အသားအရေ နုပျိုလှပခြင်းရဲ့ လျှို့ဝှက်ချက် (၈) ချက်

(Unicode)

    ကျွန်မတို့တွေဟာ အသားအရေ အရမ်းလှတဲ့ ကောင်မလေးတွေကိုတွေ့တိုင်း လည်ပြန်ငေးကြည့်ကြလေ့ရှိပါတယ်။ ဟုတ်ပါတယ်။ အသားအရေလှခြင်းဟာလည်း မိန်းကလေးတွေရဲ့ အိမ်မက်တစ်ခုပါပဲ။
    လှပတဲ့အသားအရေကို ပိုင်ဆိုင်ဖို့က အရမ်းတော့ မခက်ခဲပါဘူး။ အောက်ပါအချက်လေးတွေကို ပုံမှန်လိုက်နာသွားပေးဖို့ပါပဲ။

(၁)     အသားအရေ ပုံမှန်ထိန်းသိမ်းတဲ့အလေ့အကျင့်ကို မွေးမြူပါ
    Ladies တို့ရေ အသားအရေ လှပကောင်းမွန်ချင်တယ်ဆိုပြီး တစ်ရက်၊ နှစ်ရက်လောက်ပဲ skincare လေးထလုပ်ပြီး မထူူးခြားဘူးလို့ အော်နေလို့မရပါဘူးနော်။ နေ့စဉ်ပုံမှန် လုပ်ငန်းဆောင်တာတစ်ရပ်အနေနဲ့ ဂရုစိုက်ထိန်းသိမ်းပေးမှသာ ကိုယ့်စိတ်ကူးထဲကလို လှပကျန်းမာတဲ့အရေပြားကို ပိုင်ဆိုင်နိုင်မှာ ဖြစ်ပါတယ်နော်။ တစ်နေ့ ၂ ကြိမ် မျက်နှာသစ်ပြီး skin care အဆင့်ဆင့် ပြုလုပ်ပေးဖို့ လိုအပ်ပါတယ်။
(၂)     နူးညံ့သောမျက်နှာသစ်ဆပ်ပြာကို အသုံးပြုပါ
    နူးညံ့သော facial cleanser တွေက သင့်အရေပြားကို အကျိုးပြုတဲ့ သဘာဝအဆီတွေကို မပျက်စီးစေဘဲ မျက်နှာကို သန့်စင်ပေးမှာ ဖြစ်ပါတယ်။ Chemical များလွန်းတဲ့ facial cleanser တွေကတော့ အရေပြားကို ခြောက်သွေ့ကွဲအက်စေနိုင်ပါတယ်။

(၃)     မျက်နှာ ခဏခဏသစ်ခြင်းကို ရှောင်ပါ
    နေ့စဉ်မျက်နှာသန့်စင်ဖို့က အဓိကကျပေမယ့် တစ်နေ့တည်းမှာ အကြိမ်များစွာသစ်ခြင်းမျိုးကိုတော့ ရှောင်ကြဉ်သင့်ပါတယ်။ မျက်နှာသစ်လိုက်တာနဲ့တစ်ပြိုင်နက် ရေနဲ့ဆပ်ပြာတွေက မျက်နှာပေါ်ရှိ သဘာဝအဆီဓာတ်တွေကို ခမ်းခြောက်စေပြီး အသားအရေကို အနည်းနဲ့အများ ပျက်စီးစေပါတယ်။ တစ်နေ့ကို ၂ ကြိမ် ရေချိုးလေ့ရှိသူတွေအနေနဲ့လည်း မျက်နှာကို ဆပ်ပြာမတိုက်ဘဲ ရေနဲ့သာ ထိတွေ့စေပြီး သဘက်နဲ့ခြောက်အောင် သုတ်ပေးပါ။ ပြီးရင်တော့ ၃ မိနစ်အတွင်း moisturizer တစ်ခုခု လိမ်းပေးပေါ့နော်။

