အရေပြားလေးဖက်နာရှိသူတွေ ကိုယ်ဝန်ဆောင်တဲ့အခါ

တချို့အရေပြားလေးဖက်နာအမျိုးသမီးတွေမှာတော့ ကိုယ်ဝန်ဆောင်တာဟာ အရမ်းအန္တရာယ်များပါတယ်။ ဘယ်လိုအမျိုးသမီးတွေလဲဆိုရင် သွေးတိုးနေသူ၊ အဆုတ်ရောဂါရှိသူ၊ နှလုံးပျက်နေသူ၊ ကျောက်ကပ်ပျက်နေသူ၊ ကျောက်ကပ်ရောဂါရှိသူ၊ ကိုယ်ဝန်ဆိပ်တက်ဖူးသူစတဲ့ အမျိုးသမီးတွေပါပဲ။ ၆ လအတွင်းမှာ လေဖြတ်ဖူးသူ၊ အရေပြားလေးဖက်နာ ထကြွသူတွေလည်း ပါဝင်ပါတယ်။
အန္တရာယ်များတဲ့ ကိုယ်ဝန်ဆောင်တွေကို ကောင်းကောင်းကုသနိုင်ပြီး လေးဖက်နာဆရာဝန်နဲ့ လက်တွဲကုသနိုင်မယ့် သားဖွားမီးယပ်ဆရာဝန်နဲ့ ပြသဖို့လိုပါတယ်။

>>  ကိုယ်ဝန်က အရေပြားလေးဖက်နာကို ဘယ်လိုထိခိုက်နိုင်ပါသလဲ?
အရေပြားလေးဖက်နာရှိတဲ့ ကိုယ်ဝန်ဆောင်အမျိုးသမီးတွေဟာ တချို့ကိုယ်ဝန်နောက်ဆက်တွဲတွေ ပိုဖြစ်နိုင်ပါတယ်။
1.  ကိုယ်ဝန်ဆောင်စဉ် အရေပြားလေးဖက်နာ ထကြွနိုင်ပါတယ်။ ကိုယ်ဝန် ပထမနဲ့ ဒုတိယကာလတွေမှာ ဖြစ်လေ့ရှိပါတယ်။ များသောအားဖြင့်တော့ အပျော့စားကြွတာလောက်ပဲ ရှိပါတယ်။ ဒါပေမဲ့ တချို့ရောဂါကြွတာမျိုးက ဆေး ချက်ချင်းသောက်ရင်သောက်၊ မသောက်ရင် ကလေး စောမွေးတာမျိုး ဖြစ်တတ်ပါတယ်။ အရေပြားလေးဖက်နာထကြွတဲ့ အကြိုလက္ခဏာတွေရှိလာပြီဆိုတာနဲ့ ဆရာဝန်နဲ့ ချက်ချင်းပြပါ။
2.  အရေပြားလေးဖက်နာ ကိုယ်ဝန်ဆောင် ၁၀ ယောက်မှာ ၂ ယောက်လောက်က ကိုယ်ဝန်ဆိပ်တက် တတ်ပါတယ်။ ကျောက်ကပ်ရောဂါဖြစ်ဖူးတဲ့ အမျိုးသမီးတွေမှာ ပိုဆိုးပါတယ်။ ကိုယ်ဝန်ဆိပ်တက်တယ်ဆိုရင် ရုတ်တရက် ကိုယ်အလေးချိန်တွေ တိုးလာတာ၊ မျက်နှာတွေ ခြေလက်တွေ ဖောရောင်လာတာ၊ အမြင်ဝေဝါးတာ၊ မူးဝေတာ၊ ဗိုက်အောင့်တာတွေ ဖြစ်လာတတ်ပါတယ်။ ကလေးကို စောမွေးဖို့ လိုနိုင်ပါတယ်။
3.  ကိုယ်ဝန်ဆောင်ခြင်းက တခြားပြဿနာတွေကို ပိုဆိုးစေနိုင်ပါတယ်။ အထူးသဖြင့် စတီးရွိုက်ဆေး သောက်နေရတဲ့ အရေပြားလေးဖက်နာ ကိုယ်ဝန်ဆောင်တွေမှာပါ။ သွေးတိုး၊ ဆီးချို၊ ကျောက်ကပ် စတဲ့ ပြဿနာတွေ ဖြစ်တတ်ပါတယ်။ ဒါပေမဲ့ အစားအသောက်ကို သေချာချင့်ချိန်စားသုံးပေးရင်လည်း ဒီပြဿနာတွေကို ရှောင်လွှားနိုင်ပါတယ်။ ဆရာဝန်နဲ့ ရက်ချိန်းမှန်မှန်ပြမှသာလျှင် ဒီလိုပြဿနာတွေကို စောစောသိ၊ စောစောကုသနိုင်ပြီး အမေရော ကလေးပါ ကျန်းမာမှာပါ။