နာနေသလား ... သတိထား

အမျိုးသမီးအများစုဟာ သားရေးသမီးရေး၊ အိမ်မှုကိစ္စ၊ အလုပ်ကိစ္စ အဝဝတို့နဲ့ ရှုပ်ထွေးပွေလီနေလေ့ ရှိတာကြောင့် နာတာကျင်တာ၊ ကိုက်တာခဲတာလောက်ကို တော်ရုံတန်ရုံ ဂရုမပြုတတ်ကြပါဘူး။ ဒါပေမယ့် တစ်ခါတစ်ရံ ဒီလိုနာကျင်မှုဝေဒနာတွေ ဖြစ်ပေါ်နေတာဟာ ရောဂါကြီးကြီးမားမား တစ်ခုခုရှိနေတာကို ခန္ဓာကိုယ်က အချက်ပြနေတာလည်း ဖြစ်နေနိုင်ပါတယ်။ ဒါကြောင့် အမျိုးသမီးတွေမှာ အောက်ပါနာကျင်မှုဝေဒနာတွေ ခံစားနေရပါက လျစ်လျူ မရှုသင့်ပါဘူး။

●  ဓမ္မတာ နာကျင်ခြင်း
ရာသီလာစဉ် ပုံမှန်ထက်ပိုပြီး ကိုက်ခဲနာကျင်နေခဲ့ရင် သတိထားပါ။ သားအိမ်အတွင်းသားအလွှာ နေရာလွဲမှားပြီး ရောက်နေတဲ့ Endometriosis လို့ခေါ်တဲ့ရောဂါ ဖြစ်နေနိုင်ပါတယ်။

●  ခေါင်းကိုက်ခြင်း
ရုတ်တရက်ကြီး ပြင်းပြင်းထန်ထန် ခေါင်းကိုက်တာဟာ ဦးနှောက်ထဲမှာ သွေးကြောဖောင်းနေတာ ဖြစ်နိုင်ပါတယ်။ ဒီလိုသွေးကြောတွေဟာ ရုတ်တရက် ပေါက်ထွက်နိုင်ပြီး အသက်အန္တရာယ်ရှိတာကြောင့် တစ်သက်တာမှာ အဆိုးရွားဆုံးလို့ ယူဆနိုင်တဲ့ခေါင်းကိုက်ခြင်းမျိုးနဲ့ ခေါင်းကိုက်ခဲ့ရင် ဆရာဝန်နဲ့ အမြန်ဆုံးပြသ ဆွေးနွေးသင့်ပါတယ်။

●  ဗိုက်အောင့်လေပွခြင်း
အမျိုးသမီးတိုင်းဟာ ဓမ္မတာလာစဉ်မှာ ဗိုက်အောင့်လေပွတတ်ကြတာကြောင့် ဖြစ်ရိုးဖြစ်စဉ် ပေါ့ပေါ့ဆဆ မှတ်တတ်ကြပါတယ်။ ဒါပေမယ့် ပုံမှန်ဖြစ်နေကျထက် ပိုဖြစ်လာရင်တော့ သားဥအိမ်ကင်ဆာလက္ခဏာရပ် ဖြစ်နေနိုင်တဲ့အတွက် ဆရာဝန်နဲ့ မဖြစ်မနေ ပြသသင့်ပါတယ်။

●  ခြေသလုံးနာခြင်း
ခြေသလုံးလေ့ကျင့်ခန်းတွေ မလုပ်ရပါဘဲ ခြေသလုံးတွေ နာကျင်နေမယ်ဆိုရင်တော့ ဆရာဝန်နဲ့ ပြသဆွေးနွေးပါ။ ခြေသလုံးသွေးကြောလေးတွေထဲမှာ သွေးခဲပိတ်တဲ့အခါ Deep vein trombosis လို့ခေါ်တဲ့ ခြေသလုံးသွေးကြောပိတ်ရောဂါ ဖြစ်လာပြီး နာကျင်ကိုက်ခဲခြင်းကို ခံစားရတတ်ပါတယ်။ ကိုယ်ဝန်ဆောင်အမျိုးသမီးတွေ၊ သန္ဓေတားဆေးသုံးစွဲသူတွေနဲ့ ဆေးလိပ်သောက်သူတွေမှာ ပိုပြီးအဖြစ်များပါတယ်။

Dr. Mya Phoo Ngon (www.drmyanmar.com)