(၄)     Moisturizer နေ့စဉ်လိမ်းပေးဖို့ လုံးဝမမေ့ပါနဲ့
    မျက်နှာသစ်ပြီးချိန်တိုင်းမှာ တိုနာနဲ့ Moisturizer ကို ပုံမှန်လိမ်းပေးခြင်းဖြင့် ရေဓာတ်ကို ပြန်လည်ထိန်းသိမ်းပေးသင့်ပါတယ်။ Bio-Oil ကို လိမ်းပေးလို့လည်း ရပါတယ်။

(၅)     နေရောင်ခြည်ဒဏ်မှ ကာကွယ်ပါ
    နေရောင်ထိတွေ့ခြင်းကြောင့် အချိန်ကြာတာနဲ့အမျှ အရေပြားဆဲလ်များကို ပျက်စီးစေပြီး အိုမင်းရင့်ရော်စေပါတယ်။ ထို့ပြင် အသားအရေကို ညိုညစ်ကြမ်းတမ်းစေကြောင်း အားလုံးသိကြပြီးဖြစ်ပါတယ်။
    ဒါကြောင့် နေပူပူမိုးရွာရွာ ဘယ်လိုရာသီဥတုမျိုးမှာမဆို SPF30+ ပါတဲ့ Sunscreen ကို မဖြစ်မနေလိမ်းပေးခြင်းဖြင့် အရေပြားပျက်စီးခြင်းကို ကာကွယ်ပေးသင့်တယ်နော်။

(၆)     ရေသောက်ဖို့ မပျင်းပါနဲ့
    အသားအရေစိုပြေစေဖို့အတွက် ရေသောက်ခြင်းကလည်း အရေးပါတဲ့အချက်မို့ မေ့ထားလို့ မရပါဘူး။ ကြည်လင်စိုပြေတဲ့အရေပြားကို ပိုင်ဆိုင်ဖို့ တစ်နေ့ကို အနည်းဆုံး ရေ ၂-၃ လီတာ သောက်သုံးဖို့ လိုပါတယ်။

(၇)     ကိုယ်ထဲသို့ အဆိပ်အတောက်များ အဝင်မခံပါနဲ့
    ရှင်းရှင်းပြောရမယ်ဆိုရင် သင့်ကျန်းမာရေးကို ထိခိုက်စေတဲ့အရာမှန်သမျှဟာ သင့်အရေပြားကိုလည်း ထိခိုက်စေပါလိမ့်မယ်။ ဒါကြောင့် ဆေးလိပ်သောက်ခြင်း၊ အရက်နဲ့ ကော်ဖီ လွန်ကဲစွာသောက်ခြင်းကို ရှောင်ပါ။ နေ့စဉ် ပုံမှန်ကိုယ်လက်လှုပ်ရှားမှုပြုလုပ်ပြီး ကျန်းမာရေးနဲ့ညီညွတ်သော အစားအစာများကိုသာ စားသုံးပေးပါ။ ဒါဆိုရင်တော့ ကျန်းမာကောင်းမွန်တဲ့ အရေပြားကို ပိုင်ဆိုင်ပြီပေ့ါ။

(၈)     အရေပြားဆရာဝန်ရဲ့ အကြံဉာဏ်များကို ရယူပါ
    အရေပြားတွင် ပြဿနာတစ်စုံတစ်ရာ ရှိလာတိုင်းမှာ အရေပြားဆေးခန်းသို့သွားပြီး ဆရာဝန်နဲ့ တိုင်ပင်ဆွေးနွေးသင့်ပါတယ်။ ဒါမှသာ စိုပြေလှပတဲ့ အရေပြားကို ပြန်လည်ပိုင်ဆိုင်နိုင်မှာ ဖြစ်ပါတယ်။

လေပြေနုသွေး (ဆေး-၂) (www.drmyanmar.com)