အရိုးတွေ သန်မာစေဖို့ နည်းလမ်း (၈) သွယ်

(Unicode)

    ကြီးကြီးတစ်ယောက် ရေချိုးခန်းကအထွက် ချောခနဲဖြစ်ပြီး ဖင်ထိုင်လျက် လဲသွားပါရော။
    ဂျွတ် ... ဟာ သွားပြီ။ တင်ပါးနားက ဆစ်ခနဲ၊ လက်ထောက်လိုက်တဲ့ လက်ကောက်ဝတ်က ဆစ်ခနဲ။

    အမျိုးသမီး ၃ ယောက်မှာ ၁ ယောက်လောက်ဟာ တစ်သက်တာမှာ အရိုးတစ်ခါတော့ ကျိုးတတ်ကြတယ်လို့ ဆိုပါတယ်။ ကံကောင်းတာက အရိုးပွရောဂါဟာ ကာကွယ်လို့ ရပါတယ်။ ဒီနည်းလမ်းလေးတွေကို ကြည့်ကြည့်ကြရအောင်နော်။

၁။    ကယ်လ်ဆီယမ်ကြွယ်ဝတဲ့ အစားအသောက်တွေကို စားပေးပါ။
    ကယ်လ်ဆီယမ်ဟာ အရိုးကို သန်မာစေပြီး အရိုးတည်ဆောက်ရေးဖြစ်စဉ်ကို သမမျှတအောင် ထိန်းညှိပေးပါတယ်။ အသက် ၁၉ နှစ်နဲ့ ၅၀ ကြားဆိုရင် နေ့စဉ်ကယ်လ်ဆီယမ် ၁၀၀၀ မီလီဂရမ်နဲ့ အသက် ၅၀ ကျော်တွေမှာ တစ်နေ့ ၁၂၀၀ မီလီဂရမ် စားပေးဖို့ လိုပါတယ်။ တစ်နေ့ကို နို့နဲ့ နို့ထွက်ပစ္စည်း ၃ ခွက်ကနေ ၄ ခွက် (၁ ခွက်ဆိုတာ နို့ ၂၅၀ မီလီလီတာ၊ ဒိန်ချဉ် ၁၇၅ မီလီလီတာ) လောက် စားပေးနိုင်ပါတယ်။ အယ်မွန်စေ့ လှော်ကလည်း ကယ်လ်ဆီယမ်ဓာတ် ကြွယ်ဝပါတယ်။

၂။    ဗီတာမင် D ကိုလည်း မမေ့နဲ့ဦးနော်။
    ကယ်လ်ဆီယမ်ဓာတ်ကို စုပ်ယူဖို့ ဗီတာမင် D က အရေးကြီးပါတယ်။ တစ်နေ့ကို နေရောင် ၁၀ မိနစ်ကနေ ၁၅ မိနစ်လောက် ထိတွေ့ပေးရုံနဲ့ ဗီတာမင် D ပြည့်ဝနိုင်ပါတယ်။ ဒီလို နေရောင် မထိတွေ့နိုင်ဘူးဆိုရင် ဗီတာမင် D ကြွယ်ဝတဲ့ အစားအသောက်တွေ စားပေးဖို့ လိုပါတယ်။ ဥပမာ - နို့ (၄ ခွက်မှာ ဗီတာမင် D ၄၀၀ IU) သောက်ပေးတာမျိုးပေါ့။ မာဂျရင်းထောပတ်တို့ တချို့ပဲနို့တွေနဲ့ လိမ္မော်ရည်တွေမှာလည်း ဗီတာမင် D ဖြည့်စွက် ထားတတ်ပါတယ်။ အသက် ၅၀ အောက်ဆို ဗီတာမင် D တစ်နေ့ ၄၀၀ ကနေ ၁၀၀၀ IU၊ အသက် ၅၀ အထက်မှာ တစ်နေ့ ၈၀၀ ကနေ ၂၀၀၀ IU ရရှိဖို့ လိုပါတယ်။

၃။    အားဆေးတွေ သောက်ပေးပါ။
    ကျန်းမာရေးနဲ့ညီညွတ်တဲ့ အစားအသောက်တွေကနေတစ်ဆင့် လိုအပ်တဲ့ အာဟာရဓာတ်ကို ရယူတာ အကောင်းဆုံးပါပဲ။ ဒါပေမဲ့ တစ်ခါတလေ လုံလောက်အောင် မစားသောက်နိုင်တဲ့အခါ ကယ်လ်ဆီယမ်တို့၊ ဗီတာမင် Dတို့အားဆေးတွေ သောက်ပေးဖို့ လိုနိုင်ပါတယ်။ ဘာဆေးတွေ သောက်ရမယ်ဆိုတာကတော့ ဆရာဝန်နဲ့ တိုင်ပင်ပါ။

