တရိပ်ရိပ်နဲ့ ဖွံ့ဖြိုးကြီးထွားနေတဲ့ ကလေးရဲ့ဦးနှောက်လေးအတွက် သိသင့်သည်များ

(Unicode)

●    ကလေးကို အရိပ်တကြည့်ကြည့်နဲ့ အပြုသဘောဆောင် စောင့်ရှောက်မှုမျိုး လိုပါတယ်။ ကလေးတွေဟာ ဘေးပတ်ဝန်းကျင်ကလူတွေ နေ့စဉ်ပြုမူဆက်ဆံပုံမျိုးကို အတုယူကြပါတယ်။ ဒါကြောင့် ကလေးအတွက် လေ့လာသင်ယူ ကြီးထွားနိုင်မယ့် ပတ်ဝန်းကျင်မျိုးမှာ ကြီးပြင်းဆော့ကစားကြရဖို့ အရေးကြီးတာပေါ့။ ပြီးတော့ ပင်ပန်းနေတာ၊ ဗိုက်ဆာနေတာ၊ စိတ်ဖိစီးနေတာ၊ အဖက်ခံ၊ အဂရုစိုက်ခံချင်နေတာတွေကို သူတို့ကိုယ်သူတို့ သိဖို့လည်း အရေးကြီးပါသေးတယ်။ ဒါမှ သူတို့နေမကောင်းဖြစ်ရင်၊ ဝမ်းနည်းရင်၊ စိတ်ဖိစီးနေရင် မေမေ ဖေဖေကို အားကိုးနိုင်မှန်းသိပြီး သူတို့ လိုအပ်တာ လုပ်ပေးကြောင်း နားလည်လာမှာပါ။ မိဘတွေရော၊ ကလေးထိန်းတဲ့သူတွေ အကုန်လုံးရော ကလေးကို ချစ်ခင်ကြင်နာ နွေးထွေးစွာနဲ့ ဆက်ဆံဖို့ လိုပါတယ်။
●    ပျော်စရာကစားနည်းတွေ ဆော့ကစားပေးပါ။ စကားပြောတာ၊ စာဖတ်ပြတာ၊ သီချင်းဆိုပြတာ အားလုံးဟာ ကလေးလေးကို ကောင်းကောင်းကြီးပြင်းစေဖို့ လွယ်ကူတဲ့နည်းလမ်းလေးတွေပါပဲ။ ကလေးလေးနဲ့ မှောက်လျက်လေး တူတူနေတာ၊ ၅ လကလေးနဲ့ တူတူရေဝါး ဆော့တာမျိုးပေါ့။
●    ကောင်းကောင်းကျွေးမွေးပါ။ နို့တိုက်နိုင်တယ်ဆိုရင် ပထမ ၆ လတာအတွက်းမှာ မိခင်နို့က အကောင်းဆုံး အာဟာရပါပဲ။ နောက်ပိုင်းမှာလည်း ဖြည့်စွက်စာလည်းကျွေး၊ မိခင်နို့လည်းတိုက်နိုင်ပါတယ်။ အမေ့နို့ပဲတိုက်တိုက်၊ နို့ဘူးပဲတိုက်တိုက် နို့တိုက်ချိန်ကိုလည်း ဦးနှောက်ဖွံ့ဖြိုးမှုအတွက် အသုံးချနိုင်ပါတယ်။ မျက်လုံးချင်း ဆုံကြည့်တာ၊ ပြုံးပြတာ၊ အသားချင်းထိတာ စတာတွေဟာ ကလေးလေးအတွက်တော့ အပြုသဘောဆောင် ဆက်ဆံရေးတွေပါပဲ။ ကလေးလေး ကြီးလာတာနဲ့အမျှ အသီးအနှံတွေအပါအဝင် အာဟာရဓာတ်တွေ ပြည့်ပြည့်စုံစုံ ကျွေးပေးဖို့ အရေးကြီးပါတယ်။
●    ကလေးအတွက် ဈေးကြီးတဲ့အရုပ်တွေ မလိုပါဘူး။ လူကြီးတွေက သူတို့ကို ပြုံးပြတာဟာ ကလေးတွေအတွက် အကောင်းဆုံးအရုပ်ပါပဲ။ ကလေးတွေအတွက် ပညာရစေဖို့ ရည်ရွယ်ချက်နဲ့ ထုတ်ထားတဲ့ လျှပ်စစ်အရုပ်တွေ၊ ဒီဗီဒီတွေ၊ တီဗီရှိုးတွေရှိပေမယ့် ဒီပစ္စည်းတွေဟာ တကယ်ပဲ ကလေးတွေအတွက် အကျိုး ရှိ၊ မရှိဆိုတာ မှတ်တမ်းမှတ်ရာ မရှိပါဘူး။ တီဗီတွေ၊ ဗီဒီယိုတွေ ကြည့်တယ်ဆိုတာ တစ်ဆင့်ဆက်သွယ်မှုတွေပါ။ အကောင်းဆုံးက မေမေ ဖေဖေတို့၊ ဘေးပတ်ဝန်းကျင် အသိုင်းအဝိုင်းတို့နဲ့ ဆက်သွယ်ပြောဆိုတာကသာ အရေးပါပါတယ်။ အသက် ၂ နှစ်အောက်ကလေးတွေမှာ ဖုန်းတွေ၊ တီဗီတွေ မကြည့်သင့်ပါဘူး။

