ခြေဖဝါးလေးတွေကို ဘယ်လို ကျန်းမာအောင် ထားကြမလဲ

    အရိုးပေါင်း ၂၆ ရိုး၊ အဆစ်ပေါင်း ၃၃ ဆစ်၊ ကြွက်သားပေါင်း ၁၀၀ ကျော်နဲ့ ဖွဲ့စည်းထားတဲ့ ခြေဖဝါး လေးတွေ ကျန်းမာမှသာ နေလို့ကောင်းပြီး တက်ကြွနေမှာပါ။ ဆိုတော့ သူတို့ကို ဘယ်လို ဂရုစိုက်မလဲဆိုတာ ခြေထောက်ပိုင်းဆိုင်ရာ ခွဲစိတ်အထူးကု ပြောပြထားတဲ့ အချက်တွေကို ပြန်ပြီး မျှဝေပေးလိုက်ပါတယ်နော်။

>>    ခြောက်သွေ့အောင် သုတ်ပါ။
    ရေချိုးပြီးတိုင်း ခြေဖဝါးလေးတွေကို ခြောက်အောင် သုတ်ဖို့ မေ့နေကြတယ်မှတ်လား။ စိုနေတဲ့ ခြေချောင်းလေးတွေဟာ မှိုရောဂါ လွယ်လွယ်နဲ့ စွဲကပ်နိုင်ပါတယ်တဲ့။

>>    ခြေသည်း မှန်မှန် ညှပ်ပါ။
    ခြေသည်းလေးတွေကို အသားနဲ့ နည်းနည်းခွာပြီး အဖြောင့်ညှပ်ပေးတာက ခြေစွယ်ငုပ်တာကို ကာကွယ်ပြီးသား ဖြစ်စေပါတယ်တဲ့။

>>    ခြေထောက်နဲ့ တော်တဲ့ဖိနပ်ကို စီးပါ။
    ချောင်လွန်း၊ ကျပ်လွန်းတဲ့ ဖိနပ်တွေက အရေပြားပွန်းတာ၊ အရည်ကြည်ဖုထတာနဲ့ ခြေသည်းလေးတွေကို ထိခိုက်စေပါတယ်တဲ့။ ထိပ်ပိတ်ဖိနပ်လေးတွေ စီးတဲ့အခါမှာ အကြံပေးချင်တာကတော့ အရှည်ဆုံး ခြေချောင်းနဲ့ လက်မဝက် ကွာတဲ့ဖိနပ်ကို ရွေးပါ။

>>    ကိုယ့်ရဲ့ ခြေထောက်ကို ကောင်းကောင်း ထောက်ပံ့ပေးနိုင်တဲ့ဖိနပ်ကို ရွေးပါ။
    ကိုယ့်ခြေလှမ်းတွေရယ် ခန္ဓာကိုယ်ရယ်ကို ဟန်ချက်ညီညီ ထိန်းထားနိုင်တဲ့ ဖိနပ်မှသာလျှင် မတော်တဆ ချော်လဲတာမျိုးကို ကာကွယ်ပေးနိုင်မယ့်အပြင် နာကျင်တာမရှိဘဲ ပေါ့ပေါ့ပါးပါးနဲ့ သွားလာနိုင်စေမှာပါတဲ့။

>>    ဆရာဝန်ကို ပြရမယ့်အချိန်ကို သိထားပါ။
    နာကျင်၊ နီရဲ၊ ရောင်ရမ်းတာမျိုး ရှိနေပြီဆိုရင်တော့ ဆရာဝန်နဲ့ ဆွေးနွေးပါတဲ့။ ဒါမှသာ သေးတဲ့ရောဂါကနေ ရောဂါကြီး ဖြစ်လာတာကို ကာကွယ်နိုင်မှာပါတဲ့။
    ခေါင်းအစ ခြေအဆုံး ကျန်းမာလှပကြပါစေ။

Htar (www.drmyanmar.com)