၄။    လှုပ်ရှားပါ။
    ကိုယ်လက်လှုပ်ရှားမှုဟာ အရိုးတည်ဆောက်မှုကို အားပေးပြီး အရိုးတွေကိုခိုင်မာစေ နိုင်ပါသတဲ့။ ကြွက်သားတည်ဆောက်မှုတွေ၊ ကိုယ်ဟန်ထိန်းနိုင်မှုတွေကိုလည်း အားပေးတာကြောင့် အရိုးကျိုးနိုင်ခြေကိုလည်း နည်းစေနိုင်ပါတယ်။ အရိုးကျိုးခြင်းကို ကာကွယ်ဖို့ အကောင်းဆုံး လေ့ကျင့်ခန်းတွေကတော့ လမ်းလျောက်တာ၊ ပြေးတာ၊ ကခုန်တာ၊ တင်းနစ်ဆော့တာ၊ အလေးမတာ စတာတွေပါပဲ။ တကယ်ထိရောက်အောင်ဆိုရင် တစ်နေ့က မိနစ် ၃၀ ကနေ မိနစ် ၆၀၊ တစ်ပတ်ကို ၃ ရက်ကနေ ၅ ရက်လောက် လေ့ကျင့်ခန်း ပြုလုပ်ဖို့ လိုနိုင်ပါတယ်။

၅။    ကဖိန်းနဲ့ အရက်အလွန်အကျွံသောက်သုံးခြင်းကို ရှောင်ကြဉ်ပါ။
    ကော်ဖီတို့၊ လက်ဖက်ရည်တို့၊ ကိုလာတို့မှာပါတဲ့ ကဖိန်းဓာတ်ဟာ ဆီးထဲကနေ ကယ်လ်ဆီယမ် ဆုံးရှုံးမှုကိုများစေနိုင်ပါတယ်။ တစ်နေ့ကော်ဖီ ၄ ခွက်ထက် ပိုပြီး သောက်တတ်ရင် အနည်းဆုံးတော့ ကော်ဖီသောက်သလောက်ကို နို့လိုက်သောက်ဖို့ လိုပါတယ်။ အရက် အလွန်အကျွံသောက်သုံးခြင်းဟာလည်း အရိုးသိပ်သည်းဆကို နည်းစေပြီး အရိုးကျိုးနှုန်းကိုလည်း များစေနိုင်ပါတယ်။ အရက်ကို မှန်မှန်သောက်နေမယ်ဆိုရင် (တစ်နေ့ကို ၂ ခွက်ထက်ပိုပြီး သောက်တတ်ရင်) အရိုးကျိုးဖို့ များနေပြီပေါ့။

၆။    ဆားစားနှုန်းကို လျှော့ပါ။
    လေ့လာမှုတွေအရ ဆားအစားများခြင်းကြောင့် ဆီးထဲ ကယ်လ်ဆီယမ်စွန့်ပစ်နှုန်း များစေနိုင်ပြီးတော့ အရိုးသိပ်သည်းဆကို ကျစေနိုင်ပါတယ်။ အထူးသဖြင့် ပြုပြင်ထားတဲ့ အစားအသောက်တွေ (ဥပမာ - ဘာဂါ) မှာပါတဲ့ ဆားပါဝင်မှု များပါတယ်။ ဒါကြောင့်ပြုပြင်ထားတဲ့ အသင့်စား အစားအသောက်တွေကို တတ်နိုင်သလောက် လျှော့စားပေးပါ။ ဆားကို လျှော့စားပြီးတော့ ဟင်းခတ်အမွှေးအကြိုင်တွေကို တတ်နိုင်သလောက် ခတ်စားပေးပါ။

၇။    ဆေးလိပ်ဖြတ်ပါ။
    ဆေးလိပ်သောက်ခြင်းက အရိုးပွနှုန်းကို ပိုများစေနိုင်ပါတယ်။ လေ့လာမှုတွေမှာ ဟော်မုန်းတွေကို ပြောင်းလဲစေနိုင်တာကြောင့် ကယ်လ်ဆီယမ်စုပ်ယူမှုကို လျော့နည်းစေနိုင်ပါတယ်။

၈။    ဆေးတွေကို သတိထားပါ။
    တချို့ဆေးတွေက ကယ်လ်ဆီယမ် စုပ်ယူမှုကို လျော့နည်းစေနိုင်ပြီး တချို့ဆေးတွေကျတော့ ကယ်လ်ဆီယမ် စုပ်ယူမှုကို ပိုကောင်းစေနိုင်ပါတယ်။ ဒါကြောင့် ဘယ်ဆေးက ကယ်လ်ဆီယမ် စုပ်ယူမှုမှာ ဘယ်လိုသက်ရောက်မ ှုရှိတယ်ဆိုတာကို သိထားဖို့ လိုပါတယ်နော်။

www.drmyanmar.com