အအေးမိတုပ်ကွေးကို ကြိုတင်တားဆီးဖို့ ...

မိုးတွင်းဝင်ပြီး မိုးလေးဖြောက်ဖြောက်ကျ၊ အနောက်လေလေး တဖြူးဖြူးတိုက်လာပြီဆိုရင် အအေးမိတုပ်ကွေးရာသီ ရောက်လာပါပြီ။ တုပ်ကွေးဝင်ပြီဆိုတာနဲ့ အလုပ်ပျက် အကိုင်ပျက်၊ ဖျားနာ ကိုက်ခဲ နုံးချိနေတော့တာပါပဲ။
ဒီလိုတုပ်ကွေးဖျားနာ မဖြစ်ရလေအောင် ကိုယ့်ဘက်ကနေ ကြိုတင်ကာကွယ်ရေးတွေလုပ်ထားဖို့ လိုလာပြီပေါ့။
၁။  လက်ဖက်ရည်လေး သောက်ပေးပါ။
လက်ဖက်ရည်လေးကို သံပရာနဲ့ ပျားရည်လေးနဲ့ ရောသောက်ပေးပါ။ ဒီလိုလက်ဖက်ရည်လေး သောက်ပြီး ရေနွေးငွေ့လေး ရှူပေးခြင်းက အသက်ရှူလမ်းကြောင်းမှာရှိတဲ့ မွေးညှင်းလေးတွေရဲ့ ပိုးမွှားဖယ်ရှားမှုကို ပိုကောင်းစေနိုင်ပါတယ်။ သံပရာက ချွဲတွေကိုကြဲစေပြီး ပျားရည်က ပိုးတွေ သေစေနိုင်ပါတယ်။

၂။  ပရိုတင်း အသားဓာတ်တွေ များများစားပေးပါ။
ပရိုတင်း အသားဓာတ်နည်းခြင်းက ခုခံအားစနစ်ကို ကျဆင်းစေလို့ ငါးတို့၊ ကြက်ဥတို့၊ ဒိန်ချဉ်တို့လိုမျိုး ပရိုတင်းပြည့်ဝတဲ့ အစားအသောက်တွေကို စားသောက်ပေးပါ။

၃။  အားကစားရုံက ပစ္စည်းတွေကို သေချာသုတ်ပါ။
အားကစားရုံဆိုတာ ချွေးတွေသံတွေ ရွှဲနေတဲ့ တဘက်တွေ၊ ဖိနပ်ညစ်ပတ်ပတ်တွေ၊ ပိုးမွှားတွေ စုဝေးနေတဲ့ နေရာတစ်ခုပါပဲ။ ဒါကြောင့် ခုံပေါ်၊ ဖျာပေါ်မှာမထိုင်ခင်မှာ တဘက်သန့်သန့်လေးတစ်ခု အရင်ခင်းပေးပါ။ အလေးတုံးတွေ၊ စက်ဘီးလက်ကိုင်တွေကို မကိုင်ခင်မှာ ဘက်တီးရီးယားပိုး သေစေတဲ့ တစ်ရှူးအစိုလေးနဲ့ အရင်သုတ်ပေးပါ။