သက်ကြီးရွယ်အိုများအတွက် နေရောင်ခြည်ရဲ့ အကျိုးကျေးဇူးများ

       နေရောင်ခြည်အလွန်အကျွံထိတွေ့ခြင်းက ကျန်းမာရေးအတွက်မကောင်းဘူးဆိုတာကို လူတိုင်းသိကြပါ တယ်။ နေမှလာတဲ့ ခရမ်းလွန်ရောင်ခြည်အလွန်အကျွံထိတွေ့မှုကြောင့် အရေပြားကင်ဆာအများစုကိုဖြစ်စေပါတယ်။

        လေ့လာမှုတစ်ခုအရ လူကြီးတွေအတွက် နေရောင်ခြည်မှန်ကန်တဲ့ပမာဏထိတွေ့ခြင်းဖြင့် ကျန်းမာရေး အကျိုးကျေးဇူးတွေ ရရှိနိုင်တယ်လို့ဆိုပါတယ်။

        နေရောင်ခြည်က ခန္ဓာကိုယ်မှ ဗီတာမင် D ထုတ်လုပ်မှုကိုများစေပါတယ်။ ဗီတာမင် D က တင်ပါးဆုံရိုးကျိုးခြင်း၊ သွေးတိုးခြင်း၊ လေဖြတ်ခြင်းနဲ့ နှလုံးရပ်ခြင်း စတာတွေဖြစ်နိုင်ချေကို လျော့နည်းစေပါတယ်။

        သုတေသီတွေက လူကြီးတွေအတွက် ခရမ်းလွန်ရောင်ခြည် အတော်အသင့်ထိတွေ့ခြင်းရဲ့ကောင်းကျိုးနဲ့ ဆိုးကျိုးတွေကို လေ့လာခဲ့ပါတယ်။ လူကြီးတွေက အိမ်ထဲမှာအနေများတဲ့အတွက် နေရောင်ခြည်ထိတွေ့မှု နည်းတဲ့အပြင် အသက်ကြီးခြင်းရဲ့ အပြောင်းအလဲအနေနဲ့ အရေပြားကနေ ဗီတာမင် D မထုတ်လုပ်နိုင်တော့ပါဘူး။

        လူကြီးတွေအတွက် အရိုးကျန်းမာစေဖို့နဲ့ အူမကြီးကင်ဆာ၊ တင်ပါးဆုံရိုးကျိုးခြင်း၊ လေဖြတ်ခြင်း၊ နှလုံးခုန် ရပ်ခြင်းတွေ ကို လျော့ကျစေဖို့အတွက် ဗီတာမင် D လိုအပ်ပါတယ်။ ဒါကြောင့် ကင်ဆာဖြစ်နိုင်ချေရှိသော်လည်း လူကြီးတွေအတွက်တော့ နေရောင်ခြည်ကနေ ကျန်းမာရေးအတွက်အကျိုးကျေးဇူးအများအပြားရရှိစေနိုင်ပါတယ်။

        နေရောင်ခြည်မှရရှိနိုင်တဲ့  အခြားအကျိုးကျေးဇူးတွေလည်းရှိပါသေးတယ်။ ဗီတာမင် D ထုတ်လုပ်နိုင်တဲ့အတွက် စိတ်ကျခြင်း၊ အိပ်မပျော်ခြင်း၊ ခုခံအားစနစ်ကြွခြင်းတွေကိုလည်းကာကွယ်ပေးပါတယ်။ နေရောင်ခြည် ထိတွေ့မှုနဲ့ ကြွက်သားလုပ်ငန်းများတိုးတက်လာခြင်း၊ အရိုးနှင့် နှလုံးသွေးကြောကျန်းမာရေး၊ စိတ်ကျန်းမာရေး (မှတ်ဉာဏ်တောင်ကောင်းလာစေပါတယ်) တို့အကြားမှာ ဆက်နွယ်မှုရှိပါတယ်။

ဘာလုပ်သင့်သလဲ

        လူကြီးတွေအနေနဲ့ နေရောင်ခြည်ကိုမျှမျှတတခံယူတတ်ဖို့အရေးကြီးပါတယ်။ နေရောင်အောက်မှာ နာရီအကြာကြီးမနေသင့်ပေမယ့် တစ်ပတ်မှာ ရက်တော်တော်များများတော့ နေရောင်နဲ့ထိတွေ့မှု ရှိသင့်ပါတယ်။ နေရောင်ခြည်နဲ့ ပမာဏဘယ်လောက်ထိတွေ့သင့်တယ်ဆိုတာကိုတော့ လေ့လာမှုတွေ ဆက်ပြီးလုပ်ရပါဦးမယ်။

        ဗီတာမင် D လုံလောက်စွာရရှိဖို့အတွက် နေရောင်ခြည်တစ်မျိုးတည်းအပေါ်မှာ မမှီခိုသင့်ပါဘူး။ အချို့သောအစားအစာတွေက ဗီတာမင် D ကို ရရှိစေပါတယ်။ ဗီတာမင် D ကြွယ်ဝတဲ့အစားအစာတွေကတော့ -

- ဆယ်မွန်၊ တူနာကဲ့သို့သော အဆီများသော ငါးများ

- နွားနို့

- လိမ္မော်ရည်

- ဥများ

- လိမ္မော်ရည်၊ ဒိန်ချဉ်၊ ထောပတ် စတဲ့အစားအစာတွေမှာ ဗီတာမင် D ကို တမင်သက်သက် ထပ်ပြီးပေါင်းထည့် ထားခြင်းဖြစ်တဲ့အတွက် ဗီတာမင် D ပမာဏတွေ ကွာခြားနိုင်လို့ ပါဝင်ပစ္စည်းတွေကို သေချာကြည့်ဖို့လိုပါတယ်။

နေရောင်ခြည်များများထိတွေ့ခြင်းက လူတိုင်းအတွက်တော့ မသင့်တော်ပါဘူး

        ပထဝီဝင်အနေအထားအရ ခရမ်းလွန်ရောင်ခြည်ပြင်းအား ကွာခြားမှုရှိတဲ့အတွက် နေရာနဲ့အသားအရည် အမျိုးအစားပေါ်မူတည်ပြီး နေရောင်ခြည်ကိုခံယူဖို့လိုအပ်ပါတယ်။ ဘယ်အသက်အရွယ်ပဲဖြစ်ဖြစ် အချို့လူတွေက နေရောင်အောက်မှာ ဘယ်လောက်ကြာကြာနေခဲ့လဲဆိုတာကို တော်တော် သတိထားဖို့လိုပါတယ်။ ဒီလိုလူတွေကတော့ -

1. အရေပြားကင်ဆာဖြစ်ဖူးခြင်း

2. နေရောင်ခြည်အကြာကြီးထိတွေ့မှုကြောင့် အသားအရည်ပျက်စီးခြင်း

3. နေလောင်ဖူးခြင်း

4. အရေပြားကင်ဆာလက္ခဏာဟု သံသယရှိသည်များတွေ့ရခြင်း

ဖြည့်စွက်စာတွေစားလို့ရပါသလား

        ဗီတာမင် D ဓာတ်များသွားရင်လည်း ခန္ဓာကိုယ်မှာစုပုံနေတတ်လို့ ဗီတာမင်ဆေးတွေသောက်ဖို့လို/မလို နဲ့ ဘယ်လောက်သောက်ရမယ်ဆိုတာကို ဆရာဝန်နဲ့တိုင်ပင်ဆွေးနွေးသင့်ပါတယ်။

Dr. Mya Myo Myo Swe (www.drmyanmar.com)