အသားခြောက်သူတွေအတွက် အသားအရေထိန်းသိမ်းနည်း

(Unicode)

၁။    အစိုထိန်းလိမ်းဆေး လိမ်းပါ။
    အသားအရေ ကြည်လင်နေဖို့ အစိုထိန်းခရင်မ်ကို မှန်မှန်ကန်ကန် လိမ်းတတ်ဖို့ လိုပါတယ်။ အကောင်းဆုံးကတော့ ရေချိုးခန်းထဲက ထွက်လာပြီး ၅ မိနစ်အတွင်းနဲ့ ညအိပ်ရာမဝင်ခင်တွေမှာ လိမ်းပေးပါ။ Bio-Oil ကို နေ့စဉ် မှန်မှန်လိမ်းပေးလို့လည်း ရပါတယ်။

၂။    ရေများများ သောက်ပါ။
    တစ်နေ့ကို ရေ ၈ ခွက်သောက်တာဟာ အသားအရေ စိုပြေစေဖို့ အကောင်းဆုံး အိမ်တွင်းနည်းလမ်းပါပဲ။ ဒိန်ချဉ်တို့၊ အုန်းဆီတို့ လိမ်းပေးတာကလည်း အသားအရေကို ရေဓာတ် ပြည့်ဝစေပါတယ်နော်။

၃။    ရေပူပူနဲ့ အကြာကြီးမချိုးပါနဲ့။
    ရေပူနဲ့ ရေ အကြာကြီးချိုးတာဟာ အရေပြားရဲ့ သဘာဝအဆီတွေကို ခြောက်ခမ်းစေတဲ့အတွက် အသားခြောက်ကြမ်းကြမ်းကြီး ဖြစ်ကျန်စေခဲ့ပါတယ်။ ဒါကြောင့် ရေနွေးနွေးလေးနဲ့ ၁ဝ မိနစ်လောက်ပဲ ချိုးပါ။

၄။    ဆပ်ပြာအပြင်းစားကြီးတွေ မသုံးပါနဲ့။
    ဆပ်ပြာတွေမှာ pH ပမာဏအမြင့်စားနဲ့ မွှေးရနံ့တွေ ထည့်ထားတာမို့ အရေပြားရောင်ရမ်းတာ၊ ခြောက်သွေ့တာတွေ ဖြစ်နိုင်ပါတယ်။ ဒါ့ကြောင့် အသားခြောက်တတ်သူတွေအနေနဲ့ အုန်းဆီတို့၊ ဂလစ်စရင်း အလှဆီတို့ပါတဲ့ ဆပ်ပြာမျိုးကို ဝယ်သုံးပါ။

၅။    လေ့ကျင့်ခန်း မှန်မှန်လုပ်ပါ။
    လေ့ကျင့်ခန်း မှန်မှန်လုပ်သူတွေမှာ အရေပြား ကျုံ့နိုင်ဆန့်နိုင်အား ပိုကောင်းပြီးတော့ မျက်နှာ အသားအရေကို စိုပြေစေတာမို့ အသားခြောက်ခြင်းမှ ကာကွယ်ပေးပါတယ်။

Dr. Mya Phoo Ngon (www.drmyanmar.com)