ချောင်းဆိုးတဲ့အခါ သလိပ်အဖြူရောင်တွေ ထွက်နေပြီလား

ချောင်းဆိုးပြီး အဖြူရောင်သလိပ်ထွက်တာဟာ ဘာဖြစ်လို့ပါလဲ?
သလိပ်အရောင်တစ်ခုတည်းကို ကြည့်ပြီးတော့ ဘာရောဂါဖြစ်နေလဲဆိုတာ ပြောဖို့ ခက်ပေမယ့် ရောဂါရှာဖွေတဲ့နေရာမှာတော့ အထောက်အကူပေးနိုင်ပါတယ်။ သလိပ်အဖြူရောင်ရှိနေတာဟာ သလိပ်ထဲမှာ သေဆုံးပျက်စီးသွားတဲ့ သွေးဖြူဥတွေ ပါဝင်နေတယ်ဆိုတာကို ဖော်ပြနေပြီး  ဒီလိုချောင်းဆိုးတာဟာ များသောအားဖြင့်  ဗိုင်းရပ်စ်ပိုးတွေကြောင့် ဖြစ်နိုင်ပါတယ်။ ဒါပေမယ့် ဘက်တီးရီးယားနဲ့ တခြားရောဂါပိုးမွှားတွေကြောင့်လည်း ဖြစ်နိုင်သေးတယ်ဆိုတာ သတိပြုစေချင်ပါတယ်။ သလိပ်အဖြူရောင်ထွက်စေတဲ့ ရောဂါတချို့ကတော့ လေပြွန်ရောင်ရမ်းခြင်း၊ အသက်ရှူလမ်းကြောင်းထဲ ဗိုင်းရပ်စ်ပိုးဝင်ရောက်ခြင်း၊ ပန်းနာရင်ကြပ်ရောဂါ စတာတွေပဲ ဖြစ်ပါတယ်။

သလိပ်အဖြူပျစ်ပျစ်ထွက်ခြင်း
ချွဲသလိပ်တွေဟာ အဖြူရောင်ဖြစ်နေမှ မဟုတ်ပါဘူး။ တခြားဘာအရောင်ပဲ ဖြစ်နေပါစေ သလိပ်အရမ်းပျစ်နေတယ်ဆိုရင်တော့ ခန္ဓာကိုယ်မှာ ရေဓာတ်ခန်းခြောက်နေတာကို ညွှန်ပြနေပါတယ်။ ဒီလိုအခါမှ အသက်ရှူလမ်းကြောင်းထဲမှာရှိတဲ့ သလိပ်တွေကို ဟပ်ထုတ်ရတာ ခက်လာပါလိမ့်မယ်။ သလိပ်ပျော်ပြီး ဟပ်ထုတ်ရလွယ်အောင်ဆိုရင် အရည်များများ သောက်ပေးပါ။ ညဘက်အိပ်တဲ့အခါ ကုတင်ဘေးမှာ လေထုအစိုဓာတ်ထိန်းစက် (Humidifier) ထားပြီး အိပ်စက်ပါ။

သလိပ်အဖြူထွက်ပြီး အမြှုပ်ထနေခြင်း
သလိပ်ထဲမှာ လေပူစီဖောင်းတွေ အများကြီးပါလာပြီဆိုရင် သလိပ်ဟာ အမြှုပ်ထနေပါလိမ့်မယ်။ သလိပ်ပမာဏနည်းတာဟာ ကိစ္စမရှိပေမယ့် ပမာဏအရမ်းများတာ၊ အရောင်က သွေးရောင်လွှမ်းတာ (သို့) ပန်းရောင်ဖြစ်နေတာမျိုးဆိုရင်တော့ စိုးရိမ်ရပါတယ်။ သလိပ်ထဲမှာ အမြှုပ်တွေပါလာတယ်ဆိုရင်တော့ နာတာရှည် အသက်ရှူလမ်းကြောင်းပိတ်အဆုတ်ရောဂါ (COPD)၊ အစာအိမ်ထဲရှိအက်စစ်များ အစာရေမျိုပြွန်ထဲသို့ ပြန်ကန်တက်ခြင်း (GERD)၊ အဆုတ်ထဲရေဝင်ခြင်း (Pulmonary oedema)နဲ့ တချို့သောနှလုံးရောဂါတွေကြောင့် ဖြစ်နိုင်ပါတယ်။