ရင်သားမှာ အလုံးအကျိတ် စမ်းမိတဲ့အခါ

          လူတိုင်းလူတိုင်း အခုခေတ်မှာ အကြောက်ဆုံးစကားကတော့ ကင်ဆာဆိုတာပါပဲ။ ဟုတ်တယ်မလား?

          ရင်သားမှာ အလုံးအကျိတ် စမ်းမိတိုင်းလည်း စိတ်မညစ်သွားပါနဲ့။ အကျိတ်စမ်းမိတိုင်းလည်း ကင်ဆာတော့ မဟုတ်ပါဘူး။ ကင်ဆာမဟုတ်တဲ့ အကျိတ်တွေလည်း ရှိနေသေးလို့ပါ။

          တချို့အကျိတ်တွေက သူ့အလိုလို ပျောက်သွားတတ်တာကြောင့် စိုးရိမ်စရာမလိုပါဘူး။

          ဒါပေမဲ့ ရင်သားမှာ အလုံးအကျိတ် စမ်းသပ်မိရင်တော့ ကင်ဆာကျိတ်မဟုတ်ကြောင်းသေချာအောင် ဆရာဝန်နဲ့ပြသဖို့တော့ လိုတာပေါ့။

>>    ရင်သားအကျိတ်

          အမျိုးသမီးအများစုဟာ ရင်သားကို စမ်းသပ်ကြည့်ရင် အကျိတ်ကလေးတွေ စမ်းမိနိုင်ပါတယ်။ ဒါဟာ ပုံမှန် ရင်သားအဖုအထစ်တွေပါ။

          တချို့အမျိုးသမီးတွေမှာတော့ ပုံမှန်ထက်ကို ပိုပြီးတော့ အဖုအထစ်ကလေးတွေ များတာကို တွေ့ရပါတယ်။

          ရင်သား ၂ ဖက်လုံးမှာ တူညီတဲ့ အဖုအထစ်ကလေးတွေ စမ်းမိတယ်ဆိုရင် ဒါပုံမှန်လို့ ပြောရမှာပါ။

          ရင်သားတစ်ဖက်နဲ့ ဒါမှမဟုတ်၊ ရင်သား တခြားနေရာတွေနဲ့  စမ်းသပ်မိပုံခြင်း မတူဘူးဆိုရင် သတိထားရပါတော့မယ်။ ဒီလို အကျိတ်မျိုးကတော့ ကင်ဆာကျိတ် ဒါမှမဟုတ် ရိုးရိုးအကျိတ် (အရည်အိတ်တို့၊ အသားကျိတ်တို့) ဖြစ်နေနိုင်ပါတယ်။

>>    တကယ်လို့

●        ရင်သား တခြားနေရာတွေနဲ့မတူတဲ့ အကျိတ်အသစ်ကို စမ်းမိတယ်။

●        ရင်သား တခြားတစ်ဖက်နဲ့မတူတဲ့ အကျိတ်အသစ်ကို စမ်းမိတယ်။

●        အရင်က စမ်းဖူးတာနဲ့မတူတဲ့ အကျိတ်တစ်ခုကို စမ်းမိတယ်ဆိုရင် ဆရာဝန်နဲ့ ပြကြည့်ပါ။

>>    နို့သီးခေါင်း အရည်ထွက်ခြင်း

          နို့သီးခေါင်းကနေ အရည်တွေထွက်နေတာဟာ ပြဿနာတစ်ခုပါပဲ။ နို့သီးခေါင်းကို ညှစ်လိုက်ရင်တော့ ပုံမှန်ကိုက အရည်ထွက်တတ်ပါတယ်။ ဒါကိုယ်နှိုက်က ရင်သားကင်ဆာ ဟုတ်ချင်မှဟုတ်မှာပါ။

          ရင်သားကင်ဆာမှာ -

●        နို့သီးခေါင်းကို မညှစ်ဘဲ အလိုလို အရည်ထွက်တာ

●        ရင်သားတစ်ဖက်မှာပဲဖြစ်တာ

●        သွေးရောင်လွှမ်းတာ၊ ဒါမှမဟုတ် မကြည်တာတွေကို တွေ့ရတတ်ပါတယ်။

          နို့သီးခေါင်းကနေ အရည်ထွက်တာမျိုးက ပိုးဝင်တာတို့၊ တခြားဆေးကုသဖို့လိုတဲ့ အခြေအနေမျိုးတို့မှာ တွေ့နိုင်ပါသေးတယ်။

          ဒါကြောင့် နို့သီးခေါင်းကနေ အရည်တွေ စိမ့်ထွက်နေပြီဆိုရင် ဆရာဝန်နဲ့သာ ပြကြည့်လိုက်ပါ။

>>    ရင်သားမှာ တခြားအပြောင်းအလဲများ

          ရင်သားကင်ဆာရဲ့ အချက်ပေးလက္ခဏာတွေဖြစ်တဲ့ -

●        ရင်သားမှာ ဒါမှမဟုတ် ချိုင်းအောက်မှာ အလုံးအကျိတ် မာမာကြီးတွေ၊ ထူထူကြီးတွေ စမ်းမိတာ

●        ရင်သားမှာ ရောင်ရမ်းနေတာ၊ ပူနွေးနေတာ၊ နီရဲနေတာ၊ မဲနေတာ

●        ရင်သားရဲ့ အရွယ်အစားနဲ့ပုံသဏ္ဌာန် ပြောင်းလဲနေတာ

●        ရင်သားအရေပြား ချိုင့်နေတာ

●        နို့သီးခေါင်း ယားယံတာ၊ အနီကွက်တွေ ထွက်နေတာ

●        နို့သီးခေါင်းတို့၊ တခြားရင်သားအရေပြားတို့ အတွင်းချိုင့်ဝင်နေတာ

●        ရုတ်တရက် နို့သီးခေါင်းကနေ အရည်တွေ ထွက်လာတာ

●        တစ်နေရာရာက နာနေပြီး မပျောက်တော့တာတွေရှိရင် ဆရာဝန်နဲ့ ချက်ချင်းပြပါ။

          ရင်သား နာကျင်နေတာမျိုးက ရာသီစက်ဝန်းတွေနဲ့လည်း ဆိုင်နေနိုင်ပါသေးတယ်။ နာတာ မသက်သာရင်တော့ မပေါ့ဆနဲ့ပေါ့။ နာတာ၊ ကျင်တာမျိုးက ရင်သားကင်ဆာကြောင့် ဖြစ်ခဲပေမယ့် ဆရာဝန်နဲ့ပြပြီး သေချာစမ်းသပ်ကြည့်တာ အကောင်းဆုံးပါပဲ။

Dr. Mya Phoo Ngon (www.drmyanmar.com)