>>    ဘာတွေလုပ်ပေးသင့်သလဲ။
●    ကလေးကို အမြဲဂရုစိုက်ကြည့်ရှူပါ။ အထူးသဖြင့် ကလေးလေး ဖျားနာနေချိန်၊ ဗိုက်ဆာနေချိန်၊ ဝမ်းနည်းနေချိန်၊ အချော့ခံချင်နေချိန်မျိုးတွေမှာပေါ့။ ကလေးတွေဟာ လိုအပ်ကြောင်းကို နည်းမျိုးစုံနဲ့ ပြပါလိမ့်မယ်။ ဘာတွေမှန်းမသိ ပြောနေတာ၊ အသံတွေထွက်နေတာ၊ ပြုံးပြတာ စသဖြင့်ပေါ့။ ဒီအချိန်မှာ ချစ်ခင်ကြင်နာမှုနဲ့ ဆက်ဆံလိုက်တာဟာ ကလေးဦးနှောက်ငယ်လေး ဖွံ့ဖြိုးမှုအတွက် အရေးပါပါတယ်။
●    ကလေးအတွက် လုံခြုံနွေးထွေးတဲ့အိမ်ကလေး တည်ဆောက်ပေးပါ။ အိမ်မှာ ပူလောင်မှုတွေမရှိဘဲ အေးဆေးတည်ငြိမ်နေပါစေ။
●    ကလေးကို ဘေးပတ်ဝန်းကျင်တွေ လေ့လာပါစေ။ ဆော့ကစားခြင်းက ကလေးကို လေ့လာသင်ယူခွင့် ရစေပါတယ်။ ပြီးတော့ မေမေ ဖေဖေတို့ဟာ ကလေးအတွက် ပထမဆုံး‌သော ကစားဖော်ကစားဖက်ပါပဲ။ ရိုးရိုးကစားနည်းလေးတွေ ဆော့ကစားပေးတာက လူတွေနဲ့ သူတို့ရဲ့ ဘေးပတ်ဝန်းကျင်တွေကို လေ့လာသင်ယူနိုင်စွမ်း ရစေပါတယ်။ နေ့စဉ်လှုပ်ရှားလုပ်ကိုင်နေရင်းနဲ့မှ ကလေးကို စကားလေးတွေ ပြောပြောပေးဖို့ မမေ့ပါနဲ့။ ဘာတွေဖြစ်နေတယ်ဆိုတာ ပြောပေးပါ။ စိတ်ဝင်စားစရာ ကောင်းတာလေးတွေကို လက်ညှိုးထိုးပြပါ။ ဒီလိုနည်းနဲ့ အမြင်၊ အကြား၊ အရသာ၊ အနံ့ စတဲ့ အာရုံတွေ ဖွံ့ဖြိုးလာမှာပါ။
●    ကလေးကို မှန်မှန် ကျန်းမာရေးစစ်ဆေးပါ။ ဆရာဝန်တစ်ယောက်နဲ့ မှန်မှန်ပြနေဖို့ အရေးကြီးပါတယ်။ ကာကွယ်ဆေးကို မှန်မှန်ထိုးပါ။
●    လုံခြုံစိတ်ချရတဲ့ ကလေးထိန်းကို ရွေးပါ။ ကလေးကို အချိန်ပြည့် ကြည့်မနေနိုင်ဘူးဆိုရင် ကလေးကို ကိုယ့်လိုကြည့်ရှူပေးနိုင်မယ့် ကလေးထိန်းကို ရှာပါ။ ကိုယ် တကယ် ယုံကြည်ရမယ့်သူမျိုးပေါ့။
●    အကူအညီလိုတဲ့အခါ အကူအညီတောင်းခံပါ။ အရမ်းစိတ်ဖိစီးမှုတွေ များလာပြီ၊ စိတ်ဓာတ်တွေ ကျနေပြီ၊ ကလေးအတွက် အကူအညီ လိုနေပြီဆိုရင် အကူအညီတောင်းခံဖို့ မမေ့ပါနဲ့။

Dr. Mya Phoo Ngon (www.drmyanmar.com)