ရာသီ သွေးဆင်းများလွန်းခြင်းအတွက် ကုထုံးများ

       ရာသီ မကြာခဏလာတာအတွက် ကုထုံးတစ်နည်းကတော့ ဟော်မုန်းပါတဲ့ သနေ္ဓတားဆေးပါ။ ဒီတားဆေးတွေက ရာသီလာတာကို ထိန်းချုပ်နိုင်ပြီးတော့ သွေးအဆင်းများလို့ဖြစ်တဲ့ သွေးအားနည်းတဲ့ပြဿနာကိုလည်း ဖြေရှင်းနိုင်ပါလိိမ့်မယ်။

          တခြားဖြစ်နိုင်ချေရှိတဲ့ အကြောင်းအရင်းတွေအတွက် ကုထုံးတွေကတော့ အောက်ပါအတိုင်း ဖြစ်ပါတယ်။

●      သိုင်းရွိုက်ဟော်မုန်း ချို့တဲ့ခြင်း

          ဒါကတော့ သိုင်းရွိုက်ဂလင်း ကောင်းကောင်း အလုပ်မလုပ်တဲ့အတွက် ဟော်မုန်းအလုံအလောက် မထုတ်ပေးနိုင်တာကို ဆိုလိုပါတယ်။ သိုင်းရွိုက်ဟော်မုန်းအစားထိုး သောက်ဆေးတွေ သောက်လို့ရပါတယ်။

●      သိုင်းရွိုက်ဟော်မုန်း များလွန်းခြင်း

          သိုင်းရွိုက်ဂလင်းက လိုတာထက်ပိုပြီးတော့ တက်ကြွနေကာ သိုင်းရွိုက်ဟော်မုန်းတွေ အများကြီး ထုတ်ပေးတာပါ။ ကုထုံးမျိုးစုံရှိပြီးတော့ ကိုယ်နဲ့သင့်တော်တဲ့ကုထုံးကို ဆရာဝန်က ရွေးစေပါလိမ့်မယ်။

●      သွေးဆုံးခြင်း

သွေးဆုံးချိန်အစပြုလာပြီဆိုရင် ဆရာဝန်က ဟော်မုန်းကုထုံးတွေနဲ့ အီစရိုဂျင်ဟော်မုန်း အစားထိုးကုထုံးတွေ ပေးပါလိမ့်မယ်။ ဒီကုထုံးတွေက သွေး လုံးဝဆုံးတဲ့အထိ ရာသီလာတာကို ပုံမှန်ဖြစ်အောင် ထိန်းချုပ်ရာမှာ အထောက်အကူ ဖြစ်စေပါလိမ့်မယ်။

●      သားအိမ်အသားလုံးများနှင့် ရေအိတ်များ

          အောက်ပါကုထုံးတွေကို ဆရာဝန်က ညွှန်ကြားပါလိမ့်မယ်။

          o        သားအိမ်အတွင်းသို့ သားဆက်ခြားပစွည်းထည့်ခြင်း - ရာသီသွေးဆင်းများတာကို သက်သာစေပေမယ့်လည်း အသားလုံးကိုတော့ သေးမသွားစေနိုင်ပါဘူး။

          o        MRI ရိုက်ပြီးတော့ ခွဲစိတ်ခြင်း - ဒါကတော့ MRI လို့ခေါ်တဲ့ သံလိုက်ဓာတ်မှန် ရိုက်နေစဉ်အတွင်းမှာပဲ သားအိမ်ထဲကအသားလုံးကို ဖယ်လိုက်တာပါ။

          o        သားအိမ်သွေးလွှတ်ကြောကို ပိတ်လိုက်ခြင်း - အသားလုံးကို သွားတဲ့ သွေးစီးဆင်းမှုကို ပိတ်လိုက်ခြင်းအားဖြင့် အသားလုံးကို ပုတ်ပြီးတော့ ကျုံ့သွားစေပါတယ်။

          o        အသားလုံးကို ခွဲစိတ်ပြီးတော့ ဖယ်ရှားခြင်း - သားအိမ်ခေါင်းထဲကနေတစ်ဆင့် ဖယ်ထုတ်တဲ့နည်းနဲ့ ဗိုက်ကိုခွဲပြီးတော့ ဖယ်ထုတ်တဲ့နည်းဆိုပြီး ၂ မျိုး ရှိပါတယ်။

          o        သားအိမ်ထုတ်လိုက်ခြင်း

          o        Gonadotropin-releasing hormone agonists - ဒီဆေးတွေက အသားလုံးတွေ ကြီးမလာအောင် ထိိန်းထားပြီးတော့ တဖြည်းဖြည်း သေးသွားစေပါတယ်။ ခွဲစိတ်မှုမလုပ်ခင်မှာ ဒီဆေး အရင်တိုက်ထားလေ့ ရှိပါတယ်။

●       စိတ်ဖိစီးမှု

          နေထိုင်မှုပုံစံ အပြောင်းအလဲလေးတွေ လုပ်ပေးတာက စိတ်ဖိစီးမှုတွေအပေါ်မှာရော ရာသီစက်ဝန်းအပေါ်မှာပါ ကြီးမားတဲ့သက်ရောက်မှု ရှိစေနိုင်ပါတယ်။ စိတ်ဖိစီးမှုတွေကို ပြေလျော့စေဖို့ လေ့ကျင့်ခန်း မကြာခဏလုပ်ပါ။ တရားထိုင်ပါ။ အလုပ်တွေ အရမ်းပိ၊ တာဝန်တွေပိနေလို့ စိတ်ဖိစီးနေရင်တော့ အကူအညီ ရယူပါ။ စိတ်အပန်းဖြေဖို့ အချိန်ပေးခြင်းက ကျန်းမာရေးအတွက် အရမ်းအကျိုးရှိပါတယ်။

●       ကိုယ်အလေးချိန် အလွန်အမင်းတက်ခြင်း၊ ကျခြင်း

          ကိုယ်အလေးချိန်ကို ရုတ်တရက်ခြင်း တက်စေကျစေတဲ့ အကြောင်းအရင်းကို ဆရာဝန်ကို ပြောပြခြင်းအားဖြင့် ကိုယ်အလေးချိန်ကို ထိန်းချုပ်နိုင်မယ့်နည်းတွေကို ဆွေးနွေးနိုင်ပါတယ်။

●       သနေ္ဓတားဆေးများကို တုံ့ပြန်ခြင်း

          ဟော်မုန်းပါတဲ့ သနေ္ဓတားဆေးတွေကြောင့် ရာသီစက်ဝန်းကို သက်ရောက်စေပါတယ်။ ကိုယ်နဲ့အဆင်ပြေတဲ့တစ်မျိုးကို ရှာဖို့အတွက် ၃-၄ မျိုးလောက် ပြောင်းသုံးကြည့်ရတတ်ပါတယ်။ ပြီးတော့ တားဆေးအသစ်တစ်မျိုးနဲ့ ခန္ဓာကိုယ်က လိုက်လျောညီထွေဖြစ်ဖို့ လအနည်းငယ်လောက်လည်း ကြာတတ်ပါတယ်။

Dr. Mya Myo Myo Swe (www.drmyanmar.com)