ မကျွေးပါနဲ့။ ကျွေးမယ်ဆိုရင်လည်း စပျစ်သီးကို အစိတ်သေးသေးလေးတွေစိတ်ပြီးမှ ကျွေးပါ။ မုန်လာဥနီကိုလည်း နူးညံ့တဲ့အထိ ချက်ပြုတ်ပြီးမှ ကျွေးပါ။
●  ကလေးစားနေတဲ့အချိန်မှာ ဘေးနားကနေ စောင့်ကြည့်ပေးပါ။ တစ်ယောက်တည်း လွှတ်မထားပါနဲ့။
●  အစာစားချိန်မှာ အမြဲတမ်း ထိုင်ပြီးတော့ စားခိုင်းပါ။

>>  ကျန်းမာရေးနဲ့ညီညွတ်တဲ့ အစားအသောက်တွေကို ဘယ်လိုရွေးချယ်ကြမလဲ?
ကျန်းမာရေးနဲ့ညီညွတ်စေဖို့ အစာအုပ်စုသုံးစုလုံး မျှမျှတတပါဝင်အောင် ကျွေးဖို့က အရေးကြီးပါတယ်။ အစာအုပ်စုသုံးစုဆိုတာက -
●  ခန္ဓာကိုယ်ကြီးထွားဖွံ့ဖြိုးစေတဲ့ အစားအသောက်များ (ဥပမာ - အသားအမျိုးမျိုး၊ ပဲအမျိုးမျိုး၊ ဥအမျိုးမျိုး)
●  ရောဂါကာကွယ်စေတဲ့ အစားအသောက်များ (ဥပမာ - ဟင်းသီးဟင်းရွက်များ၊ အသီးအနှံများ)
●  အင်အားဖြစ်စေတဲ့ အစားအသောက်များ(ဥပမာ - ဆန် ဂျုံ ၊ ပြောင်း) စတာတွေပဲ ဖြစ်ပါတယ်။

ဒီအသက်အရွယ်ကလေးတွေမှာ ကျန်းမာဖို့ဆိုရင် အစားသေချာဝင်အောင် ကျွေးဖို့က အရေးကြီးပါတယ်။ အာဟာရပြည့်ဝဖို့က အရေးကြီးသလို ကိုယ်လက်လှုပ်ရှားမှုရှိဖို့ကလည်း အရေးကြီးပါတယ်။ ကလေးအသက်အရွယ်နဲ့ ကိုက်ညီမယ့် လေ့ကျင့်ခန်းလေးတွေ လုပ်ခိုင်းဖို့အတွက် ကျွမ်းကျင်သူတွေနဲ့ တိုင်ပင်ပါ။ တီဗွီ၊ ဗွီဒီယိုနဲ့ ကွန်ပျူတာတွေကြည့်ချိန်ကို တစ်နေ့ နှစ်နာရီအောက်ပဲ ထားပေးပါ။

Dr. Aye Hsu Mon (www.drmyanmar.com)