သားအိမ်အသားလုံးတွေရဲ့အန္တရာယ်

>>  အသားပိုအလုံးအမျိုးအစားများ
အသားပိုအလုံးတွေက သားအိမ်ရဲ့နေရာတိုင်းမှာ ဖြစ်နိုင်ပြီးတော့ အရွယ်အစားအမျိုးမျိုး ရှိပါတယ်။ အချို့က ပဲစေ့လောက်သာရှိပြီး အချို့ကတော့ ဖရဲသီးလောက် ရှိနိုင်ပါတယ်။
အဓိကအမျိုးအစားတွေကတော့ -
●  သားအိမ်နံရံအတွင်းမှာဖြစ်တဲ့ အသားပို - သားအိမ်နံရံအတွင်းမှာဖြစ်ပြီး အတွေ့အမြင်အများဆုံး ဖြစ်ပါတယ်။
●  သားအိမ်နံရံအပြင်ဘက်မှာဖြစ်တဲ့ အသားပို - ဒီအသားပိုအလုံးအမျိုးအစားကတော့ သားအိမ်နံရံ အပြင်ဘက်ကတစ်ဆင့် တင်ပဆုံခွေထဲမှာ ကြီးထွားတတ်ပါတယ်။ အရွယ်အစားကလည်း အကြီးကြီး ဖြစ်နေနိုင်ပါတယ်။
●  သားအိမ်ကြွက်သားလွှာ ကြားထဲမှာဖြစ်တဲ့ အသားပို - သားအိမ်အတွင်းဘက်နံရံရဲ့ အောက်ဘက်ကြွက်သား အလွှာထဲမှာဖြစ်ပြီးတော့ သားအိမ်ထဲမှာ ကြီးထွားနိုင်ပါတယ်။
အချို့သော သားအိမ်နံရံအပြင်ဘက်နဲ့ ကြွက်သားလွှာတွေထဲမှာဖြစ်တဲ့ အသားပိုအလုံးတွေဟာ သေးငယ်တဲ့ တစ်သျှူးနဲ့ သားအိမ်ကို တွယ်ကပ်နေတတ်ပါတယ်။ ဒီလိုအသားပိုအလုံးတွေကိုတော့ အညှာပါတဲ့ အသားပိုအလုံးလို့ ခေါ်ကြပါတယ်။

>>  အသားပိုအလုံးများကို ကုသခြင်း
လက္ခဏာမပြရင်တော့ အသားပိုအလုံးတွေကို ကုသဖို့ မလိုအပ်ပါဘူး။ အချိန်ကြာလာတာနဲ့အမျှ အထူးသဖြင့် သွေးဆုံးချိန်တွေမှာ အသားပိုအလုံးတွေက သေးငယ်ကျုံ့သွားပြီး ပျောက်ကွယ်သွားတတ်ပါတယ်။
အကယ်၍ အသားပိုအလုံးကြောင့်ဖြစ်တဲ့ လက္ခဏာတွေ ခံစားနေရရင်တော့ ဒီလက္ခဏာတွေကို အရင်ဆုံး သက်သာအောင် လုပ်သင့်ပါတယ်။
အသားပိုအလုံးတွေကို ကျုံ့သွားစေတဲ့ဆေးတွေလည်း အများကြီးရှိပါတယ်။ ဆေးနဲ့မသက်သာခဲ့ရင်တော့ ခွဲစိတ်ပြီး ဖြတ်တောက်ရတာမျိုး လိုအပ်ကောင်း လိုအပ်နိုင်ပါတယ်။ နောက်ဆုံးအနေနဲ့ကတော့ လက္ခဏာတွေ စတင်ခံစားနေရပြီဆိုရင်တော့ ဆရာဝန်နဲ့ အမြန်ဆုံး တိုင်ပင်ဆွေးနွေးကုသသင့်တယ်လို့ပဲ ပြောကြားချင်ပါတယ်။

Dr. Mya Phoo Ngon (www.drmyanmar.com)