သွေးတွင်းအချိုဓာတ်များနေရင် ဝိတ်လျှော့ကြမယ်

>>  ဆီးချိုသွေးချိုရှိသူတွေမှာ ဝိတ်ချခြင်းရဲ့ကောင်းကျိုးများ

ခါးဗိုက်တစ်ဝိုက်မှာ အဆီတွေစုနေတယ်ဆိုတာ အသည်းတို့၊ မုန့်ချိုအိတ်တို့စတဲ့ ကိုယ်တွင်းအင်္ဂါတွေမှာပါ အဆီတွေစုနေကြောင်း သိနိုင်ပါတယ်။ ဒီအခါ အင်ဆူလင်ကို မတုံ့ပြန်နိုင်ခြင်းဆိုတဲ့အခြေအနေတစ်ခု ဖြစ်လာစေနိုင်ပါတယ်။ ဒါကြောင့် ဒီအဆီတွေကိုချခြင်းဖြင့် ထုတ်လုပ်တဲ့အင်ဆူလင်၊ ထိုးလိုက်တဲ့အင်ဆူလင်ကို ကောင်းကောင်း အလုပ်လုပ်စေနိုင်ပါတယ်။

ဝိတ်ချလို့ ကိုယ်လက်လှုပ်ရှားမှု ပြုလုပ်တော့မယ်ဆိုရင်လည်း ဆရာဝန်၊ ဆရာမတွေနဲ့ တိုင်ပင်ပြီး ဆေးတွေ ပြန်ညှိဖို့လိုပါတယ်။ အထူးသဖြင့် အင်ဆူလင်ထိုးနေရသူတွေနဲ့ Sulphonylurea ဆေး သောက်နေရသူတွေမှာပါ။ တချို့သူတွေအတွက်တော့ ဆေးသောက်တာကို လျှော့နိုင်ဖို့ဆိုတာ ဝိတ်လျှော့နိုင်ဖို့ အကြီးမားဆုံးစိတ်ခွန်အား ဖြစ်စေပါတယ်။

ဆီးချိုသွေးချိုအမျိုးအစား-၁ ဟာ အဝလွန်ခြင်းကြောင့်ဖြစ်တာ မဟုတ်ပေမယ့် ဝိတ်ချခြင်းဖြင့် နောက်ဆက်တွဲတွေကို ကာကွယ်နိုင်ပြီး အင်ဆူလင်ထိုးရတာကို လျော့နည်းစေနိုင်ပါတယ်။

ဆီးချိုသွေးချိုအမျိုးအစား-၂ မှာတော့ ကိုယ်အလေးချိန်ရဲ့ ၅ ရာခိုင်နှုန်းလောက် လျှော့ချခြင်းဖြင့် အကျိုးကျေးဇူးတွေ အများကြီးရပါတယ်။ အဝလွန်နေသူတွေဆိုရင် ဆီးချိုသွေးချိုဖြစ်တာ သိသိချင်းမှာပဲ ၁၅ ကီလိုဂရမ်လောက်အထိ ကိုယ်အလေးချိန်ကို အမြန်အဆန် လျှော့ချနိုင်မယ်ဆိုရင် ဆီးချိုသွေးချိုရောဂါကို ဆေးမသောက်ဘဲတောင် ထိန်းသွားနိုင်ပါတယ်။ စောစောသိပြီး မြန်မြန်ဝိတ်ချနိုင်လေ ကောင်းလေဖြစ်ပါတယ်။
ဝိတ်ချသူအများစုက စိတ်လည်း ပိုမိုကြည်လင်ပြတ်သားလာပြီး ကောင်းကောင်းအိပ်ပျော်လာကာ စွမ်းအင်တွေ ပိုတိုးလာသလို ခံစားရတယ်လို့ ဆိုပါတယ်။