နေရောင်ခြည်နဲ့ အရေပြားကင်ဆာ

          နေရောင်ခြည်နဲ့ ကြာရှည်စွာ ထိတွေ့ခြင်းကြောင့်ဖြစ်တဲ့ အဆိုးရွားဆုံး ဆိုးကျိုးကတော့ အရေပြားကင်ဆာပါ။ နှစ်ကြာလာတာနဲ့အမျှ နေကြောင့် အသားအရေ ပျက်စီးတာ များလာပြီးတော့ အသက်ကြီးလာတာနဲ့အမျှ အရေပြားကင်ဆာ ဖြစ်နိုင်ချေတွေကလည်း ပိုပိုများလာပါတယ်။ အဖြစ်များတဲ့ အရေပြားကင်ဆာတွေကတော့ basal cell carcinoma, squamous cell carcinoma, malignant melanoma တို့ဖြစ်ကြပါတယ်။

>>    Basal cell carcinoma

          ဒီကင်ဆာအမျိုးအစားက နေကြောင့် ပျက်စီးနေတဲ့အရေပြားပေါ်မှာ ဖြစ်တာများပြီးတော့ နည်းနည်းလေး မြင့်တက်နေတဲ့ ပန်းရောင်အကွက်လေး ဖြစ်ပါတယ်။ အမျိုးသားတွေမှာဆိုရင် ဘလိတ်ဓားနဲ့ ရိတ်တဲ့မုတ်ဆိတ်နေရာတွေမှာ ဒီကင်ဆာဖြစ်တာ များပါတယ်။ ဒီကင်ဆာက ဘေးကို မပျံ့ပေမယ့်လည်း အချိန်ကြာလာတဲ့အခါမှာ ပိုကြီးပြီးတော့ အောက်ကို ပိုနက်လာတတ်တဲ့အတွက် လျစ်လျူရှုမထားသင့်ပါဘူး။

>>    Squamous cell carcinoma (SCC)

        ဒါက နေနဲ့ထိတွေ့တဲ့နေရာတွေမှာဖြစ်သလို အပူလောင်တဲ့ အမာရွတ်တွေပေါ် (သို့) အရေပြားပေါ်က နာတာရှည်အနာတွေပေါ်မှာလည်း တွေ့ရတတ်ပါတယ်။ တစ်ခါတလေတော့လည်း SCC က အကျိတ်တွေဆီကို ပျံ့သွားတတ်ပြီးတော့ ရှားပေမယ့် တခြားအင်္ဂါအစိတ်အပိုင်းတွေကိုလည်း ပျံ့နိုင်ပါတယ်။

>>    Malignant melanoma

          ဒါကတော့ အရမး်ကိုအန္တရာယ်များတဲ့ ကင်ဆာအမျိုးအစားဖြစ်ပြီးတော့ အရေပြား ဘယ်နေရာမှာမဆို ဖြစ်နိုင်ပါတယ်။ နေရောင်လှုံလေ့ရှိတဲ့ အသက် ၁၈-၂၉ အရွယ် အမျိုးသမီးတွေမှာ အဖြစ်များလာနေပါတယ်။ ဒီကင်ဆာက အကျိတ်တွေနဲ့ ဦးနှောက်၊ အဆုတ်၊ အသည်း အပါအဝင် တခြားကိုယ်အင်္ဂါအစိတ်အပိုင်းတွေကို ပျံ့နှံ့နိုင်ပါတယ်။ မိသားစုထဲမှာ ပုံမှန်မဟုတ်တဲ့မှဲ့တွေ၊ အရေပြားကင်ဆာ ဖြစ်ဖူးတဲ့ရာဇဝင်ရှိရင် ပိုအဖြစ်များပါတယ်။

Dr. Mya Myo Myo Swe (www.drmyanmar.com)