ရာသီလာစဉ်ကာလမှာ လေ့ကျင့်ခန်းလုပ်ခြင်း

>>  ရာသီလာချိန်မှာ မလုပ်သင့်သော လေ့ကျင့်ခန်းများ
အပြင်းအထန် လေ့ကျင့်ခန်းလုပ်ခြင်း၊ အချိန်ကြာမြင့်စွာ လေ့ကျင့်ခန်းလုပ်ခြင်းတို့ကို အတတ်နိုင်ဆုံးရှောင်ပါ။ ပုံမှန်အချိန်မှာလုပ်တာ ကိစ္စမရှိပေမယ့် ရာသီလာချိန်မှာတော့ အဲ့ဒီလိုလုပ်တာဟာ ကြွက်သားရောင်ရမ်းတာတွေကို ဖြစ်စေနိုင်လို့ပါ။
ယောဂလုပ်တာကောင်းတယ်လို့ ပြောခဲ့ပေမယ့် Inversion pose မျိုးလုပ်တာကိုတော့ ရှောင်ပေးပါ။ Inversion pose ဆိုတာက မိမိရဲ့ဦးခေါင်းဟာ ကျန်တဲ့အစိတ်အပိုင်းတွေထက် နိမ့်နေတဲ့ pose မျိုးကို ပြောတာပါ။ လွယ်လွယ်ပြောရရင်တော့ ဇောက်ထိုးအနေအထား သဘောမျိုးပေါ့။ ဒီလိုအနေအထားဟာဆိုရင် ရာသီသွေးဆင်းနေတာကို အဟန့်အတား ဖြစ်စေနိုင်ပါတယ်။ အချိန်ကြာလာတာနဲ့အမျှ မျိုးပွားအင်္ဂါ အဖွဲ့အစည်းအတွက် အန္တရာယ်ရှိလာနိုင်ပါတယ်။
လေ့ကျင့်ခန်းလုပ်နေရင်းနဲ့ အရမ်းပင်ပန်းလာရင်၊ နာကျင်ကိုက်ခဲတာတွေ ပိုဆိုးလာရင်တော့ လုပ်နေတာကို ချက်ချင်းရပ်လိုက်ပါ။ ဆက်လုပ်ရင် သက်သာသွားမှာပါဆိုပြီး ဆက်တိုက်လုပ်မနေပါနဲ့။ ဒီအချိန်မှာတော့ ခန္ဓာကိုယ်ကို အလိုလိုက်ပေးပါ။
လေ့ကျင့်ခန်းလုပ်ပြီးသွားတဲ့အခါမှာ အရေးကြီးဆုံးဖြစ်တဲ့ တစ်ကိုယ်ရည်သန့်ရှင်းရေး လုပ်ဖို့ကိုလည်း မမေ့ကြပါနဲ့။ နောက်တစ်ခု မှတ်ထားသင့်တာက ရာသီလာတာပြီးပေမယ့်လို့ လေ့ကျင့်ခန်းလုပ်တဲ့အခါ ကြွက်သားတွေ ဆွဲဆန့်သလိုဖြစ်တဲ့အတွက်ကြောင့် အတွင်းခံစွန်းရုံလောက် ရာသီသွေး ပြန်ဆင်းတတ်ပါတယ်။ ဒါဟာ ပုံမှန်ဖြစ်စဉ်တစ်ခုပါပဲ။
ဒီလောက်ဆိုရင်တော့ ရာသီလာချိန်မှာ ဘာဖြစ်လို့ လေ့ကျင့်ခန်းလုပ်သင့်သလဲ၊ ဘယ်လို လေ့ကျင့်ခန်းမျိုး လုပ်သင့်သလဲဆိုတာ သိလောက်ပြီထင်ပါတယ်။ ပျိုမေတို့အားလုံး ဓမ္မတာကာလကို သက်သောင့်သက်သာနဲ့ ဖြတ်သန်းနိုင်ကြပါစေ။

Dr. Aye Hsu Mon (www.drmyanmar.com)