နာတာရှည်အဆုတ်ရောဂါအတွက် အိမ်တွင်းကုသနည်းများ

နာတာရှည်အဆုတ်ရောဂါဆိုတာ မကုသဘဲထားရင် သေစေနိုင်ပါတယ်။ အသက်ကြီးတဲ့လူတွေမှာသာမက ငယ်တဲ့လူတွေမှာလည်း ဖြစ်တတ်ပါတယ်။ နာတာရှည်အဆုတ်ရောဂါရဲ့ အချို့လက္ခဏာတွေက ချောင်း အဆက်မပြတ်ဆိုးတာ၊ အသက်ရှူရခက်တာ၊ သလိပ်တွေထွက်တာ၊ မောပန်းလွယ်တာ၊ အသက်ရှူရင် အသံတွေမြည်တာ၊ အသားအရေ အရောင်ပြောင်းလာတာတို့ပဲ ဖြစ်ပါတယ်။ စောစောစီးစီး မှန်ကန်တဲ့ ကုသမှုကို ခံယူပါ။ လွယ်ကူရိုးရှင်းပြီး အကျိုးရှိစေတဲ့ အိမ်တွင်းနည်းလမ်းတွေကိုလည်း ပြောပြပေးပါမယ်။
♦  ကြက်သွန်ဖြူမှာ ပိုးသတ်ပေးနိုင်တဲ့ အာနိသင်အပြင် လေပြွန်ထဲကသလိပ်တွေကို ရှင်းပေးနိုင်ပါတယ်။ နာကျင်တာတွေကိုလည်း သက်သာစေပါတယ်။ ကြက်သွန်ဖြူ ဥအနည်းငယ်ကို မညက်တညက်ထောင်းပါ။ ဒယ်အိုးထဲမှာ ထောပတ်ကို လက်ဖက်ရည်ဇွန်း တစ်ဝက်စာ ထည့်ပြီး အပူပေးပါ။ ပြီးရင် ထောင်းထားတဲ့ ကြွက်သွန်ဖြူကို ထည့်၊ စက္ကန့်အနည်းငယ် အပူပေးပြီး ပူတုန်း စားပါ။
♦  ချင်းကတော့ အယောင်ကျစေတဲ့ အပြင် သလိပ်တွေကို ခြေဖျက်ပေးနိုင်ပါတယ်။ အဆုတ်တွင်း သွေးလည်ပတ်မှုကိုလည်း ကောင်းစေပါတယ်။ ချင်းတစ်လက်မအရွယ်ကို အခွံ့ခွာပြီး အတုံးသေးတွေ တုံးပြီး ပြုတ်ပါ။ အရည်စစ်ထားပြီး အကြမ်းရည်အနေနဲ့ သောက်ပေးနိုင်ပါတယ်။
♦  နနွင်းက လေပြွန်တွေယောင်တာ ကျစေပြီး ခန္ဓာကိုယ်က အဆိပ်အတောက်တွေကို စွန့်ထုတ်ပေးပါတယ်။ နနွင်းကို နေ့စဉ်စားသောက်နေတဲ့အထဲမှာ ထည့်စားနိုင်သလို ထောပတ်လက်ဖက်ရည် တစ်ဇွန်းစာကို အပူပေးပြီး နနွင်းမှုန့် အနည်းငယ်ထည့်ပါ။ အဲဒါကို နွားနို့နွေးနွေး တစ်ဖန်ခွက်နဲ့အတူ သောက်ပါ။
♦  ယူကလစ်ဆီက လေပြွန်တွေကို ကျယ်စေ၊ အယောင်ကျစေတဲ့အတွက် အသက်ရှူတဲ့နေရာမှာ လွယ်ကူစေပါတယ်။ ရေနွေးပူပူထဲမှာ ယူကလစ်ဆီ အနည်းငယ်ထည့်ပြီး အငွေ့ရှူပေးပါ။ သတိထားရမှာကတော့ ယူကလစ်ဆီအပျစ်ကို ရှူမိရင်တော့ ပိုဆိုးလာနိုင်ပါတယ်။
♦  Omega 3 fatty acid ကြွယ်ဝတဲ့ အစားအစာတွေက နာတာရှည် အဆုတ်ရောဂါရဲ့ လက္ခဏာတွေကို သက်သာစေပါတယ်။ အဒါတွေကတော့ သစ်ချသီး၊ဗန်ဒါစေ့၊ ထောပတ်သီးနဲ့ သံလွင်ဆီတို့ပဲ ဖြစ်ပါတယ်။

>>  ဒါတွေအပြင်
●  ဆေးလိပ်သောက်တာ၊ vape သောက်တာတို့ ရှောင်ပါ။ နီကိုတင်းအစားထိုး ကပ်ခွာ၊ ပီကေ၊ ငုံဆေး စတာတွေ သုံးပါ။
●  လမ်းလျှောက်တာ၊ အပင်စိုက်တာ၊ ဂေါက်ရိုက်တာ အစရှိတဲ့ အရမ်းအားစိုက်စရာမလိုတဲ့ လေ့ကျင့်ခန်းတွေလုပ်ပါ။ အသက်ရှူလေ့ကျင့်ခန်းတွေ လုပ်ပါ။
●  ဆီ၊ ဆားကို လျှော့ပြီး အစေ့အဆံတွေ၊ အသီးအနှံ၊ အသီးအရွက်တွေ များများစားပါ။
●  ရေကို တစ်နေ့ ၈ - ၁၀ ဖန်ခွက်သောက်ပါ။ ဒါမှသာ ချွဲသလိပ်တွေဟာ အဆုတ်မှာ ကပ်မနေတော့ဘဲ အသက်ရှူရ လွယ်ကူစေမှာပါ။
●  Gas ပါတဲ့ အချိုရည်တွေ သောက်ခြင်းဟာ ရင်ခေါင်းထဲမှာရှိတဲ့ အမြှေးပါးပေါ် ဖိအားကျစေတာကြောင့် အသက်ရှူရတာ ပိုပြီးခက်ခဲစေပါတယ်။
●  အရက်သောက်တာကလည်း ရောဂါကို ပိုပြီးဆိုးစေပါတယ်။
●  ဝိတ်ကိုလည်း ပုံမှန်ထိန်းထားသင့်ပါတယ်။ ဝတဲ့လူရဲ့ အဆုတ်နဲ့ နှလုံးဟာ သာမန်လူထက် ၂ ဆ ပိုအလုပ်လုပ်ရတာကြောင့် ရောဂါကို ပိုပြီးဆိုးလာစေပါတယ်။
●  နာတာရှည်အဆုတ်ရောဂါဟာ ပျောက်ကင်းအောင် မကုသနိုင်ဘူးဆိုတာ သိထားရပါမယ်။
ကိုယ့်ရဲ့ နေအိမ်ကို ဖုန်တွေ၊ သဲတွေမရှိအောင် ရှင်းလင်းထားပြီး အမှုန်အမွှားတွေ၊ မီးခိုးတွေကို ရှောင်ပါ။

Dr. Htar (www.drmyanmar.com)